اكلاوات يابنگ المركزي : ميسون نعيم الرومي

اكلاوات يابنگ المركزي

ميسون نعيم الرومي

اكلاوات يابنگ المركزي*

انعالات نوبه اونشتري
وانوبه هاليـوم النـَـبگ
والثوم ما نـِـنـْـسـَـه أبد
والعسل أكلي او(مطگي)-
مليارات الآف اوتنسرق
كيفي.. يـالنايـبـَه..أوهـَـلهي
اكلاوات يابنگ المركزي
***
كوشـَت ايران اعله العراق
ماضل صناعه اولا حصاد
فـَـضلات مـنهم نـشــتـري
ذبـْحـَـوا ولدنـَه هالرعـاع
اعمامه اوافندي هالضباع
قضاء اونزاهه اومـُـدَّعي
موبوء يا بنگ المركزي
***
عـدنـَه مـَـزارع بالدول
سريلانكا اوفيتنام..اوبعد
-(تمن) (اوچاي) او لبلبي
عمت عين الحكيم اومالكي
اجـيـوب الأبـَـد ما تنملي
شـَـعـَبـْـنـَه بـيـهـم مـبـتـلي
تـبـيع بـيـنـَه اوتـشـتـري!
ليوين يا بنگ المركزي؟
***
تريليونات الهه امعدده
والنفط نصه اتصدره
كردستان..ادخيلچ صدقه
شـَـعـبچ مـِثـلنـَه مبـتـلي
بالبطن كافي اتچفصي
لستقلال اخذي وارحلي
-(فـَرْگـَس) گـَلبـْـنـَه والنبي
مبروك يا بنگ المركزي
سـِـتـْر اوغـِـطه للسرسري
اكلاوات يابنگ المركزي
موبـوء يا بنگ المركزي
-------------------------
* https://www.youtube.com/watch?v=xJuazCNUj98

-(فـَرْگـَس) هناك مثل في جنوب العراق سمعته كثيرا وهو :-

*فلان او هذا العمل (ايفرگس الگلب)
والفرگاس هو الكيس المائي الذي يحدث
عند احتراق الجلد بالنار او بالماء الساخن.
-----------------------
ســتوكهولم
3/ آيار/2020