البيت الآرامي العراقي




البيت الآرامي العراقي

سياسي ِ ثقافي ِ أجتماعي


 
الرئيسيةالرئيسيةبحـثالتسجيلarakeyboardsyrkeyboardدخول

شاطر | 
 

  حبيب العربنجي . الشعب عاوز كده

استعرض الموضوع السابق استعرض الموضوع التالي اذهب الى الأسفل 
كاتب الموضوعرسالة
البيت الارامي العراقي
الادارة
الادارة



الدولة : المانيا
الجنس : ذكر
عدد المساهمات : 9516
تاريخ التسجيل : 07/10/2009
التوقيت :

مُساهمةموضوع: حبيب العربنجي . الشعب عاوز كده   الأحد 13 فبراير 2011, 11:46 pm


حبيب العربنجي . الشعب عاوز كده


13/02/2011




[ندعوك للتسجيل في المنتدى أو التعريف بنفسك لمعاينة هذه الصورة]كل شي بوكته حلو....السخافة بوكتها حلوة...والمسرحيات التافهة بوكتها تخرب ضحك...والدولمة ما يصير ناكلها عالريگ لأن مو وكتها..حتى الإنتخابات بوكتها حلوة...وإذا تجي مو بوكتها تصير بس حفلة بوگ فلوس من
بطولة الحيدري فرجلللو ومعاونته الحليوة حمدوة (مرفوعة وعلامة رفعها الرجلين).
وافلام أحمد عدوية چانت حلوة وهو يحضن كتلة لحمية أسمها هياتم إللي چانت تثمل بمؤخرتها وتيارها الصدري...أفلام چنا بوكتها وإحنا راجعين مسموطين من الحجابات چنا نشوف هاي الأفلام قمة في الإثارة والتمثيل وچنا نشوف أحمد عدوية يعادل ألف ألان ديلون حلاوة وألف ريتشارد گير وسامة وألف جاك نيكلسون تمثيلاً وعبقرية ، وچنا نشوف فريدة سيف نصر تعادل عشرة ألاف ميريل ستريب مال هالوكت...كل شي بوكته حلو! وچان أي ممثل بعد ما يمثل فلم سخيف ويشبع بوس ونوم بحضن هاي لو ذيج...يطلع بالتلفزيون ويگول " الگمهور عاوز كده " حتى إن رائد السخافة في المسرح العراقي مقداد مسلم گال نفس الحچاية بعد سلسلة من المسرحيات التافهة إللي چانت عبارة عن تصفيط نكات بايخة من وزن " كل هالرشاقة وما تتشاقى" و " لا تدوخ بيتكم نثر لو ملبوخ" طلع وگال نفس الجملة باللهجة الصعيدية.
والشعب المخدوع في بلاد ما بين العهرين عباله بعده عايش بذيچ الفترة الوردية وإللي يريده يصير من باب " هو عاوز كده" فراح وأنتخب...تالي إكتشف أن الزمن غير زمن...وإن برنامج ما يطلبه الجمهور راح ...لأن هسة أكو مشاهد واحد...ماكو غيره....إيران ...سلوات ربي...سلوااااات... (يجب أن يقرأ بمقام السيگاه الإيراني حتى ننال القبول والرضا بباب الجنة لأن رضوان ما يفهم غير اللكنة الفارسية – بوري )...يمعودين مو دا نگول كل شي بوكته...حتى أحمد عدوية گطعوا البتاع مالته وصار يتحسر على ايام هياتم وخلص وكته ...يعني عدوية مال هالوكت بوخة بلا بتاع...ولا سلطان.....وعلى كوبري العباس..مالي ومال الناس...
وإللي دا نشوفه ونسمعه هالأيام هي بداية أفلام (الشعب عاوز كده) ولأن الدراما العراقية في آخر السرة بين الدرامات العربية، فأعتقد راح نشوف كل الأفلام والمسرحيات من مصر وتونس والمغرب والجزائر واليمن وحتى من السينما السودانية إللي تنافس تمثيل مورگان فريمان (أكو شبه بين فريمان وعمر البشير مووووو)، يللا نتجرأ نسوي فلم من إنتاج عراقي وتأليف عراقي...لأن إحنا طول عمرنا نحب الطبخة الهادية على نار هادية...وحتى الچاي العراقي مشهور بسمعته الطيبة إللي مثل سمعة سعاد تاكسي بين الناس بسبب تخديره على النار الهادئة، بس حظنا... كل مرة يجي هوا طياري ويطفي النار الهادئة مالتنا...ونرجع نشعل وننفخ من جديد...وهاي هي دورة حياة العراقي البائس الحاير المخدوع من المهد إلى اللحد...هذا إذا چان عنده بخت وما صار طشاري...واللشة توزعت سبيل في أرصفة الأسواق...وبحلوگ الچلاب صدقة على روح الديمقراطية !
إيوه....هسة وكت أفلام (الشعب عاوز كده) بس المشكلة إحنا ما عدنا سينمات حتى نتفرج ونتعلم...سينماتنا صارت باركات للسيارات...لو مبولة للحشاشين بشرط حشيش إيراني...سينماتنا صارت مقرات حزبية لأحزاب تشوف الفن عيب...لعد شلون تريدونا نتعلم دراما ونشوف العالم وين وصلوا في سيناريوهات (الشعب عاوز كده)...حيدر....حيدر...إنا أعطيناك الكوثر !
وتريدون تطلعون مظاهرة ببغداد...والله لو تصيحون حي على الوطن بنص بغداد ما راح تسمع غير جواب واحد... والجواب هو.... " يا وطن بابا من كل عقلك تحچي...سلم لي عالوطن "......هذا هو الجواب الصح بدون الإتصال بصديق أو حذف إجابتين ...وآني أول واحد راح اجاوب هالجواب بدون أي تأخير...لأن آني عربنجي بوكت الازلام ووكت البواري...الحمد لله ما وسخت إيدي لا بقذارة البعث ولا بقذارة أحزاب الملالي ولا أحزاب البنتاغون ولا أحزاب العهر السياسي...الحمد لله وجهي حليق ما بيه شعراية حتى لا أحد يتصورني على العمايم أو الطرابيش...وبوكت الأزلام زينت شواربي حتى لا تهتز. وإذا بيكم جرأة راح توگفون وياي وترددون نفس الجواب ما دام الوطن يقبل يمشون عليه ناس هم إللي باعوه ...هذولة مثل المطيرجية يبيعون الحمام بالسوگ ويرجعون للبيت ويلگون الحمام بعشه...ويرجعون يبيعوه بغير سوگ...ويرجع كل مرة...إلى أن يجي واحد يعرف الطير النچر من وين ينصاد...بذيچ اللحظة...يروح الحمام...ويروح الوطن...وما يظل غير بالسوالف.....وطبعا السوالف تصير أكاذيب بعد چم سنة...ويصير الوطن چذبة چبيرة نلوكها مثل البعير وما نشبع !
الشعب عاوز كده....فلم الموسم بكل العواصم إللي داير ما دايرنا...هنيالهم عدهم قاعات سينما....بس إحنا ...گاعدين نتذكر بطولات عدنان وعبسي...وساسوكي....وندعو رب العالمين بلكن تنشق الأرض وتطلع إلنا الغواصة الزرقاء...نصعد بيها ...وشحلاتها لو قبطانها باربا الشاطر!
[ندعوك للتسجيل في المنتدى أو التعريف بنفسك لمعاينة هذا الرابط]

الرجوع الى أعلى الصفحة اذهب الى الأسفل
 
حبيب العربنجي . الشعب عاوز كده
استعرض الموضوع السابق استعرض الموضوع التالي الرجوع الى أعلى الصفحة 
صفحة 1 من اصل 1

صلاحيات هذا المنتدى:لاتستطيع الرد على المواضيع في هذا المنتدى
البيت الآرامي العراقي :: الاخبار العامة والسياسية General and political news :: منتدى المنبر السياسي والحوار الهادئ والنقاش الجاد الحر Political platform & forum for dialogue & discussion-
انتقل الى: