البيت الآرامي العراقي




البيت الآرامي العراقي

سياسي ِ ثقافي ِ أجتماعي


 
الرئيسيةالرئيسيةبحـثالتسجيلarakeyboardsyrkeyboardدخول

شاطر | 
 

  كلام في كلام : حبيب العربنجي

استعرض الموضوع السابق استعرض الموضوع التالي اذهب الى الأسفل 
كاتب الموضوعرسالة
Dr.Hannani Maya
المشرف العام
المشرف العام



الدولة : العراق
الجنس : ذكر
عدد المساهمات : 37598
مزاجي : أحب المنتدى
تاريخ التسجيل : 21/09/2009
الابراج : الجوزاء
التوقيت :

مُساهمةموضوع: كلام في كلام : حبيب العربنجي    الإثنين 10 يناير 2011, 12:20 am


كلام في كلام :حبيب العربنجي


09/01/2011




[ندعوك للتسجيل في المنتدى أو التعريف بنفسك لمعاينة هذه الصورة]أول إشارة إلى اللواگة واللواتة السياسية عد المسلمين، هي يوم فتح مكة...من سأل قائد الجمع المؤمن (الأصلي مو مثل مال الأزلام) الرسول محمد وهو مزهو بنصره، سأل قريش : ما ترون آني فاعل بكم ؟

فكان جواب اللوتية من أهل مكة من قريش : أخ كريم...وإبن أخ كريم !!!
وهم نفسهم چانوا قبل ساعة من فتح مكة لا يعرفون أخ كريم ولا مصطفى كريم...وكلهم عنجهية ...أيباااااااااخ على العنجهية صار لي عشرين سنة أدور بكل كتب التراث والقاموس وقناة ديسكفري وأنيمال بلانت بلكن أعرف شنو أصل العنجهية...تالي ضاع العمر ...ولا عرفت شنو تعني العنجهية...مثلما ضاع نصف العمر وي الأزلام ويوم إللي عرفنا معنى الأزلام...كل واحد بيهم صار في عاصمة...يضحكون علينا بعد أن شالوا شواربهم حتى لا تهتز وتفضحهم.
يعني اللواگة ماركة مسجلة مثل البيبسي في الفكر الإسلامي من قبل والفكر الأسلاموي هسة بإعتبار أن إللي دا نشوفه مو إسلامي بل هو إسلاموي (خوش كليشة)...والفرق واسع بين المفهومين كالفرق في الطعم بين الطماطة المشوية ومعجون الطماطة. فاللواگة واللواتة طبع إسلاموي عد كل من لبس عمامة وطربوش وزيــّن العانة ونتف الإبط وحلق الشارب وأطلق اللحى...والنوب طالعين بمودة جديدة هي مودة الساكسوكة...لأن يقال أن ساسوكي كان مربوع الجسم...مدور البطن...له ساكسوكة...ومن هذا سمي بساسوكي...وإللي شوفتوه في التلفزيون أيام من چان التلفزيون بس قناتين إنما هي صورة ساسوكي من چان بعده زغيرون وجامبو الجبار مستگعده.
المهم بلا فلسفة الرفاق والأزلام والمؤتمرات الوطنية...بس إللي دا اشوفه هالأيام خلاصة 1400 سنة من اللواگة واللواتة الإسلاموية...حبيبي ومولاي مكتشف التيار المموي دا يتعامل ويانا بلواتة ...يعني اللواتة إللي تعلمها أثناء دراسته الإجبارية هسة لازم يطبقها كجزء من متطلبات نيل شهادة الدكتوراه في اللواتة الإسلاموية...يگص ويلزگ بالتفلة...يعني هو من باب (باب المراد) يريد مواقع سيادية بالحكومة...ومن باب (باب الدروازة) يريد ثورة عمائمية ضد الإحتلال...عملاً بمبدأ " لا تعرف يمينك ما تنفق شمالك" ..يعني الحكومة حلوة خضرة نضرة حين تقبل بكل خيرها...وهي حليفة الشيطان الأكبر (ليش هو كم شيطان أكو ؟؟؟؟) من يصير الكلام عد المبادىء والسطوح والعموم والخصوص والخاص المراد به العام والعام المراد به الخاص كما في تأويل كثير من آيات القرآن بما تتناسب أهوائهم....لأن أخونا مولانا وحبيبي وسيم آل ممة وهيبة عمامتهم..إللي گال عنه مذيع إحدى القنوات الفضائية أنه " فقمة ذات رائحة كريهة" ..يلعب ويانا لعبة الختيلة بأبهى صور اللواگة واللواتة الإسلاموية، مثل ما دا يلعب كبير رأس الحكومة ولوتيها الأول بوري كامل المواصفات الإيرانية...دا يلعب لعبة اللواتة...بس ترى العراقيين ملوا من هاي الألعاب... اصلاً هسة الصين جاي تفتح معامل لتصنيع اللواتة بإشراف خبراء عراقيين في فن ترويج اللواتة وخاصة اللواتة الإسلاموية...شوفوا هذا البوري...الإغتيالات واصلة للضالين وهو يطلع وي أبو جاموسة كبير الزريبة العربية لصاحبها وزارة الخارجية المصرية...يطلع بوري وي أبو جاموسة ويگول " الأمن مستتب" تماما مثل ذاك المسكين بداية تصدير الديمقراطية الملونة من أميركا إلى العراق،طلع واحد من أربيل وگال " والله كاكا الأمن مستبد" وربما چانت لحظة تجلي ونبؤءة من غير نبي...لأن هسة صدگ صار الامن مستبد وظالم. لأن بورينا رضوان إيران عليه گاعد في الحديقة الخضراء مالته وي الوجوه الحسنة وما يعرف إللي جاي يصير ببغداد...ويطالب بورينا بعدم مشاهدة العراق من شاشات التلفزيون...ولك صخام صخمك ...لعد من وين نشوف العراق من حلگ علي ابو الدبغة لو بچذبات قاسم المو.....سوي...العفو اللواء أبو الجل والشامبو...إللي تأكد لدينا أنه يقرأ ويشاهد مقالاتنا والدليل أنه قال " أكو ناس يگولون أن أجهزة كشف المتفجرات هي أجهزة لكشف الطرشي" وهو تماما ما كتبناه في مقالة من زمن دقناغوس عن " أجهزة كشف الطرشي". المهم بورينا چان يطير أفيالة ومن هذا أبو جاموسة كل ساعة چان يباوع للسقف لأن إحتمال الإفيالة توگع عليه. هاي همين من تراكم الخزين اللواتة الإسلاموية عد بورينا....عدم قول ما في القلب والشارع والحقيقة! والإيمان بما موجود في الحديقة...أقصد المنطقة الخضراء مولاي !
واللواتة واللواگة الإسلاموية موجودة عد عبدالقبور السر من رآني...صاحب الإبتسامة الخبيثة...والله العظيم وين أكو واحد معمم لو لابس طربوش ويبتسم من يحچي أگول أكيد هذا واحد لوتي يؤمن باللواتة الإسلاموية...وهو رجس فاجتنبوه وكذلك هيئة سخفاء المسلمين...رجس من عمل الشيطان...وبما أن أميركا هي الشيطان الاكبر...فهيئة سخفاء المسلمين رجس من عمل أميركا فأجتنبوه...ذلك خير لكم إن كنتم تؤمنون بالدستور وتكفرون بالديمقراطية !!!ههههههه آني هم صابني فيروس اللواتة...هو منو جاب الدستور غير الديمقراطية المستوردة...هاي الديمقراطية إللي سوت واحد عنده شهادة في نتف العانة صار براسنا خبير دستوري أبو البروانة...الحجي همام ...رضوان الرفاق عليه...ومن تبعهم باللواگة إلى يوم الإنتخابات...يوم يفرح المؤمنون بالديمقراطية الملونة...اللهم إجعلنا من الفرحين...بس دقيقة... الله يگول بالقرآن " إن الله لا يحب الفرحين" في قصة قارون...يعني شلون..إذا نفرح بالديمقراطية مالتنا نصير ضد الحكم القرآني...وإذا ما نفرح بالديمقراطية المستوردة نصير ضد إرادة الدستور وإرادة بورينا وإرادة إيران وحجي همام وحجي أوباما...وأحسن شي حتى لا نزعــــّـــل الله ونمشي على حكمه القرآني ولا نزعــــل أحباب الديمقراطية أحباب القائد (والقائد هنا ضمير مستتر تقديره هو ماكو غيره)...راح نصير مثل الأسلامويين..ليش إحنا شبينا...همين راح نرفع شعار اللواتة واللواگة الإسلاموية...نفرح بالديمقراطية المستوردة...ونطالب برحيل الأمريكان على رأي قايد الجيش المموي...ولك صخام...هو إنت چنت تسوى شي قبل 2003...قبل مجىء الاميركان ...والله لو چنت تلف العمامة عشرين متر ما حد چان ينتبه لك...
يمعودين فرحوا بالديمقراطية...ونددوا بإللي جاب الديمقراطية....ورحم الله عمامة عرف حجم لفتها...ورحم الله وطناً...أضاع إتجاه بوصلته في محراب مليء بالنفاق...كل يصلي صلاة هو كاتبها...وكل له قبلة هو بانيها ومصممها (آني أريد زهاء حديد تصمم لي القبلة مالتي)...وكل له نبي يكفر الأنبياء غيره. ...وكل العالم لهم وطن يلمهم ساعة الشدة.. بس إحنا ندور بعيون عمياء عن شي يلمنا ساعات الشدة...وكل أوقاتنا ساعة شدة ...فمن نصف قرن نقرأ كتاب الأسى...ولا زلنا في الصفحة الاولى..
[ندعوك للتسجيل في المنتدى أو التعريف بنفسك لمعاينة هذا الرابط]

الرجوع الى أعلى الصفحة اذهب الى الأسفل
 
كلام في كلام : حبيب العربنجي
استعرض الموضوع السابق استعرض الموضوع التالي الرجوع الى أعلى الصفحة 
صفحة 1 من اصل 1

صلاحيات هذا المنتدى:لاتستطيع الرد على المواضيع في هذا المنتدى
البيت الآرامي العراقي :: الاخبار العامة والسياسية General and political news :: منتدى المنبر السياسي والحوار الهادئ والنقاش الجاد الحر Political platform & forum for dialogue & discussion-
انتقل الى: