حبيب العربنجي :موسوعة بوريس

حبيب العربنجي :موسوعة بوريس

30/09/2010

من وصايا الرفيق القائد المقندل قائد قوات الغشمة:
" قبل ما تشگ لازم تتأكد ما حد يعرف يخيّط غيرك...ولا تشگ إذا تعرف تخيّط"
...............
الهند العظيمة دايخة ...لأن تريد صفحات كاملة مخصصة إلها في موسوعة گينيس للأرقام القياسية ...
وهسة أكو معاهد بالهند تدرب الأطفال على تعلم مهارات خاصة أو كلاوات خاصة حتى ياخذون بيها ارقام قياسية ويقبضون چم ألف دولار من مؤسسة گينيس...يعني أكو طفل هندي حافظ له كل ارقام التلفونات الأرضية بالهند !!...وأكو طفلة هندية تعرف كل أنواع البهارات الهندية إللي تستخدم بالعنبة!! وأكو طفل هندي يعرف كل آغاني وأفلام أميتاب باباتشان حتى مال بعد عشرين سنة من هسة.
أما الصين المقتدرة...فعدهم واحد عبقري يگدر يعرف الصيني إذا تخليه بين مليون إنكليزي... شلون ما أعرف... ولحد هاي اللحظة دا يسوون إختبارات على دماغه العبقري حتى يشوفون شنو هاي الفلتة الدماغية عد هذا الصيني... يوم إلنا إن شاء الله ..

وإحنا بالعراق العقيم و الشعب الغشيم جادين بموضوع الأرقام القياسية لأن نريد نقيس تخلف العالم وين وإحنا وين صاعدين وبعدنا صاعدين بقدرة دفع الضرطة... وماكو أي شي يگدر يوگف زحفنا المبين المبارك...إي ليش نسيتوا إحنا سجلونا من الزواحف النادرة بعد يوم الزحف الكبير ؟ ... ومن هذاك اليوم ولحد هسة وإحنا نزحف حتى صرنا نزحف على بطوننا الخاوية في عهد البواري رضوان إيران عليهم أجمعين وتفووووووووووو الشعب على چهراتهم مجتمعين لا متفارقين حتى نتفلها مرة وحدة ونفضها. والعراقي الغيور على سمعة وطنه المتخلف صاعد بقطار (أو قل الريل ولا تقل القطار) ودا يحطم الأرقام القياسية الموجودة على السچة الإنسانية، والريل العراقي من يوم ما حمد لطم على السچة من شم ريحة الهيل وحتى هاي اللحظة المباركة من تاريخ شعبنا التعيس وبورينا القفيص مستمر في زحفه (هاي أول مرة أدري القطار من الزواحف) لتحقيق أهداف بوارينا في الوحشة و...الحرقة....و...الإشتراطية الإيرانية إللي لازم نطبق الشروط الواجب تطبيقها والصادرة من قم قم إيران من إختيار نعلاننا وحتى رؤساء وزاراتنا....يعني بركة إيران والأئمة ظاهرة كلللللللش كللللللللش علينا ومدا نلحگ...

من رقم قياسي إلى آخر في ظرف نص ساعة... وخطية گوگول ما ملحگ في تسجيل هاي الأرقام في شبكة الانترنت وجماعة گينيس دايخين ويصيحون أويلاااخ وما يدرون كلها من بركات الأئمة والمعممين والمطربشين ومن سار في أثرهم ....فمن لا إمام له في هذا الوقت الخشن من التاريخ الإنساني... ما يگدر يسجل ولا رقم قياسي (لعد الهند شلون... منو إمامهم....يجوز الرفيق كومار أبن كومار).. وهسة أكو مفاوضات سرية مباشرة طگ بطگ بين موسوعة گينيس للأرقام القياسية وحكومة العراق ويمثلنا في هذه المفاوضات علي أبو الدبغة صاحب الگذلة الدهينة وهادي العافطي القاتل المتسلسل علمود يشوف حل لهذا الإشكال السياسي والإنساني لأن بسبب الزخم في الإنجار الحضاري في العراق أكو هواية أرقام دا تروح بولة بشط وما حد دا يسجلها، وأكو إقتراح أممي من الرفيق بوكيمون ترعاه منظمة اليونسكو بفتح معهد تابع لموسوعة گينيس (حتى إهنا تابعين...أعوذ بالله من غضب الرفيق بايدن) ومهمة هذا المعهد هي تخريج كوادر عراقية أو إيرانية متخصصة في تسجيل الأرقام القياسية (أيباااااخ العراقيين إشگد يحبون كلمة الكادر من مساح القنادر في باب الشرجي وحتى الرفيق نوري المرادي).

وصرنا مثل اليابانيين....شلون هم هسة كلش ضايجين لأن ما بقى شي محتاج تطور عدهم....وإحنا بالعراق ما ظل شي يعتب علينا وما عدنا بيه رقم قياسي...بس آخر أرقامنا القياسية صدگ رقم يستحق الإشادة ، وهالمرة هم الأكراد الكرد الكورد ما نطونا مجال وأخذوا الرقم إلهم طابو مثل كرسي مال كاكا جلــــّو وكرسي مال خوش خيار للماخور الدولي، وهذا الرقم هالمرة إجا من واحد ختيار ولا چنا نتوقع عنده هاي الإمكانيات والطموح للدخول في موسوعة الأرقام القياسية، بس كل البلا بالختيار، إجانا الرفيق عسمان مأسوم وسجل رقم قياسي معجزة ولا أحد راح يگدر يفكر في تحطيم هذا الرقم، أطول جلسة برلمانية في العالم من غير ما النواب يلتقوا غير تسع دقايق، وفصل تشريعي كامل بدون أي جلسة رسمية للبرلمان، بس الرواتب ماشية بحسب الأصول وغير الأصول، والله كاكا ئوسمان يستحق بوسة، يعني مو كل مرة نبوس الواوا، خلونا هالمرة نبوس ئوسمان، وخاصة إحنا الواوا مالتنا يطلع بأماكن .. الواحد تعلب نفسه من يبوسها، وين عدنا حظ، لو چان عدنا حظ چان هسة نبوس الواوا وي هيفا !!
بشرف دستوركم أبو النعل مال الرفيق حجي همام، هذا الرقم منو يگدر يسوي مثله !! هذا الرقم راح يظل مسجل بأسم العراق العقيم كوثيقة من وثائق الإنجاز الحضاري الديمقراطي للأحزاب الموجودة بالعراق...أحزاب الولائم الحزبية .

وهم زين الشعب حس بهذا الرقم القياسي وگام يحتفل وي قيادته الحكيمة بهذا الإنجاز إللي أخرس الأعداء وفگس عيون الحاسدين، حتى طلع واحد مخبوص من الفرحة وما يعرف شلون يحتفل لو يشكر القيادة الحكيمة وعلى رأسها الرفيق المناضل بوري أبو اللزگة، وأحسن طريقة لگاها للتعبير عن شكره للقيادة هي بتوجيه نداء أخوي من قناة العربية إلى كل العراقيين.... ياباة أشوية على كيفكم ...قللوا مشاكلكم أشوية...ترى ما معقولة النواب إللي أنتخبتوهم نطوكم ربع ساعة من عمرهم المليء بالمشاغل، ربع ساعة لمناقشة مشاكلكم يللي ما تستحون... أدري ليش هذولة النواب ما عدهم شغل وعمل...ما عدهم عوائل شريفة....ما عدهم سفرات لخارج العراق....وفوگ كل هذا الضيم ما بخلوا عليكم بربع ساعة حتى يناقشوا مشاكلكم... عيوني أنتو (وهذا جزء من النداء الإنساني أنقله عن هذا المواطن الغيور) أشوية أشوية... قللوها المشاكل وخلوها مال سبع دقايق...حتى النواب يصير عدهم وكت كافي لأمور أخرى مهمة، يعني إذا بكل ستة أشهر يخصصون ربع ساعة لمشاكلكم...أي ما تگولون هذا العمر شلون راح ينگضي....وطبعا هذا همين رقم قياسي سوبر....ما أظن أحد في كل الطوبة الأرضية من يوم قانون عمنا حمورابي وحتى هذه اللحظة المباركة واللحظات القادمة والأيام والسنوات اللاحقة راح يگدر يكسر هذا الرقم الإعجازي....

وبعدين في نهاية ندائه...أعتذر هذا المواطن عن تقصير الشعب تجاه حكومته المؤخرة... ونقل شكر جميع العراقيين لحكومة بورينا ولنوامنا النائمين والضاربين الكبنك على كل شي....وشكرهم كلللللللش كلللللللش على إهتمامهم ببرنامج تأهيل العاطلين...بس كل شي لازم بيه خطأ غير مقصود، وهالمرة حكومتنا المؤخرة نست وهي مشغولة جدا ، نست إدراج أسم هذا المواطن وإسم أبن عمه في تخصيص سيارتين إلهم حتى يشغلوها تاكسي ويشوّفون الإنجازات العمرانية والتطور الحضاري في بغداد للسياح الأجانب إللي يجون من بنغلادش... طبعا التاكسي مو حتى يشتغلون عليه سواق لأن الحكومة ما مقصرة ودا تنطي رواتب ومخصصات للعاطلين خير وزيادة وخليها السويد تطگ من القهر....والله راحوا بيها جماعة السويد !
أما الأرقام القياسية إللي هي بالطريق إليكم أيها العراقيون السهاري فهي:
1- أضخم رئيس دولة....وراح نسميه ضخامة الرئيس بدال فخامة الرئيس
2- الصمغ الأكثر مقاومة للشد والشلع...مسجل بأسم بورينا...من إنتاج الطويريج
3- الكذبة الاكثر صدقا (هاي شلون ما أدري) مسجله بأسم التيار المموي إللي صار إلهم سبعة أشهر خابصينا ما راح يستخدمون الإسبانة الإيرانية في تضبيط البوري...وتالي شدوا البوري على الكرسي بإستخدام إسبانة 13 ساخت إيران
أما الرقم الأكثر صمودا على مدى الدهر ويتيمة الدهر...فهو مسجل بإسم الشعب العراقي...الشعب الأكثر سكوتاً عن هذا الخريط الإنساني في عراق بلاد الراقــــــدين وما بين الحـــــــاقدَين....إيران وسوريا....وهاي الأرقام كلها راح تجي في الطبعة الأولى من كتاب الأرقام القياسية العراقية.....موسوعة بـــــــــوريـــــــس !

habibarabenchi@yahoo.com