البيت الآرامي العراقي




البيت الآرامي العراقي

سياسي ِ ثقافي ِ أجتماعي


 
الرئيسيةالرئيسيةبحـثالتسجيلarakeyboardsyrkeyboardدخول

شاطر | 
 

 عمشة أم البستك عضو بالبرلمان .. صلوا عالنبي !! : جلال چرمگا

استعرض الموضوع السابق استعرض الموضوع التالي اذهب الى الأسفل 
كاتب الموضوعرسالة
Dr.Hannani Maya
المشرف العام
المشرف العام



الدولة : العراق
الجنس : ذكر
عدد المساهمات : 37598
مزاجي : أحب المنتدى
تاريخ التسجيل : 21/09/2009
الابراج : الجوزاء
التوقيت :

مُساهمةموضوع: عمشة أم البستك عضو بالبرلمان .. صلوا عالنبي !! : جلال چرمگا   الأحد 28 أغسطس 2016, 1:53 pm

عمشة أم البستك عضو بالبرلمان .. صلوا عالنبي !! : جلال چرمگا


عمشة أم البستك عضو بالبرلمان .. صلوا عالنبي !!


كتب بواسطة: جلال چرمگا 0[ندعوك للتسجيل في المنتدى أو التعريف بنفسك لمعاينة هذه الصورة]
عمشة أم البستك عضو بالبرلمان .. صلوا عالنبي !!
[ندعوك للتسجيل في المنتدى أو التعريف بنفسك لمعاينة هذه الصورة]

ما أنريد نظلم أحد ولكن مع هذه وتلك مانريد أن نسكت عندما أنشوف حالات غريبة و شاذة حتى لانصير كالشيطان الأخرس!!.
النائب الفلتة وسليطة اللسان/ حنونة الفتلاوي طلعت على فضائية وأعترفت بكل صراحة بالمناسبة هذه أول مرة وأعتقد أخر مرة تحچي باهالصراحة .. گالت:
كلنا أستلمنا كومشنات وعمولات.
يعني كلهم وكلهن كانوا وسطاء بين طرفين..يعني بصريح العبارة دلالين و دلالات وهذه ماتقبل غلط أطلاقا ، وبالمناسبة هذه ما تقلل من شأن الأخوة الدلالين كونها مهنة شريفة ولكن يصير نائب بالبرلمان ويمثل كذا خلق الله يصير دلال؟؟
ولو بهذا الزمن كلشي أعوج ماشي و محد يتجرأ ويگول ليش؟؟.
لكون هذا( الليش) قد تكلفة حياته أو يفقد وظيفته والأمثلة كلش هواية!!.
وياسادة يا كرام موبس (حنونة الفتلاوي) دلالة بأمتياز وحسب أعترافها..لاء يابة لاء ..أكو بالعشرات دلالات بالأصل ووصلن الى البرلمان وواحدهن وراها درزن حماية وسيارات دفع رباعي وحصانة وجواز دبلوماسي و..الخ ومنهن:
- عمشة أم البستك!!.
هاي منين وهذا شلون لقب؟؟.
هذه الأخت كانت تفرش الأرض وگدامها ميزان صغير بأحدى الأسواق الشعبية تبع (بسكويت) بس بسكويت أمكسر تأخذها من المعمل بربع ألسعر وأقل شوية كودن عندها واسطة.
الواسطة رجلها الزاير اللي كان حارس بمعمل البسكويت.
طول السنوات الخالة عمشة ماگدرت تگول(بسكت) ..لاء كانت تصيح:
بستك يا حلوات.. تعالن بستك مثل الورد..وينچن يا الحليوات خوش بستك يلوگ الهالحگ!!.
زين وهذه شوصلها البرلمان وصارت عضوة ووراها كل هالحماية والسيارات وواحد يفتحلها الباب وواحد يستعدلها وألأخر يفتحلها الطريق وعيونكم ماشافت والخالة عمشة نافخة نفسها چانها عليشيش ماعايزها غير أتصيح: علوو..علووو..علوووووو.
قصتها قصة يا خلك الله وبأختصار:
هذه بزمن العبودية والظلم والكراهية والعنصرية نعني أقصد قبل تحرير العراق ودخول الأخوة ألأمريكان الى بغداد!!.
هذنيچ الأيام كانت أكو مدارس محو الأمية ، وبالمناسبة عمشة كانت تسميها (نحو الأمية) المهم دخلت سنة وسنتين وقطعت خوش مرحلة وهناك عمشة گامت تكتب وتقرأ بس كفيلكم أبو الجوادين ماگدرت تتلفظ البسكت أستمرت أدكول بستك و خوش بستك!!.
ياسبحان الله سواها البخت وعمشة صارت خريجة الأبتدائية وأستلمت شهادة التخرج و چرچبتها وعلگتها بالهول حتى الرايح والجاي يشوفها..لعد شلون مو من حقها بعد هالتعب وكل هالسنوات وماتعلگها؟؟ والله لوموعيب چان علگتها برة اباب الحوش حتى الرايح والجاي يشوفها .
راحت أيام وأجت أيام وعمشة شايلة خشمها وصارت حديث نسوان المحلة كلها.
فد يوم وراء العشاء وهمه يشربون الچاي ، عمشة گالت الزوجها الزاير:
أگلك شني رأيك أرشح للبرلمان؟؟
الزاير چان يشرب چاي، من سمع كلامها إلا شوية ويختنگ لأن الچاي زرگ البلعومة والله ستر!!.
شلون؟؟ شلون؟؟ شگلتي بروح أبوچ؟؟.
- عليش متعجب..شني حسنية أم الهلال* أحسن مني لو حورية نخالة**؟؟.
ولچ هذني عدهن واسطة أحنة منين عدنا واسطتهن؟؟.
لا تفكر أمرتبة كلشي و كلاشي :
اولا: بدلت أسمي من عمشة الى أسم جديد .......!.
ثانيا: رتبت شهادة أعلى من نحو الأمية والأبتدائية ، سوللي شهادة خريجة معهد التكنلوجيا قسم الكهرباء!!.
وحگ العباس تخبلتي.. ولج شجاچ؟؟ يا كهرباء يا صخام ولچ أنتي ماتعرفين تحطين گلوب لو تبدلين بلاك كهرباء ، صار شهر جرس الباب عاطل ليش مابدلتي؟؟ والنوبة خريجة؟؟ ولچ بابة أسكتي لايسمعوج؟؟.
الزاير يحچي وعمشة أذن من طين وألأخرى من عجين مصرة على الدخول للبرلمان لابل متاكدة مية بالمية راح تفوز بأعلى الأصوات.
أجت أيام وراحت أيام وهناك (چروب) وعمشة عضوة بالبرلمان وجابت أكبر عدد من الأصوات!!.
يايابة يوم اعلان النتائج ..حفلة من هذا المعدل..توزيع البقلاوة والزلابيا و كليجة ام التمر بالكيلوات وقواطي الكولا والفانتا والعصائر بالمئات .. ومناك ضرب الچيلات أبفلس والأهل والجيران كله ملتمة والمزيقا أدگ والحبيبات كل وحدة لافة عبياتها على خصرها ويهزن هز من هذا التمام.
وعمشة گاعدة على كرسي والوادم ورها ياخذون صور ويطشون عليها الملبس ، خو الهلال ما تسولف .. يايابة شلون فرحة..؟؟.
-الف مبروك عيوني..انشاءالله وراها أنشوفچ وزيرة تجارة كودن تفتهمين شكو ماكو بالسوگ وحركة التجارة!!.
-لاء عيني لاء انشاءالله وزيرة كهرباء.. لعد شلون هي مو أختصاصها كهرباء؟؟.
-أني أگول لو تستلم وزارة الداخلية أحسن !!.
-شبيچن تخبلتن؟؟؟؟.. أصلا وزارة النفط لو المالية قالب عليها يا كهرباء و يا تجارة و يا داخلية؟؟
بيني وبينكم عمشة چانت تتمنى استلام حقيبة الصناعة.. كودن راح تصير كل المعامل جوة أيدها من ضمنها معمل البستك!!.
وصارت عضوة و عضوة فعالة، هي صحيح ماتحچي بالأجتماعات ولكن كان عدها أسلوب تعلمتها من خلال بيع البستك ،بس أتخنزر عالوزراء ، لذلك كانوا يرضوها ودگ كومشنات وواسطات حتى صارت تملك الملايين هذه عدى استيلائها على قصور وبساتين وغيرها وغيرها..
الواسطات من كل مكان.. الحرس بالباب وعمشة شايلة خشمها أموصيتهم :
ماكو مراجعة مواطنين كودن الأستاذة نايمة وتعبانة من أجتماعات المجلس ومالها خلگ تعالوا باچر!!.
خو زوجها الزاير ذب الدشداشة والعگال صار أفندي وفتح مكتب لأستقبال المواطنين وسماع شكاويهم والدفع بالدولار .. ماكو دينار عراقي!!.
يايابة شلون زمن (طاح حظچ يا أمريكا) شلون سلمتي بلد الحضارات بيد أم البستك وجماعتها؟؟.
عاشت الديمقراطية ، فعلا الشخص المناسب في المكان المناسب.. ياحكومة وبرلمان المنطقة الخضراء:
تسعيركم الشلغم اثلج صدورنا ..سيروا على بركة الله !!.
أودعناكم عيوني الى سالوفة أخرى بأذن الله
أخوكم
رئيس التحرير
---------------------------
*حسنية أم الهلالهل هم نفس قصة عمشة تقريبا ولقبها(أم الهلالهل) هذه كانت تهلهل ينسمع من بعد مئات الأمتار لذلك كانوا يطلبوها بالحفلات حتى تهلهل ومرات تنسى نفسها تاخذلها گشه وهي تتمايل وأكيد كانوا يدفعولها خوش مبلغ (بالأخص الشباب!) هذه عدى البخشيش!!.
** حورية نخالة: هذه كانت تشتغل عند تجار الحبوب والطحين تنخل الحبوب جنها ماكنة، اشتغلت بنفس السوك اللي كانت عمشة تبيع بيها بستك!!.
[ندعوك للتسجيل في المنتدى أو التعريف بنفسك لمعاينة هذه الصورة]
الرجوع الى أعلى الصفحة اذهب الى الأسفل
 
عمشة أم البستك عضو بالبرلمان .. صلوا عالنبي !! : جلال چرمگا
استعرض الموضوع السابق استعرض الموضوع التالي الرجوع الى أعلى الصفحة 
صفحة 1 من اصل 1

صلاحيات هذا المنتدى:لاتستطيع الرد على المواضيع في هذا المنتدى
البيت الآرامي العراقي :: الاخبار العامة والسياسية General and political news :: منتدى المنبر السياسي والحوار الهادئ والنقاش الجاد الحر Political platform & forum for dialogue & discussion-
انتقل الى: