البيت الآرامي العراقي




البيت الآرامي العراقي

سياسي ِ ثقافي ِ أجتماعي


 
الرئيسيةالرئيسيةبحـثالتسجيلarakeyboardsyrkeyboardدخول

شاطر | 
 

  حبيب العربنجي : إرفع راسك أنت ثور

استعرض الموضوع السابق استعرض الموضوع التالي اذهب الى الأسفل 
كاتب الموضوعرسالة
البيت الارامي العراقي
الادارة
الادارة



الدولة : المانيا
الجنس : ذكر
عدد المساهمات : 9515
تاريخ التسجيل : 07/10/2009
التوقيت :

مُساهمةموضوع: حبيب العربنجي : إرفع راسك أنت ثور    الإثنين 23 أغسطس 2010, 6:47 pm


حبيب العربنجي : إرفع راسك أنت ثور


22/08/2010




[ندعوك للتسجيل في المنتدى أو التعريف بنفسك لمعاينة هذه الصورة]ما اعتقد هسة أكو ثور واحد بعالم الثيران خجلان من روحه ..لأن الثيران ومن أربعة ايام كلهم صاروا شيوخ وباشاوات ويمكن حتى رؤساء وزارات (يوم الإلنا).. حتى اني ومنذ أربعة أيام مگابل سجادة الصلاة بلكن رب العالمين يقبل دعائي ويگلب چهرتي ثور وأخلص

.. وهنيئاً لعالم الثيران هذا الشعور الرائع والزهو والفخر والكبرياء والعنفوان (هاي مواصفات ثور أزلامي بدرجة رفيق غرفة) !
ومووووووووووووووووووواااااااااااااااااااااع...هذا جاي أتدرب بلكن شيخ مشايخ الثيران يقبلني وياه في رعيته المباركة !
وشنو الموضوع ؟
قبل أربعة أيام.. إنگلبت موازين القوى العالمية لصالح الثيران، وهذا الإنقلاب مو بسبب ضخ الوقود النووي في مفاعل بوشهر الإيراني إللي آخذ عليه أبو الطيب سعد البزاز درجة الدكتوراه، الموضوع أكبر وأخطر من فيروس بوس الواوا.. ففي إسبانيا بلد مصارعة الثيران وبحضور ألاف من المتفرجين..چان الماتادور الإسباني لابس ملابس المزركشة وشايل سيفه.. ماتادور شايل سيفه في نسخة مقلدة من الفلم الكلاسيكي الرائع عنتر شايل سيفه.. المهم هذا الماتادور كان يرگص فرحان بروحه وبشبابه عبالك هذاك الرجال من چان عادل عگلة يغني له باللهجة العوجاوية العوجة " صدام حسين باب المعالي بابو..صدام حسين يحفظ عمرو وشبابو"... وبهاي الأجواء الإحتفالية الرائعة ....وچفتتاً ورأستاً...دخل الثور المنتظر إللي چان ينتظره الماتادور والجمهور... وإللي ما أحد عرف هو أن هذا الثور گاضي عمره في النضال وقراءة الكتب الثورية ...عبالك چان وي تشي جيفارا ... يعني لا أگول ولا أعدد أسمائه وصفاته... ثور مناضل ..دخل لحلبة مصارعة الثيران ...بس شنو...شاد محرك فيراري على بلدوزر كتربلر...وأعتقد هذا الثور المناضل چان يشوف أفلام سبايدرمان في أوقات فراغه بين الإجتماعات الحزبية..أو يجوز أمه الشريفة چانت مصادقة عنكبوت، وحتى ما نظلم الاماية الشريفة والدنيا رمضان والجو بديع.. نگول يجوز أمه چانت نايمة وگرصها عنكبوت دمه فاير وحار لأن كلشي يجوز بأسبانيا..المهم هذا الثور راح گبل عالجمهور بقفزة رشيقة جدا عبالك ناديا كومانشي، وأستلم الجمهور في مشهد درامي لو يظل راسيل كرو أربعين سنة (من كثر ما نلطم بالأربعين كل أمثلنا صارت أربعينية) أو مليون ساعة (وهاي بسبب مسيراتنا المليونية) ما راح يگدر يقلد هاي اللقطة ولو هو أبدع في دور المصارع الروماني ... هذا الثور رفض يكون مجرد ثور عابر في تاريخ الثيران...وگف بنص الجمهور وصاح " وثيرانااااااااااااااااااااااااااااااه" ورفض ينطي الماتادور الإسباني فرصه يهينه أمام الناس الگاعدة ورفض الناس تتفرج على موته تحت ضربات السيف الموجود تحت العباية الحمرا بيد الماتادور... وچانت النتيجة...ما إلها أي علاقة بخديجة.... چانت نتيجة هاي القفزة المباركة والصحوة بنص الجمهور أربعين جريح... يعني عبالك الثور شايل حزام ناسف وطگ بنص الجمهور !
وخلي نشوف لو هذا الثور عراقي وعنده بطاقة تموينية ما ظلت بيها غير الإهانة، وچان عايش بيناتنا لا ماي ولا كهرباء ولا حتى حكومة...چان يگدر يسوي هيچ ! يعني هذا الثور الإسباني عايش ومتربي على زيت الزيتون الإسباني وآغاني خوليو الأب والأبن، ومشاهدة مباريات البارسا والريال، والإستمتاع بقراءة أشعار الشهيد لوركا، والإستمتاع بمشاهدة لوحة كورنيكا لبابلو بيكاسو، كل هاي الأمور ما غزرت بعينه من تذكر تاريخ الإهانات إللي تعرض الها أجداده الثيران وهم ينذبحون تحت قنادر الماتادور بنص حلبة مصارعة الثيران والجمهور فرحان عبالك عيد الغدير...يعني لو هذا الثور متربي وعايش ببغداد.. وروحه عايشه بالبصرة أكيد چان يغني يا مدلولة... والله أتمنى لو چان عراقي.. هسة چنت أطلع مسيرة أو أدز برقية ولاء وتأييد وأسوي مهرجان شعر شعبي تحت شعار "تاج راسنا يا ثور...يا روثك أطيب من البخور" وتشتغل اللواگة العراقية ماركة الهوسچية إللي ماكو مثلها... أحذروا التقليد ليس لدينا فرع آخر عبالك مطعم أبن طوبان للباچة.... آيباااااااااااااخ لو عراقي ...چنا لا حايرين بالحبر البنفسجي ولا بعمامة سودا او بيضا ولا بين التكنوقراط أو أبقراط... والله ما حد طيح حظنا غير جماعة أبقراط...كل واحد شايل وياه شهادة طبيب وسمع أكو عملية سياسية وعباله نفس الشي تخدير وسدية وساعتين وتخلص عملية المصران الأعور...من نعلة على أبهاتكم يا أبقراطيين من السرسري وحتى الواوي وأبو القندرة محمود أبو حنفي !
بشرفكم مو عيب...ولكم وين نولي مو حتى الثيران طلعوا أحسن من عدنا...لا والنوب حتى حميد كرزاي او حامد قرضاي أبو البرنص طلع أشرف من جماعتنا وما خاف من حدد مهلة أربعة أشهر لخروج الشركات الامنية من أفغانستان العامرة بالكوكايين والقاعدة، وإحنا أشو بلاك ووتر دا يلعب جولة وختيلة...يمعودين حتى الإنفجارات الدامية كلها من ورا الشركات الامنية حتى تظل الحاجة إلهم ويظل سوگهم ماشي... بس منو يسمع لو منو عنده غيرة عالبلد !
إخواني
تدرون شي يسوون بالثيران إللي تموت في مصارعة الثيران ؟
من چنت زغير وأشوف كورندبيف (لحم معلب) بالأسواق چانت أمي ما تقبل تشتريه وتگول هاي بأسبانيا الثيران من تموت في مصارعة الثيران يثرموها ويسووها لحم معلب (أخاف أمي چانت وي الأزلام في شعبة الثرم في الامن العامة)..ومن يومها نفسي إنسدت وما آكل اللحم المعلب... بس هسة راح أروح للسوگ بلكن أحصل على علبة لحم معلب من بقايا ذاك الثور المناضل أبو الغيرة....بلكن أشوية تصير عدنا غيرة عالبلد... حتى لو عالريحة من يستوي اللحم المثروم فوگ المعكرونة...
وإللي ريد يصير ثور يرفع ذيله....قصدي يرفع إيده ويصيح.....إرفع راسك إنت ثور.


[ندعوك للتسجيل في المنتدى أو التعريف بنفسك لمعاينة هذا الرابط]
الرجوع الى أعلى الصفحة اذهب الى الأسفل
 
حبيب العربنجي : إرفع راسك أنت ثور
استعرض الموضوع السابق استعرض الموضوع التالي الرجوع الى أعلى الصفحة 
صفحة 1 من اصل 1

صلاحيات هذا المنتدى:لاتستطيع الرد على المواضيع في هذا المنتدى
البيت الآرامي العراقي :: الثقافية , الادبية , التاريخية , الحضارية , والتراثية Cultural, literary, historical, cultural, & heritage :: منتدى قرأت لك والثقافة العامة والمعرفة Forum I read you & general culture & knowledge-
انتقل الى: