البيت الآرامي العراقي




البيت الآرامي العراقي

سياسي ِ ثقافي ِ أجتماعي


 
الرئيسيةالرئيسيةبحـثالتسجيلarakeyboardsyrkeyboardدخول

شاطر | 
 

  حبيب العربنجي .هاي..إجاني مسج يخبل

استعرض الموضوع السابق استعرض الموضوع التالي اذهب الى الأسفل 
كاتب الموضوعرسالة
البيت الارامي العراقي
الادارة
الادارة



الدولة : المانيا
الجنس : ذكر
عدد المساهمات : 9469
تاريخ التسجيل : 07/10/2009
التوقيت :

مُساهمةموضوع: حبيب العربنجي .هاي..إجاني مسج يخبل    الجمعة 07 يناير 2011, 5:31 am


حبيب العربنجي .هاي..إجاني مسج يخبل


06/01/2011




[ندعوك للتسجيل في المنتدى أو التعريف بنفسك لمعاينة هذه الصورة]محمد البوعزيزي..شاب تونسي حرگ نفسه قبل شهر ومات أول البارحة لأن الاطباء ما گدروا يعالجون الحروق البليغة في جسمه ولا الجروح الموجودة في روحه وعجزه عن العيش بكرامة في تونس الخضراء! رغم أنه خريج جامعة بس ما لگى شغل غير يجيب
عربانة مخضر ويبيع طماطة وخيار (ماكو منع بتونس في الخلط بين الطماطة و الخيار ).
وهذا المسكين چان دا يبيع وإجوا الشرطة التونسية وكسروا له العربانة مالته لأن ما عنده رخصة بيع ولا العربانة تحمل ترخيص من البلدية ولا هو عنده خبرة في معرفة الخيار التعروزي من الخيار العادي ...ولأن هو ما تحمل يشوف عربانته دا تدمر گدام عينه وهو مدا يگدر يسوي شي...حرگ روحه والعالم إلتموا عليه وعرفوا شنو الموضوع...وخلال ساعتين المدينة إنگلبت بالإحتجاجات، وخلال يومين تونس الهادئة الوديعة مثل لطيفة التونسية صارت نار ومظاهرات لأن الخريجين العاطلين عن العمل يريدون شغل ويريدون ياكلون حتى لو بعربانة ما مرخصة.
هالشي حصل في بلد يعيش تحت نظام شمولي وبوليسي ورئيس مدى الحياة .
زين وإحنا بلدنا بلد ديمقراطي فيدرالي بالدهن الحر، ليش الخريجين العاطلين ساكتين ؟ آني ما أريدهم يحرگون نفسهم لان هو الوطن محروگ النوب نجي نحرگ گلب الوالدة على أبنها لو بنتها، لا مو هذا قصدي، بس ليش الشباب كلهم مشغولين بالموبايلات والمسجات ! يعني حاولت أتذكر إسم أي شاب أو شابة عراقية (خارج التيار المموي المناضل بالصدور العامرة بالإيمان) ما گدرت أتذكر اي أسم لشاب / شابة عراقي تميز خلال سبع سنوات في أي موقف، لا بموقف إنساني ولا حضاري ولا حتىب موقف باص تاتا ، أما المقاومة المشروعة وشبابها فخارج هذا الحصر لأسباب وطنية ونتفهم موقفهم في عدم إعلان أسمائهم. بس إللي يهمني إهنا، إن الحياة مو بس مقاومة، الحياة بناء وحضارة ومدنية ، إي ليش ماكو ولا إسم خلال سبع سنوات نگدر نفتخر بيه ونگول هذا الشاب/الشابة عراقي/عراقية خريج جامعة عراقية، ويعيش تحت الإحتلال، وكبر ايام الحصار، وإجى للدنيا أيام حرب إيران، وشوفوا شلون عنده مساهمة حضارية في بلده اللطام، وعنده مشروع فكري ضد الجهل والتخلف المعشش جوا العمائم والعبايات والطرابيش والدشاديش القصيرة ؟ شنو جامعاتنا بس لقضاء الوكت لو شنو الموضوع؟ خلال سبع سنوات أي قناة عراقية (كلهم شباب) ما گدرت تنافس أي قناة عربية أخرى رغم أن قنواتنا العراقية تعمل في جو ديمقراطي بحسب الدستور لو أخاف دستورنا كلاوات وآني ما أدري...العفو عيوني يجوز آني غشيم بأمور الديمقراطية المستوردة وخبرتي على گد ديمقراطية إختيار القناة لأن الريموت (او الريمونت) لا بإيدي ولا بإيد أم الجهال...لا الريموت/الريمونت فوگ التلفزيون حتى لا تصير محاصصة خاصة في أيام رمضان من تطالب بيه أم الجهال حتى تشوف غادة عبدالرازق وطبعاً آني مسوي فضل عليها من أقبل...والحقيقة هي آني اللي أريد أشوف غادة مو أم الجهال ...أو من أريد أتابع مباراة بين نادي العفج ونادي البيشمرگة وهي مبارة تنافس المباراة بين ريال مدريد وبرشلونة خاصة اللعبة الاخيرة إللي طلعوا جماعة الريال بس حچي من شالوا 5 أهداف مقابل صفر .
شبابنا حايرين بمسجات القلوب الولهانة واكبر ثقافتهم لو قرايتهم هو كتاب أجمل 1000 مسج في فالنتاين...ولعلمكم ترى هالسنة ماكو فالنتاين لتعارض الحب وي الديمقراطية العمائمية المغمسة بالهريسة...ولأن حرام يدخل سهم كيوبيد بالگلب ...بس مو حرام ينزل الساطور اللطمي على الراس...ولو آني أعرف أن كل الدم حرام...بدءاً من دم الحيض وإنتهاءاً بدم اللطم. شبابنا گعدوا بالبيوت من صار الإختلاط ممنوع بالمدارس والمعاهد...شبابنا يعرفون كل موديلات الموبايلات ولا يعرفون منو فاز بجائزة نوبل للفيزياء، وشاباتنا يحفظن أسماء كل المسلسلات ولا يعرفن منو فاز بجائزة نوبل للسلام آخر عشرين سنة، هذولة شباب الوطن الديمقراطي الفيدرالي إللي يحرسه 42 وزير...عبالك شعب قندرة ولازم قياس 42 حتى نگعد وزن لو الوطن يمشي عدل ..هم زين وطننا مو عملاق مثل ما قشمرونا الازلام لأن بهاي الحالة چنا نحتاج إلى قندرة - أقصد وزارة – حجم 56 وزير حتى نمشي عدل.
شبابنا الله بالخير عليكم...صح الكآبة صاعدة للضالين بس ترى مال واحدكم يگعد ويبچي بوجه الله...ترى حتى الله ما راح يباوع عليكم...يعني ليش ما يباوع بوجه إنجيلا جولي المشرقة ويباوع على چهرة عراقي كئيب وفوگاه دا يلطم ويبچي ؟ ، لو عراقية لابسة چادر وتساهم مساهمة فعالة في معرفة تفاصيل مسلسل جواهر او نور ومهند ؟ ...لو حتى إذا كلش ..نرجع ذكرياتنا ونستذكر تفاصيل قصة الحب بين ساري العبدالله وريما. وصح إدري بيكم دا تدرسون في أفشل الجامعات العالمية بحسب لائحة شنغهاي لتصنيف الجماعات العالمية لأن من بين 500 جامعة ماكو غير ثلاث جامعات عربية ...وحدة بمصر وثنتين بالسعودية، وطبعا مو عبالكم تسلسل هاي الجامعات الثلاث متقدمة....لا يمعودين السعودية محتفلة لأن جامتعها بالمرتبة بعد رقم 400 ضمن الجامعات العالمية، بس إحنا لو نظل على هيچي شباب وطلاب وطالبات ترى لا بلائحة شنغهاي ولا بلائحة چيمي خاي الإيرانية ما رح نلگى مكان، ولعلمكم دولة العمائم الإيرانية في المرتبة الثامنة عالميا في هندسة نانوميتر الفائقة الدقة...لعد إحنا شبينا أشو العمايم مالتنا خياسة وقذارة...كل شي بخت حتى العمامة !
تحية لروح محمد البوعزيزي إللي حرگ روحه وحرگ الشارع بتونس...بلكن أشوية من ريحة الحرگ توصل يمنا وشبابنا تلعب نفسهم ويعرفون أكو واحد حرگ روحه علمود عربانته...وهم گاعدين دا يتفرجون على وطن محروگ محترگ وعيونهم عالموبايل بلكن مسج من الحبيبة، أو صورة بالبلوتوث.
[ندعوك للتسجيل في المنتدى أو التعريف بنفسك لمعاينة هذا الرابط]
الرجوع الى أعلى الصفحة اذهب الى الأسفل
 
حبيب العربنجي .هاي..إجاني مسج يخبل
استعرض الموضوع السابق استعرض الموضوع التالي الرجوع الى أعلى الصفحة 
صفحة 1 من اصل 1

صلاحيات هذا المنتدى:لاتستطيع الرد على المواضيع في هذا المنتدى
البيت الآرامي العراقي :: الاخبار العامة والسياسية General and political news :: منتدى المنبر السياسي والحوار الهادئ والنقاش الجاد الحر Political platform & forum for dialogue & discussion-
انتقل الى: