[ندعوك للتسجيل في المنتدى أو التعريف بنفسك لمعاينة هذا الرابط]يابة هي هيتة... وفالتون... وفرهود سياسي...وولية مخانيث...وفزعة چلاب جوعانة....هاي هي حالتنا إللي دا نعيشها في العراق الغشيم والشعب العقيم...هيتة ما صايرة... توهان عبالك الكل مكبسلين وفوگ الكبسلة جايب بطل عرگ مستكي معتق (بس طبعاً بعد الفطور لأسباب شرعية وفقهية ودستورية) ... يعني شنو بعد هذا التيه مو حتى التيه اليهودي چان أربعين سنة وإحنا صار إلنا أكثر من خمسين سنة تايهين وقابلة للتجديد لخمسين سنة أخرى إلا في حالة الرغبة لتجديد لمائة سنة جاية (تنقري مية سنة...... راجع مقالنا السابق حصرا)... وفالتون... لأن كلها فالتة وداعتكم... إللي فالت عياره... لو إللي فالت ولائه... لو إللي فالت برة البلد لأمور عائلية أو وطنية أو لامور مصرفية... المهم فالت وخلاص... وأفلت ينفلت فالتونا فهو وزير في حكومة بورينا او مسعول بدرجة مدير عام وأنت صاعد في مصعد حكومي ...هذولة كلهم عدهم قابلية فلتان رهيبة عبالك لاستيكة مال چسوة حجي راضي من فلت وظل المسكين حاير شلون يلم نفسه ..يمعود إذا على لاستيكة چسوة ترى شغلة كلش هينة، بس فلتان البلد بكل مكان... يعني يا جوينت Joint تلزمه تشوفه معلعل وبيه فلتان... جوينت الدوائر الخدمية... هذا خو أبد لو تجيب بلايس وسيت إسباين ما تگدر تعدل الفلتان...لو جوينت الوزراء...من ألف نعلة عليهم...ما أعرف شنو دور وزير الداخلية إذا خلال شهر واحد يموت فوگ 450 عراقي بسبب التفجيرات وهو بعده جواد بتصريحاته وبعده عنده وجه يشوف نفسه بالمراية من يلبس الرباط مالته... يمعودين أكو وزراء داخلية أستقالوا لأن ماطور مال شرطة مرور داس على بطة چانت تعبر الشارع في إحدى الدول إللى تحترم حقوق البط... وأكيد مو الصين لأن الصينيون الوجبة الوطنية عدهم هي لحم البط في صلصة فول الصويا ! وإحنا تبولنا بجود التصريحات ....إللي تسبب تبول والتبرز....ومن هذا نعرف ليش هذا اللقب العنچوقي ! أما فرهود سياسي...فحالتنا حالة دكان صاحبه أخذوه الربع للإستشارة الفنية والهندسية في أمور تتعلق بسعر الطماطة وكيلو الشكر، وبعد ما رجع...فصار الدكان بلا صاحب...وتعالوا وشوفوا...شلون من تشتغل رحمة الله وي الناس إللي ما شايفة...يعني دكان بيه خيرات رب العالمين وبلا صاحب والناس جوعانة ... تماما منصب رئيس حكومة بيه خيرات من كل شي ... فلوس وراتب أعلى من راتب أوباما... خو اللغف....وخاصة من تنطي تراخيص شبكة الموبايلات لو تراخيص عقود نادي النفط لو تراخيص عقود شراء أجهزة الكشف عن الطرشي... فهاي بوحدها تخلي بورينا مچلب بأسنانه الحادة الصفراء بالكرسي بأعتبار الكرسي مفصل على مقاسه وإللي يريد كرسي آخر خلي يروح يشوف نجار لو خياط حتى يفصل كرسي على مرامه...وأكو فرق كلش هواية بين (على مقاسه) وبين (على مرامه) لأن المقاس مو على طول يجي وي المرام وإللي أفتهم شنو السالفة يرفع ذيله أو يرفع أصبعه... أما إللي يگدرون يرفعون غير شي بعد أخذ وجبة دسمة من الفياجرا... فممكن قبول رفع هذا الشي دون إحراج ولا مواربة( شلون كلمة خطيرة....مواربة)... أما ولية مخانيث....فمخانيث الطوبة الأرضية كلهم عدنا...يا مخنوث أو خنيث أو مخنث يريد يجرب خبراته إجا ويجي عدنا ويصير مجاهد...والله خايف ما راح نحصل من الحوريات بالجنة غير قطعة من ملابسها نتحسر عليها لأن أذا هيچ صرف وإقبال جنوني على الحوريات... ترى ما نحصل شي وخلينا راضين بقسمتنا وي أم الجهال في الدنيا والآخرة، وأكو نوع من المخانيث ما يريدون شوارعهم تصير بيها طسات في مدنهم الجميلة، وإحنا عدنا بلد مليان طسات من يوم دعاية مال شركة التأمين الوطنية ولحد هسة...يعني تبادل منفعة...هو يجي يفجر ويحصل على درزن حوريات قابلة للتجديد في حالة الإستهلاك المفرط، وإحنا تكثر عدنا الطسات....أما إللي يوگعون بالتفجيرات فهذولة لا قتلى ولا شهداء... هذولة كانوا في المكان الخطأ في الوقت الخطأ وي الحظ الخطأ... ومثل ما يگول ابو الطيب (مو المتنبي... أبو الطيب مالتنا سعد أبو الشرقية) يگول أن الجيش العراقي دخل المعركة في الوقت الخطأ والمكان الخطأ والتاريخ الخطأ وتحت القيادة الخاطئة... وهالمرة إذا أفتهمتوا شي...رفعوا الأصبع الوسطاني من إيدكم في إتجاه داخل اليد مع بقاء الأصابع الأخرى ممدودة في حركة حييييييييييييييييل مؤدبة ! وأكو نوع آخر من المخانيث چانوا زبالة مرمية في المدن والشوارع..وهسة في ولية المخانيث صاروا رؤساء أحزاب وكتل وتيارات وعدهم طيارات (ماكو فرق بين التيارات والطيارات في دولة مسعورستان مثل تماما كالنكتة الجديدة حين يسألون واحد مسعورستاني شنو الفرق بين الغيمة والسحابة...فيگول الغيمة بالسما...والسحابة رضوان الله عليهم... وآني خايف لا يكون كاكا جلو همين ما يفرق بين الموتى وبين الموطا أم العودة لأن هو يسميها (موتا) ! أما فزعة چلاب جوعانة....فإحنا من زمان صارت حياتنا حياة چلاب حاشا جماعة المنطقة الخضرة وحاشا الرفاق الأزلاميين في السنوات الغبرة والغابرة... يعني عدنا قابيلة نستقبل طلبات الإنتماء من أي چلب جربان ومسعور يريد يجينا ويأخذ راحته بالتچليب والسعار وينشر ميكروبات الجرب مالته وين گعد ووين ما گعد (ما يصر أگول وين گعد و وين گام لأن بس يگعدون بعد ما يگومون)... والچلب من يجوع ويشوف اكلة دسمة...هاي الله كاتبها... رزق وإجا لحد عنده... بعد ما يعوف المكان لو تمطر عليه السما الطير الأبابيل أو صواريخ السجيل . أما إحنا ...فبكيفكم وي يا جماعة تصيرون...تريدون تعيشون بتوهان فأنتو أحرار حتى لو ما أنتميتوا لكتلة الاحرار أو كتلة الأشرار فالفرق الطباعي لا يغني عن تطابق الفعل في الحالتين ، أو تريدون تعيشون فالتون...فهمين بكيفكم ولا أحد راح يشد اللاستيك مالتكم.... أما الفرهود... فهذا مو إلنا...لأن الفرهود إله ناسه ... يعني مو كل من باگ شي بالسوگ صار فرهودي... فالفرهود علم وفن وهندسة مثل الزوراء أيام زمانات من چان فلاح حسن شعره سرح! أما ولية مخانيث....فبكيفكم...بس هذا همين إله ناسه...ولازم تاخذون دورس خصوصية عد كبيرهم إللي ينتفض من يسمع جملة بيها صدگ ويتقنبر... فهذا كبير المخانيث ! أما مال تصيرون وي الچلاب الجوعانة...فإحنا من الچلب بس حياته وظروف معيشته...اما ما يأخذه الچلب الجوعان حتى لو بقايا وليمة دسمة...فها حلم ما زلنا نحلم بيه...وبالأشواق مستنيه.... حووووووو....حوووووووووووووو! [ندعوك للتسجيل في المنتدى أو التعريف بنفسك لمعاينة هذا الرابط]
من هنا 
من هنا 
من هنا 
السبت 4 سبتمبر 2010 - 2:27
