البيت الآرامي العراقي




البيت الآرامي العراقي

سياسي ِ ثقافي ِ أجتماعي


 
الرئيسيةالرئيسيةبحـثالتسجيلarakeyboardsyrkeyboardدخول

شاطر | 
 

  حبيب العربنجي :درزن عراقي بالباكيت.... منو بحاله

استعرض الموضوع السابق استعرض الموضوع التالي اذهب الى الأسفل 
كاتب الموضوعرسالة
البيت الارامي العراقي
الادارة
الادارة



الدولة : المانيا
الجنس : ذكر
عدد المساهمات : 9446
تاريخ التسجيل : 07/10/2009
التوقيت :

مُساهمةموضوع: حبيب العربنجي :درزن عراقي بالباكيت.... منو بحاله    الثلاثاء 07 ديسمبر 2010, 1:48 am


حبيب العربنجي :درزن عراقي بالباكيت.... منو بحاله


06/12/2010




[ندعوك للتسجيل في المنتدى أو التعريف بنفسك لمعاينة هذه الصورة]أدري العراقي أرخص من البلاش...وأكو أماكن إذا وي كل درزن عراقي تنطيهم درزن قنادر راح ياخذون القنادر ويرجعون العراقي لأن القندرة أغلى من العراقي ...هاي كلها ادري بيها، و چنت أگول تصفى...بس الظاهر شغلتنا أبد ما تصفى لأن الشغلة هي بالأساس معجونة بماي خابط غير صافي !
ألاف العراقيين ماتوا...وإنگبروا هذا إذا عدهم بخت...وصاروا وجبة قوزي عالرصيف للچلاب هذا إذا ما مكتوب إلهم بخت عالگصة وطبعا نسبة تسعة وتسعين بالمائة من العراقيين من المجموعة الثانية لأن هم يحبون الچلاب وكتبوا وصية من يموتون خلوا الچلاب تاكل اللشة والجماعة الخيرين ما قصروا لان العمل بالوصية واجب شرعي ..فطبقوا الوصية وخلوا الچلاب سعيدة في وطن صار لا يصلح إلا لعيشة الچلاب...إذا چلاب حقيقية تگول عوووووووووو...أو إذا چلاب بشرية بحسب دستور الرفيق حجي همام...هذولة العراقيين حتى بموتهم ما گدروا يسوون شي لأن أشو الحكومة المؤخرة ساكتة عن موتهم ، أصلاً يوم إللي ما ينقتل عراقي بالشوارع تگوم الحكومة تدز إيميل تستفسر عن صحة الرفيق عزرائيل وليش ما زارنا اليوم في رسالة عنوانها (عسى المانع أن يكون خيراً) ! وطبعاً الرفيق عزرائيل يرد على الرسالة بزيارة ميدانية في اليوم التالي وياخذ حق اليوم إللي غاب بيه وحق عگب باچر دون إغفال حق اليوم ! وهذولة العراقيين لازم يموتون حتى تتأكد حكومتنا المؤخرة من التجربة، لعد شلون تگدر الحكومة تعرف التجربة الصحيحة من التجربة الغلط ! غير العراق كله مختبر للتجارب...حتى جورج بوش من راد يجرب خبرته وعلمه وذكاءه ما لگى أحسن من المختبر العراقي يجرب كل أسلحته وأفكاره ونتاجات المخابرات المركزية الاميركية، والله لو الحكومة تريد تشغل هذا المختبر راح تجيب منه فلوس أكثر من النفط...والعراقي يحب العلم ولا يگول آخ راسي من شغلة تصير بيها خدمة للعلم تحت شعار العلم للجميع إللي رفعه المرحوم كامل الدباغ، ولا راح يعترض تجربون براسه شتريدون خدمة للصالح الخاص مو العام...والخاص الله يدري منو ! بس العام أني أدري منو !
وآني أعرف بحسب النظريات الإقتصادية أن البضاعة تكون بأسعار متقاربة إذا تشابه الموقع الجغرافي والأيدي العاملة في صناعة هاي البضاعة، يعني العراقي لازم سعره مقارب وي الإيراني خاصة إذا العراقي والإيراني يلطمون بنفس المناسبات اللطمية وثنينهم يقدسون العمامة السودا أكثر من ألوان العلم...بس طلعت النظريات الإقتصادية كلها حچي جرايد وشعارات ديمقراطية مثل الإنتخابات وهوسات تاجر النعلان...يعني ماكو هيچ بطة تلعب شناو بحسب المثل العراقي إللي مدوخ العام ،شنو علاقة البطة بالرياضة ! أو الچلاق بجدر الدولمة..لأن حكومتنا المؤخرة القذرة إنخبصت خبيصة أم العروسة بليلة العرس (خاصة إذا العروسة چانت قطة تلعب بذيلها) من الإنفجار الأخير ببغداد تسبب في مقتل سبعة من الزوار الإيرانيين المقدسين...اللهم علينا ولا بالإيرانيين يا رب العالمين...وطلع القاضي الفاضي وائل عبداللغيف (من كثر اللغف) يطالب وزارة الداخلية بإستيراد معدات متطورة للكشف عن المجرمين لحماية الثروة الإيرانية والدم الإيراني الغالي والنفيس من الجريان في العراق التعيس ..والظاهر أخونا الفاضي وائل ما سمع بقصة أجهزة الكشف عن الطرشي إللي جابها الجواد الكريم أبو مصطفى وقاسم المو...سوي للكشف عن الطرشي في شوارع بغداد...وسعر هذا الجهاز بحسب الوثائق العراقية هو أربيعن ألف دولار ، وسعره بلندن هو فقط أربعين جنيه استرليني ، لان الانگليز ما يحبون الطرشي وماكو خطر طرشي في مترو لندن مو مثل حالتنا نتريع طرشي ومحمضين بالوعود و من هذا السعر عدهم أرخص. وهسة إكتشف القاضي الفاضي وائل أن عنده لسان فأستخدم لسانه بعد ما انقتلوا الزوار الإيرانيين لو اخاف الفاضي وائل يريد يبني له مشتمل ويعلگ عليه راية سودا بلكن الإيرانيين يجون زيارة وخاصة إحنا راح ندخل المواسم اللطمية والزيارات المليونية....خطية ما عنده حظ بالبزنس اللطمي...لعد خلي يبيع هريسة بالقيمة أحسن !
لا وشوفوا الثاني...عباس السباتي إللي هو في سبات ونعيم مجلس النوام والنائمات...هذا العبيس طلع بصوته إللي هو مصنف من أنواع العذاب في جهنم...طلع العبيس يطالب الحكومة (ما حدد يا حكومة علماً أن هو قيادي في الحكومة الماضية والحكومة الجاية يعني چان يگدر يطالب الحكومة من چبعة وچبعين مو هسة) ...إي يطالب الحكومة بتفعيل دور الإستخبارات في معرفة خطط الأرهاب قبل قيامهم بالتفجيرات ومعرفة شاي الحصة من شاي أحمد والوزة !! لعد وين راح قاسم الفازالين إللي يضحي بأربعميت عراقي حتى يتبع خطوط الجريمة للوصول إلى الإرهابيين بحسب كلام قاسم عطاء من إيران وبركات من الحوزة ! مو أگوللكم إحنا نحب العلم والتضحية في سبيل العلم...مو إحنا أرواحنا سبيل ياهو يريد خلي يجي ويلعب بينا طوبة وجقلمبة ! عراقي سبيل...عراقي سبيل للإنسانية إللي عايشة برفاه وسعادة...مثل ما ضحى بينا جورج بوش حتى أميركا تظل تعيش بسعادة وسلام وتالي يطلع في مقابلة وي أوبرا وينفري ويگول كل إللي صار بالعراق چان غلط لأن المعلومات كانت كلها خاطئة ..وگال بوش " بس آني كلما أتذكر أربعة ألاف أمريكي إنقتلوا بالعراق ما أگدر أمنع دمعتي" يا عيني !! حنين والله العظيم حنين على شعبه...خلوا جماعتنا يتعلمون الحنية من أبو الحنية إللي دمر بلد وشرد شعب وقتل ما يقارب مليون عراقي وما ندمان لأن شعبه دا يعيشون بأمان ، ومقهور علمود اربعة الاف أمريكي انقتلوا بالعراق....يابة شفتوا فرد يوم طلع أي مسؤول عراقي گال أنه هو مقهور علمود الشعب العراقي !! ولا واحد...ولاااااااااااااااااااااا وااااااااااااااااااااااااااااااحد لان القهر حرام في شريعة وفقه المنطقة الخضراء !
وهسة جاي يفتحون خط مباشر بين الهند ودولة مسعورستان حتى العمال الهنود ما يتبهذلون بالمطارات ويجون دايركت لأربيل أو حتى الخدامات البنغاليات يحافظن على كرامتهن وما تنهان كرامة البنغالية بالمطارات...والله يستر إذا فرد يوم واحد هندي جاي لبغداد ومات بالغلط بتفجير في بغداد ..لأن الهندي سعره كلش عال عد الحكومة الهندية لأن لحمه كله هيل وزعفران وبهارات برياني....مو مثل اللحم العراقي رخيص وأرخص من البلاش لأن العراق ما ياكل الأعشاب إللي تطلع في حقول المنطقة الخضراء...واللحم العراقي صار خايس من كثر أكل الهوا ...يمعودين هم رحمة ورحمان لأن إذا إجا صيني لبغداد في زيارة عمل بإعتبارنا أكبر سوق لتصريف المنتجات الصينية ...وهناك راح بالزلگ بتفجير إرهابي...صدگ راح تصير مصيبة لأن راح نحتار إلمن ندفع التعويض لأن كل وحدة صينية راح تكول هذاك چان وليدي وحجتها في هذا الإدعاء أن الضحية دا يشبهها كلش...وما نگدر نگول لا ! وعلى الخير والبركة على الخير...وإحنا في طريق الخير بس يمكن السيارة بنچرت....في إنتظار مرور تاتا بلكن نصعد بيها !


[ندعوك للتسجيل في المنتدى أو التعريف بنفسك لمعاينة هذا الرابط]

الرجوع الى أعلى الصفحة اذهب الى الأسفل
 
حبيب العربنجي :درزن عراقي بالباكيت.... منو بحاله
استعرض الموضوع السابق استعرض الموضوع التالي الرجوع الى أعلى الصفحة 
صفحة 1 من اصل 1

صلاحيات هذا المنتدى:لاتستطيع الرد على المواضيع في هذا المنتدى
البيت الآرامي العراقي :: الاخبار العامة والسياسية General and political news :: منتدى المنبر السياسي والحوار الهادئ والنقاش الجاد الحر Political platform & forum for dialogue & discussion-
انتقل الى: