زلفه امن المسچ عِـطرَه ـ جدايل باسَت ازلوفه

گـام الجـَرح ينـزف بيك ـ عِـندك خيط واتـْـروفـه ؟
ون شِفتـَـه يتـَعـّب بيك ـ وذا صاح الجـَرح عوفه
بـِـسْمـَـك صاح كل الليل ـ باوع ليه ، بس شوفـَـه
ليش اشمالك اتلچمـَـه ـ عوفه ازرعت بي خوفه
شوفه الدم نضح يضحك ـ بيدك حِـنـّه واتـْـدوفه
ماأدري ضعِـت ياحـيـف ـ ماي اوتـاه بـِجـْـروفه
شال اهوايْ منك ضيـم ـ تِعـبـَت بادَت اچـتـوفـَـه
قاسي اشگـد صعب گـلبك ـ دومه امشرّعـه اسيوفه
سيـفـك حِـطـّه بگليبي وشرعـَـه
يـَدمي صار جـرفانـَـك وشـرعـَه
والله اوهيي والماري وشـَرعـَـه
سـيفـك من يشـِج كًـلبي هـَـديـّـه
مثل گـطن الننِدفه انطلعّه ابصيف ـ روحي دوم بيدك ويلي مندوفـَه
******
أحلى الناس كل الناس ـ سولف ، صِـرنه سالوفه
نـَـسمَه انت وشِمـَـنـَّـك ـ إنت ابـْـروحي مَعـْـزوفه
روح ابعـِد : يگـول النوّب ـ هـِيد اوبسْ ولك )سوفه)
هيعونه اليشمـّـك دوم ـ يـحـَنـّي ابعِـطرك اچفوفه
تضم گـلبك سبع ضمـّات ـ أسْـطي اعليه ماحوفه
(عـَمـْلـَه( اللي يخون اهواه ـ عِـمـَـلهه عَملتِ الكوفه
مـَعروفـك يظِـل حبـّـك ـ مِنهو اليـنسـَـه مَـعـروفه
حبيبي اوبالقساوه اشكثر معروف
أروح ادعي الأيـّمه اوشيخ معروف
فـَرِد نـَظره ولك واحْسبهه معروف
(زدقـَـه( اتصير واتصدّق عـليّ
غـَـمهه الرّوح من تِـسمع ـ إسمك تظِـل ملهوفـه
غـَمّـه الگلب من يسمع ـ اسمك ، تنمحي احروفه
******
تنزف كل جروح اعضاي ـ من تكتب حروف اسمك
نسمه اتغازل العِـشـاگ ـ تِـشـبـَع بوس واتحِـضنك
مـَـنـْذور آنـَه لِـعـْـيـونـَـك ـ أوفـي بـِـالـْـدمِـع نِــذرك
ولـِز اخدودي بخـدودك ـ تـفوج اوتِغـرگ ابدمعـَـك
(ميل الكحل( غار اوفـَـر ـ خايف من رمش كِـحلك
ماأگـدَر دخـيلـك بـَس ـ تِـذوب الروح من هـَجـْـرك
گـلبي ماخـُـمَـد ناره ولـَـك ثار
ماهو زيـن من يعـْـشكً ولك ثار
بعض الناس تتمـنـّه ولك ثار ) الأكثر )
يـِـخافونك يـَبو اخـْـدود الـْـضويّـه
كافِـي اتـمـَرعِِـد الدلاّل ـ سِـجـَـنـْـتـَـه والسِجِـن گـلبك
خـَـليـّـني أعِـد اسْـنـيـن ـ أموتـَـن واحـْتِـيي ابـذكـْرك

******
ليلو اوتِـنـَعـثـَـر حـَـلگـك الـْبيه ـ هيعونه الذي امن الشفـّه لـَمـّـك
والـْشامَـه تِـضـَوّي چنهه فانوس ـ والظلمه تِـضـَوّي ابنار خدك
أگـْـرب منّ اريد اعـْـدِل بـِلـِـزلوف ـ تگًليّ ليش بسـّـك هذا حـَدّك
ياگيمر عـسل بالرّيج معسول ـ ريجـَـك من عـسَـل يالعسل كلـّـك
ياون (الفخاتي) ابـگـيظ الِهموم ـ تغرّد بالـگلب لو طِـلـَع حِـسـّـك
تِـتـْـغاوَه ابغـنـَج تتبـاهـَـه كل ساع ـ هجـرك لِـليحبـّـك طعـُم گـلبك
ياطبعـَـك غـَـدر يتسلـّه بالمَـلچوم ـ يــِفـُـطمَه اعله الهَجـِـر صـَدّك
تِـگدر عَ الـْظـلم للناس بـِهْـداي ـ تِـذكـّـر قِـدرة الله اعـليك ، ربـّـك
هاك اجروح گـلبي اوشلهه بهداي
تِـلچمهه اوشكتلك ، ليش؟ بـهداي
اسلام اومسيح ايهود بهـْـداي) بيه داي : صبه )
دِنيه .. اتصير من هجرك دنِـيـّـه
تعوفه امن السهر يتــْگًلـْوَط ابـنار ـ گـلبي اوللخـَـلـَگ ياناس سالوفه
أطوي قصتي ويـّـاك أنه اوروح ـ سوّي اكتاب قصـّتي اوحِـطـّه بـرفـوفه
زلفه امن المِـسـِچ وامعـَطـّـر افــّـيـش ـ أندار اعـْلـَه اسمك واشبگ احروفه
زلـْـفـَـه امْن الـْمِـسِـچ عِـطرَه ـ جـِـدايـِـل باسَـت ازلـُـوفـَـه
گــام الـْجـَـرح يـِـنـْـزف بـيك ـ عِـنـْـدك خـيـط واتـْـروفـَــه ؟

منقول