البيت الآرامي العراقي




البيت الآرامي العراقي

سياسي -ثقافي-أجتماعي


 
الرئيسيةالرئيسيةبحـثالتسجيلarakeyboardchald keyboardدخول

شاطر | 
 

 شوف دكتور، أما تخلي بنتنا نسخة من هيفا وهبي أو تدفع مليار دينار وإلا..! جلال چرمگا

اذهب الى الأسفل 
كاتب الموضوعرسالة
Dr.Hannani Maya
المشرف العام
المشرف العام
avatar


الدولة : العراق
الجنس : ذكر
عدد المساهمات : 43222
مزاجي : أحب المنتدى
تاريخ التسجيل : 22/09/2009
الابراج : الجوزاء
التوقيت :

مُساهمةموضوع: شوف دكتور، أما تخلي بنتنا نسخة من هيفا وهبي أو تدفع مليار دينار وإلا..! جلال چرمگا    الثلاثاء 8 مايو 2018 - 9:22

شوف دكتور، أما تخلي بنتنا نسخة من هيفا وهبي أو تدفع مليار دينار وإلا..! جلال چرمگا




شوف دكتور، أما تخلي بنتنا نسخة من هيفا وهبي أو تدفع مليار دينار وإلا..!

جلال چرمگا



[ندعوك للتسجيل في المنتدى أو التعريف بنفسك لمعاينة هذه الصورة]

شوف دكتور ، أما تخلي بنتنا نسخة من هيفا وهبي أو تدفع مليار دينار وإلا..!
بين حين وأخر تصلني من أخواني وأخواتي القراء رسائل عبر بريدي الأكتروني.
قسم من هذه الرسائل بيها شكر و تشجيع للأستمرار بالكتابة والمشي بنفس النهج منذ اول حلقة من القلب للقلب، وقسم أخر بيها الغرايب العجايب في بلدنا الديمقراطي (كلش للوحة) بحيث بعضها تشيب الراس ويفقد صوابه وكأنه ضاربله ثلاثة أرباع عرگ هبهب أبو الكلبجة!!.
وبدوري أهتم بأرائهم وأرد عليهم فورا ، وحتى ما أخفيكم سر أفرح حينما أقرأ رسائلهم لكون متأكد كلها نابعة من قلب عراقي صافي يحب ناسه ووطنه.
رسالة المتني كلش بسبب الحالة الموجودة بوطننا بعد احتلالنا من قبل الشيطان الأكبر و الجمهورية الأسلامية!!.
كلشي تغير ، حتى الناس طبايعهم تغيرت الى حد بعد ماكو هذيچ العلاقة بين الجيران وصولا ً الى الأهل من أخوة وأخوات وحتى الوالدين!.
الحكومة ماكو الها هيبة بمعنى الكلمة لذلك لا نستغرب من أي شىء أو تصرف غريب أو نشاز وهذه يرادلها صفنة و تحليل و مشاورات و ما أعتقد راح نوصل الى نتيجة!.
خلونا ندخل صلب الموضوع ورسالة من أحدى الأخوات ( أ. ق) من بغداد و اللي كانت قريبة كلش من الموضوع واللي جرى بالتفصيل الممل!!.
تمشياً مع المودة ، أنتشرت مراكز وعيادات التجميل بكل انحاء العراق وخاصة بعاصمتنا الحبيبة بغداد.
بكل شارع وحتى الشوارع الفرعية نقرأ عشرات الأعلانات لمراكز و صالونات وعيادات التجميل واجراء العمليات!
بيك خير وتدلل شتريد يجرالك المهم تدفع كاش و أطلب واتمنى!!.
تصغير الخشم ،تكبير الصدر و ،تجميل العيون وشفط الدهون و تكبير الشفاه و تبييض! ..هواية أشياء مانگدر نذكرهن!!
احداهن راجعت عيادة من هالعيادات وطلبت أن تكبر ( مؤخرتها) بشكل مؤخرة المغنية اللبنانية هيفاء وهبي و مو مشكلة اذا كان بالأمكان مثل مريام فارس ، والف ياريت مثل الأمريكية كيم كارديشيان وأخواتها !!!.
أتفقت مع الدكتور واجرى الها اللازم وأخبرها بأن المسألة تحتاج كم يوم وراح تشوف الفرق ، ويمكن أحلى من مالة هيفا ومريام!! ، و أية ملاحظة ممكن تراجع العيادة وما يصير إلا الخير.
الأخت انتظرت أسبوع أشو ماكو نتيجة ، إلا وحدة صارت مثل ماتريد وألأخرى لم تستجيب ، نعني بالعربي الصريح مؤخرتها صارت (تك وتك) وحدة چبيرة وألأخرى ولا حركة !!... نعني خربت بمعنى الكلمة ، راحت تكحلها انوب عمتها!!.
زين وهذه شتخليلها وأطيب؟؟.
راجعت الدكتور ولكن ما حصلت على نتيجة تذكر، لذلك التجأت الى شيخ العشيرة و طلبت منه التدخل و لازم شباب العشيرة يراون الدكتور العين الحمرة وإلا شلون تظل هيجي بهالحالة؟؟.
تدخلت العشيرة وراحوا لعيادة الدكتور:
- عيوني دختور أنت خربت بنتنا ولذلك لازم تدفع الثمن!! لعد شلون يعني تخربها وعمامها ساكتين؟؟، لا يا أخوي يا الدختور فك عيونك ولا تتماطل!؟؟.
بدون مقدمات لازم تدفعلها نقداً ثلاث مليارات ومانقبل بالصكوك ، دينار ينطح دينار لأنه راح تسافر للخارج وهناك تتعالج ، وإلا انت تتحمل المسؤلية وترة شباب العشيرة واحدهم متحمس يملصون رگبتك!! هاا شگلت؟؟.
يعني شيريد يگول الدكتور والشباب ينتظرون منه كلام وواحدهم چنه گريندايزر لو رامبو والشر يتطاير من عيونهم ؟؟؟.
وبدا الفصل العشائري بين عشيرة المتضررة (التك و تك) وعشيرة الدكتور وبالأخير توصلوا الى نتيجة أن يدفع الدكتور عشر ملاين دينار وأمره لله وكان الله يحب المحسنين!!.
قبل ما تنتهي الجلسة أفتى احد شيوخ عشيرة الدكتور بما يشبه التمييز أو الأستئناف بالمحكمة وبعد ما فتل شواربه وگال:
- اخوان ، بنتكم بس فردة من فرداتها خربت الفردة الثانية مثل الورد !!،إذاً لازم ندفع نص المبلغ!!.
كلامه كان بمثابة قنبلة للجميع ، الكل ساكته كودن كلامه منطقي و مايقبل نقاش!!.
ودي وجيب ونقاش من الطرفين ، وبالنهاية صفت بثلاث ملايين دينار وأنتهت الجلسة!!.
لكن الأخت ظلت تعاني من (التك وتك) وما أظن الها چارة حتى بالخارج!!.
يعني من تمشي چنها سيارة وتاير من تايرتها الخلفية بنچر وأكيد تتخيلون المنظر!!، حتى بطلت تلبس بناطيل لأن الشغلة ما تنظم وهذيچ هي!!والمصيبة الكبرى گاموا يلقبوها بالمنطقة بأم التك وتك!!.
وأنا أگول:
بربكم يا أخوان هذه الحالة وحالات شاذة بالمئات اللي داتصير وتحدث بالعراق أكو منه بكل أنحاء العالم!!.
وحق حمزة أبو حزامين حتى بجزيرة واق واق هم ماكو منها ، كودن هناك أكيد هم أكو حكومة محاكم و قضاة وشرطة وداخلية و نقابة اطباء و عدلية وأنصاف والأهم هيبة للحكومة ووجودها!!.
أخوان ترة هذه الأفعال المخجلة سببها أنه ماكو دولة وإلأ عاليش حاطين وزارة العدل ومحاكم ومحامين وقضاة ودور عدالة و رقابة صحية و متابعة!!؟؟.
يعني من توصل الحالة الى هذا الحد من الأفضل ان يغلقون المحاكم وكل عشيرة تفتح دكان و يعلگون عليها ميزان العدالة و يحكمون مثل مايريدون نعني على راحتهم ، حتى حكم قرقوش راح يكون أرحم ، بعد عليش وزارة العدل ومكافحة الأجرام و الأمور الأخرى!!.
والله واحدنا صاير مثل بلاع الموس أن حچيت زردومك راح والماحچيت يعني شلون أتظل هيچي؟؟؟.
ما أعرف أضحك لو أبچي لو أشگ هدومي؟؟
المهم في أمان الله الى (تك و تك أخر)عذرا حلقة أخرى و الله يوفق الجميع.
ملاحظة مهمة:عشائر العراق المحترمة ترفض رفض بات هذه الحالات أطلاقاً ولكن هؤلاء برزوا بعد مجىء الأخ ومهجة القلب المستر بريمر (الله يسود وجهه دنيا وأخرة)..نعني هذوله عشاير يمة گرصتني العگربة بكيفهم يصولون ويجولون دون حساب و محاسبة وعددهم بالعشرات !!.
أخوكم
رئيس التحرير


[ندعوك للتسجيل في المنتدى أو التعريف بنفسك لمعاينة هذه الصورة]



[ندعوك للتسجيل في المنتدى أو التعريف بنفسك لمعاينة هذه الصورة]
الرجوع الى أعلى الصفحة اذهب الى الأسفل
 
شوف دكتور، أما تخلي بنتنا نسخة من هيفا وهبي أو تدفع مليار دينار وإلا..! جلال چرمگا
الرجوع الى أعلى الصفحة 
صفحة 1 من اصل 1

صلاحيات هذا المنتدى:لاتستطيع الرد على المواضيع في هذا المنتدى
البيت الآرامي العراقي :: الاخبار العامة والسياسية General and political news :: منتدى المنبر السياسي والحوار الهادئ والنقاش الجاد الحر Political platform & forum for dialogue & discussion-
انتقل الى: