البيت الآرامي العراقي




البيت الآرامي العراقي

سياسي ِ ثقافي ِ أجتماعي


 
الرئيسيةالرئيسيةبحـثالتسجيلarakeyboardsyrkeyboardدخول

شاطر | 
 

  حبيب العربنجي : مستر هوبيب آرابنشي

استعرض الموضوع السابق استعرض الموضوع التالي اذهب الى الأسفل 
كاتب الموضوعرسالة
Dr.Hannani Maya
المشرف العام
المشرف العام



الدولة : العراق
الجنس : ذكر
عدد المساهمات : 37598
مزاجي : أحب المنتدى
تاريخ التسجيل : 21/09/2009
الابراج : الجوزاء
التوقيت :

مُساهمةموضوع: حبيب العربنجي : مستر هوبيب آرابنشي    الأحد 12 سبتمبر 2010, 11:29 pm


حبيب العربنجي : مستر هوبيب آرابنشي


12/09/2010



[ندعوك للتسجيل في المنتدى أو التعريف بنفسك لمعاينة هذه الصورة]رجاءاً رجاءاً أحترموا خصوصياتي مثل ما طلب واين روني من الصحافة الأنگليزية أن تحترم خصوصياته وخصوته، وما عليكم بيّ أختار (طريق الشعب) كأكثر الطرق رومانسية ثورية للخلاص تحت راية كارل ماركس أو أختار طريق (روحة بلا رجعة) كأكثر
الطرق غموضاً في تاريخ الضياع العراقي، ومن هسة آني يشرفني أصير مستر (هوبيب آرابنشي) الأمريكي...اللهم أجعله ساعة إجابة بلكن أدخل رعايا الولايات المتحدة الامريكية...وآصير أمريكي أفتخر ببريتني سبيرز بدال ما أفتخر بحمورابي إللي ما أعرف گرعة أبوه من وين...وأفتخر ببراد بيت بدال ما أفتخر بعادل الزوية رغم التشابه الكبير بيناتهم في الچهرة والوسامة والرشاقة والحضور الجماهيري ، فبراد بيت له حضور طاغ على السجادة الحمراء في مهرجانات أوسكار، وعادل الزوية له حضور طاغ في ركضة الطويريج وكارزيما في البنوك الحكومية والاهلية... وسبحان الذي سخر لنا هذا ... وما كنا بالغيب عالمين... ويخلق ما لا تعلمون... وعدولة الزوية ضمن ما لا نعلم أو نعلم بس مغلسين لأسباب آمنية وجلجلوتية وجاجيكية محمضة !
يشرفني أصير أمريكي...بعد ما سمعت أن حكومتنا المؤخرة راح تدفع 400 مليون دولار تعويض للأمريكيين إللي تضرروا (يا حرام) من النظام البعثي في حرب 1991... أي والله مو شقة... آني بكل شي أتشاقى بس من يوصل الموضوع يم الامريكيين ما أعرف شقة لأن أخاف ياخذون الشقة جديات وأدخل ضمن قائمة الأرهاب الدولي وجيب ليل وأخذ لائحة إتهام ويدخلوني ضمن مجموعة فيصل شاهزاد أو مجموعة الأعور ملا عمر.
والموضوع هو موافقة ححكومتنا المؤخرة (مثلها السيد خوش خيار) بدفع تعويضات أولية قيمتها وهريستها 400 مليون دولار للحكومة الامريكية (مثلها السفير الامريكي في بغداد مستر جيمس جيفري) لأن الأمريكيين خطية حبسهم قائد الحفرة الباسلة كدروع بشرية في حرب 1991 قبل ما يجي محمد علي كلاي ويطلعهم بعد جولة ملاكمة كانت بالتأكيد لصالحه وي أبو عدي الخايب مسعى وشعباً...ونتيجة !!
وآني أريد أسأل چم سؤال وماكو ولا ترك للضرورة الشعرية:
أولا: موضوع التعويضات أو الموافقة على دفعها لازم يتم بموافقة نواب الشعب أو البرلمان..إي ما تگولون يا برلمان وافق على دفع هذه التعويضات؟! لأن البرلمان السابق راح بالزبل والبرلمان الحالي في إجازة مفتوحة مكرمة من كاكا مأصوم او مأثوم وهي القراءة الصحيحة بحسب رواية ورش عن عاصم لأنه آثم وآثيم ومأثوم..يعني موافقة خوش خيار على دفع هذه التعويضات هي هبة ربانية غير شرعية.
ثانياً: من راح خوش خيار راح بإعتباره ممثل يا حكومة؟ لأن حكومة بورينا أنتهت صلاحياته الدستورية وصارت حكومة تصريف بالوعات المتنگة كلللللللللش بسبب الفساد الأخلاقي والاداري..يعني خوش خيار ما يمثل غير نفسه الامارة بالسوء تجاه العراق..يعني هذا اللاعب خارج التشكيلة الأساسية للحكومة...أصلاً ما عدنا حكومة والدليل صراع الواوية بين أبو حمزة الواوي وبورينا التفلة وعادل الزوية... خطية السفير الامريكي إنلعب عليه !
ثالثاً: ليش هو بس هذولة الأمريكان تضرروا من قيادة قائد الحفرة ؟ وين تعويضات حكومتنا المؤخرة للشعب العراقي إللي صبر عالضيم 13 سنة من الحصار؟ شنو كان التعويض ؟ كان التعويض إجانا أبو عيون الكحيلة جلال زغير ونصب سيطرات بكل بغداد يذبح ويسلخ، كان التعويض جماعة هيئة أغبياء المسلمين طلعوا إلنا بيانات الذبح من جامع النداء، كان التعويض عمر أكل لحم علي، كان التعويض عبدالحسين ذبح عثمان، كان التعويض شمعون إختفى بعد ما قبل دعوة جاره أبو محمد على الغداء، كان التعويض اكثر من مليون عراقي ماتوا (ما أگول أستشهدوا لأن راحوا بولة بشط والله ما يقبل شهادة واحد كله بول ونجاسة) ، ماتوا بغير سبب ولا راح نعرف السبب ولا نريد نعرف السبب فالسبب... السبب هواية اسباب بحسب الدعاية العراقية الخالدة لمعجون كربلاء !
شنو كان تعويض حكومة بورينا للشعب العراقي؟
سرقة 26 مليار دولار موثقة بحسب تصريح باقرنا المصولغ ورئيس قطاع الكهرباء، فباقرنا گال في تصريح (مقابلة تلفزيونية شفتها قبل ما تنگطع الكهرباء) قبل يمكن شهرين أن إجمالي المبالغ الحكومية إللي تم صرفها لإصلاح القطاع الكهربائي في عهد بورينا كان 28 مليار دولار أمريكي ابو النخلة والفوسفور من ميزانية الدولة ، وثلاثة مليارات معونات من الدول المانحة يعني كلها 31 مليار دولار أمريكي، وقبل أسبوع إجانا خبر من وزارة الكهرباء أن أجمالي ما تم صرفه على الكهرباء خلال الحقبة البورية الصولاغية المباركة كانت خمسة مليارات دولار... لعد 26 مليار دولار بجيب من صارن...يا بجيب باقرنا المصولغ (يعني إيران وهي الرواية المؤكدة) أو بجيب كريم صافته ووحيد زمانه اتلوزير الامبيري عالي الفولتية وعالي اللوتية إللي شلع بالدخل في تمثيلية الأستقالة المعروفة إللي لو ممثلها راسم الجميلي يمكن چنا نصدقها (وهي الرواية همين كلش صحيحة)! وبكيفكم تختارون اي من الروايتين بحسب الرغبة والنكهة والزاج والسلطنة العراقية على أنغام الچالغي البغدادي...وأبو يعگوب..چلچل عيّ الرمان...
شنو كان تعويض حكومتنا المؤخرة للشعب العراقي؟
سبعة أشهر بلا حكومة وصرنا مهزلة سياسية ونستحي نحچي بيها... يمعودين إجانا خبر من نيودلهي ان الهنود واگفين سرة بباب السفارة العراقية في الهند ويقدمون CV مالتهم لوظيفة رئيس وزراء العراق، أي لأن رئيس وزراء هو منصب وظيفي بالهند مو مثل حالتنا قاط تفصال يفصلوه على واحد من الذين رضى الله وإيران عنه وبعد ما يصير واحد ينزع القاط أو ينطيه بحسب مقولة بورينا ، وخطية الهنود على گد نياتهم عبالهم إحنا همين رئيس وزراء عدنا منصب وظيفي وسمعوا بالأخبار أن العراق ما بيه ريس وزراء فگالوا خوش فرصة خلي نقدم أوراقنا بلكن نشتغل هاي الوظيفة حتى لو بالعراق... آچا !!
شنو كان تعويض حكومتنا المؤخرة ؟
ليش هي هاي الحكومة گدرت تاخذ حقوق 15 عراقي (إي هذا نموذج جزء من المليون أو بحسب القياسات الهندسية p.p.m) إنقتلوا على يد بلاك ووتر في ساحة النسور ! أصلاً هي ما گدرت تمنعهم...بس الحق يقال علي أبو الدبغة چان كلش حاسم وحازم وياهم من طلع يهددهم وإيده بجيبه لأن كان مشغول يجعص خصاوينه من كان يصرح حتى يبين هو متأثر... ولمعلوماتكم هو كان متأثر من الوجع بخصوته. لو شنو سوت الحكومة حتى تاخذ تعويضات الرجال العراقيين إللي تم إغتصابهم (والله ما أدري أكتب إغتصابهن أو إغتصابهم لأن تاهت عليّ ما أعرف الرجولة وين وشلون تصير بالعراق العقيم)!
وبعد كل هاي الإنجازات الحكومية الرائعة لحكومتنا المؤخرة تجاه الشعب العراقي ...أخاف العالم يحسدوننا وآني نجمي كللللش خفيف وي الحسد، فأخاف يرگعوني بعين حارة او أنصاب بحسد وأروح بيها....اطلب طلب أخوي إنساني من صاحبنا الرفيق بركة بن حسين أبو عمامة المعروف دوليا بباراك أوباما ان يقبل توسلاتي بين يديه الناعميتين الطويلتين ويقبلني مواطناً أمريكيا حتى لو بجزر غوام، فآني أقبل أن يشملني تعويض عراقي مرة وحدة، احسن من أن أشوف كل يوم تعويض حكومي من حكومتنا المؤخرة إللي فسدتنا دلال ومكرمات حتى طلعت عين أبونا (إحنا عيونا هي رايحة رايحة من ورا الكهرباء عالي الفولتية).. وراح أصير أما المحاكم العراقية المواطن الامركيك حمال الجواز الامريكي (مو مهم يا حرف) مستر هوبيب آرابنشي...ليس لدينا فرع آخر لا بالچوادر...ولا بواشنطن دي سي.
[ندعوك للتسجيل في المنتدى أو التعريف بنفسك لمعاينة هذا الرابط]
الرجوع الى أعلى الصفحة اذهب الى الأسفل
 
حبيب العربنجي : مستر هوبيب آرابنشي
استعرض الموضوع السابق استعرض الموضوع التالي الرجوع الى أعلى الصفحة 
صفحة 1 من اصل 1

صلاحيات هذا المنتدى:لاتستطيع الرد على المواضيع في هذا المنتدى
البيت الآرامي العراقي :: الاخبار العامة والسياسية General and political news :: منتدى المنبر السياسي والحوار الهادئ والنقاش الجاد الحر Political platform & forum for dialogue & discussion-
انتقل الى: