خوش حچي يابة !! كتابات : حبيب العربنجي

خوش حچي يابة !!

كتابات - حبيب العربنجي

ما عليّ من كأس أسيا ولا لي بالرياضة غير الدومينو وأحيانا بالمناسبات أشوية رياضة عنيفة من ألعب الطاولي. بس اتابع اخبار الطوبة لأن إحنا أساساً عايشين على الطوبة الأرضية ولازم نعرف شلون تفتر أو شلون واحد يگدر يجيب گول على الطوبة الأرضية.

ووصلتني الاخبار مال خسارة الفريق العراقي وي الفريق الإيراني، أگول وصلتني الاخبار لأن الكهرباء ما تحب الرياضة مثلي، وأبو المولدة ينافس ضخامة جلو طنطل بكرشه، يعني رياضي تشريب . أجتني الاخبار أن اللعبة چانت حلوة و (حربية) بين الجيشين، ولو آني چنت أتوقع أن الإتحاد الأسيوي للطوبة راح يعترض على مشاركة فريقين من نفس الدولة وتحت علمين مختلفين، وچان على الفريق العراقي الإنسحاب من اللعبة لان العين ما تعلى على الحاجب في دولة الفافون مال بوري كامل المواصفات الإيرانية – ساخت إيران .

المهم...جماعتنا ما عدهم رؤية ولا يعرفون يتصرفون...لعبوا وي إيران وخسروا...ليش مقهورين...يمعودين خسرنا الوطن وي إيران وما حد إنقهر...بس الشي المهم بالموضوع هو تصريح اللاعب الإيراني (مسعود شجاعي) في المؤتمر الصحفي بعد اللعبة من گال للصحفيين " إيران فازت باللعبة لأن الفريق الإيراني لعب بكل الحقد إللي شايله الشعب الإيراني واللاعبون الإيرانيون على العراق " . زين والحكومة وينها من هذا التصريح! لو وزارة الخارجية عن القانون العراقي لصاحبها خوش خيار وينه.. صح صح...نسيت مو هو خطية حاير يداوم بالقاط والرباط الصبح في مكتبه في ديوان الوزارة الخارجة عن القانون والمسا يداوم بالتنورة في وزارة النسوان لأن هو وزير أي سي /دي سي يجوز يُعامل معاملة الذكر والانثى في قسمة الغرماء وتوزيع حصص الوزارات.

هذا التصريح طلع بنفس اليوم مال إجتماع أبو حمزة الواوي وي إللي يفر العراق فر...دونائي فر...المندوب السامي الإيراني والحاكم الفعلي للعراق ممثلاً للتاج الفارسي...وصاحبنا الواوي إللي إنضرب بوري گاعد وي دونائي فر يغربلون القضية العراقية أخاف أكو شي بالمنخل فات عليهم...خلي نرگع المنخل حتى نلم كل زغيرة وچبيرة بالعراق وننطيها لامنا الحنونة إيران، لا والهدية مال الإجتماع چانت أربعة إيرانيين معتقلين بالعراق (عن طريق الخطأ وداعتكم) ....أربعة يا ظلام...صدگ ما تخافون من امريكا...يعني غير چذبة مضبوطة...يمعودين لو تنزلون من قمة جبل هلكرت شمالاً إلى أقصى الفاو جنوبا...ومن أقصى خانقين شرقاً إلى أقصى عكاشات غربا ما راح تلگون غير إيراني واحد بالعراق وهو دونائي فر...شلون دبرتوا أربعة غيره...والنوب تعتقلوهم !!!اكيد حسيتوا بغلطتكم..وشوفتوا هذولة مو إيرانيين وطلعتوهم من (السجن)...اللهم أبعدنا عن الجهل والجاهلين . أخاف يجي يوم يعتقلونا إحنا همين وعبالهم إيرانيين لأن صار ماكو فرق لا بالشكل ولا باللكنة أو اللغة ولا باللطم بين العراقي والإيراني.

وكل يوم دا تطلع (مادة إعلانية) على قناة فضائية عراقية...ويطلع بيها الشهيد آمر الفوج الاول لطوارىء الموصل...ويگول " رحنا لمنطقة ربيعة وإكتشفنا مخزن كبير للأسلحة...وإللي هي محلية الصنع وإيرانية "...هاي المادة الإعلانية دا تطلع كل يوم ...إي ما حد من وزارة خوش خيار طلع بيان ضد إيران...لو إستدعاء للسفير الإيراني للإحتجاج مو لاكل الفسنجون مثل ما حالة أبو حمزة الواوي أو لتقديم صفحة جديدة مليئة بوعود الولاء بلكن إيران توافق عليه في الإنتخابات الجاية ولو صاحبنا بوري گالها بالثلاثة: ما ننطيها...ما ننطيها...ما ننطيها....عبالك دا يشجع فريق الزوارء في الدوري ويسمع تشجيعات المتفرجين..على عناد قدوري مشجع الشرطة.

وإذا كان (مسعود شجاعي) شجاع لحد الوقاحة وصريح لحد الألم في قوله ...فإحنا بالعراق تعيسين حد الصدمة، ولا مبالين حد الإستسلام مثل الطلي للذبح...وأحترم جدا (مسعود شجاعي) لأن هو نقل إحساس كل إيراني تجاه العراق حتى هو گال شلون ننسى حرب ثمان سنوات وي العراق...يعني واحد يحمل قضية وفكر ويتكلم بلسان الناس إللي يحبهم وهم الشعب الإيراني...وهذا من حقه وما نگدر ننكر هذا الحق عليه وخاصة من نتذكر لقطات صور من المعركة وصوت أديب ناصر، او من نسمع (الله أكبر) بصوت (مقداد مراد) الله يرحمه. ولكن إللي مو حق هو تعامل حكومة تعيس التعساء في دولة الفافون وي إيران...كهرباء المنطقة الخضراء من إيران...والبنزين المحسن من إيران...ونعلاننا من إيران لأن تاجر النعلان ماكو إللي چان يجيب إلنا أرخص النعلان...لراسنا ورجلينا....ومشاريعنا كلها من إيران، من المشاريع التنموية حتى المشاريع اللطمية...وحتى أئمتنا صاروا ساخت إيران...وحتى الله بالخير ومع السلامة صارن (خدا حافيز)!

خلي يطلع لاعب عراقي...ومو مهم يونس محمود أو هوار الملا محمد...أو علاء عبدالزهرة (بحسب المحاصصة والمناقصة) حتى لا حد يزعل...خلي يطلع أي واحد بيهم ويگول إحنا ما لعبنا زين وي إيران لأن ما ردنا نلزمهم من يروحون للگول حتى لا تتنجس إيدينا من القذارة الإيرانية...وخليناهم يجيبون گول علينا ولا نتوسخ بالقذارة....خلي يطلعون ويگولون هالحچي...والله ثاني يوم الحكومة العراقية راح تسقط الجنسية العراقية عنهم...والحكومة راح تقدم إعتذارات وتوسلات....وحتى تعلن استعدادها لنقل الحسين و أبو الحسين من العراق إلى إيران على حساب الحكومة العراقية ...بس لا تزعل علينا إيران.

وهذا هو الفرق بيناتنا...هم عدهم واحد (شجاعي) واحنا نخاف نحچي.

و...خدا حافيز

إضغط هنا لتقرأ تصريح اللاعب الإيراني الشجاع.

http://www.alarabiya.net/articles/2011/01/12/133251.html