أكو شي لازم نگوله ونحچيه، ترى إحنا وكل العالم لازم نحترم إيران والإيراني، إي بلا شقى وحگ الحسين، لأن الإيرانيين بطول تاريخهم من زرادشت إلى أحمدي نجاد ما بيهم واحد خان بلده أو صار توابين في معسكر العدو أو فتح الحدود لجيش العدو حتى يحاصر فرقة من الجيش الإيراني، وماكو إيراني چـذب چذبة حتى يحرگ بلده حتى لو هو ضد خامنئي أو ما يحب بابا غنوج لأن عنده تهيج بالقولون ! هذه هو الشعب الإيراني ، وهذا الحچي موثق تاريخيا بكل الدراسات، يعني مو حچي واحد عربنجي مثلي. وحتى من طلعوا مظاهرات ضد فوز أحمدي نجاد ، رجعوا لبيوتهم من شافوا أكو دول تريد تستغلهم لضرب بلدهم. لا وطلع واحد صحفي إيراني معارض وكلش أحترمه وگاعد بلندن، طلع هذا المحترم وگال بلغة عربية فصيحة أحسن من كثير من المسعورين مالتنا، وأضبط من مكتشف التيار المموي وگال في مقابلة بالتلفزيون " نحن لسنا مثل العراقيين ولا نتعاون مع أي أحد لضرب إيران" ....بالعافية عليكم يا عراقيين هاي السمعة الجايفة بين كل دول العالم وشعوب الدول الفيدرالية وغير الفيدرالية، البرلمانية والدستورية، الثورية والرجعية.... إحنا حرگنا الوطن بمجموعة أكاذيب ألفها وكتبها مجموعة ممتازة من مشاهدي ومتابعي السينما الهندية، مثل ابو شهاب الچلوب، ورافد أحمد، وأبو حمزة الواوي، وعزيزي عزوز وهتلية الحزب الإسلامي والتوافه، هذولة كلهم كتبوا رواية تصير مرجع للأفلام الهندية في كل عصر وزمان من كثر البهلوانيات والچذبات إللي بيها، حتى القطار أكو بيها.. لأن يعرفون ما دام فلم هندي لازم أكو قطار بالنص حتى لو بنص الشارع أو حديقة او بالطابق الثاني من وزارة الزراعة، المهم لازم يطلع قطار بنص الفلم وهذا المقطع كتبه رافد أحمد من گال اكو معامل أسلحة بايولوجية متنقلة مرة عاللوريات ومرة عالقطار. هذولة ضحكوا على القشامر الأمريكان والأنگليز والألمان...حتى الألماني صار قشمر وداخ من قرا هاي الرواية..خرة على الحظ الخرائي وخضير الخرائي، يعني الألماني طول عمره يفتهم ويوم إللي راد ينزل بمستوى الشعب ويصير قشمر طيح حظنا من صدگ چذبة رافد أحمد علوان. والناس القشامر مثل كولن باول وهانز بليكس وجاك سترو...من عرفوا إن الموضوع كله چان چذبة، أعتذروا – ولو بعد خراب البصرة وضواحيها بالتوقيت المحلي – وأعتزلوا الطوبة و الناس والسياسة، بس إحنا بعدنا أبو شهاب الچلب (لأن چلوب أشوية محترم) يصول ويجتث براحته ويتباهى بلمعته إللي تنافس لمعة بسطالي الشريف المصبوغ بصبغ التمساح الأصلي أيام الثمانينات، وإللي فتح الحدود ودخـــّل الجيش الإيراني، واحدهم صار ضخامة ريسنا والثاني صار ضخامة أقليم ما أنزل الله به من سلطان لا في الملة الاولى ولا في الدستور، وإللي ضرب العراقيين بالقمچي في السجون الإيرانية صار أعجوبة العراق، مرة وزير مالية ومرة تخطيط ومرة داخلية، وطبعا چبيرهم عزيزي عزوز وعائلته إللي تفتهم في أصول حكمة الخيانة حتى صاروا من الحكماء بيها ومرجع خيانة، فأستحقوا الأسم والنسب.. وإللي طلع يفتخر بعلاقاته وي خمسطعش جهاز مخابرات وبتفجير سينما بابل صار هو الواوي بالعراق ويبيع المبدأ والقضية بلبن أربيل، لا عراقية ولا بطيخ سامراء، وإللي خان العهد والقسم العسكري صار نائب رئيس حتى لو هامشي، هذولة إحنا العراقيين، نحب ونحترم الخاين، وفي مناسبات كثيرة نتمنى لو بمكانهم، يعني منو بينا ما يتمنى هو يصير بمكان رافد احمد علوان إللي گاعد مرة بألمانيا ومرة بلندن ومرة بأميركا، أكيد كلنا نتمنى نصير بمكانه. رافد إللي برگبته مليون قتيل عراقي وست ملايين عراقي مشردين بدول العالم، رافد إللي يگول بجريدة الغارديان أن هو يشعر بفخر لأن بالچذبة أسقط نظام مو بغير شي. ويگول هو يفتخر بهالشي، يفتخر لأن البلد صار فدرالي و...دم...قراطي وإنطگ بالدهن الحر حتى ينعم بالحرية....ومو بعيدة..بالحكومة الجاية يرجع رافد ويصير وزير التخطيط الإستراتيجي ما دام هو هيچ كفاءة ستراتيجية، وأكيد هسة أكو مباحثات ومفاوضات بين رافد وبين باقي الأحزاب (الوطنية) العراقية حتى يكسبونه لأن رافد مستقل وغير منتمي ...رغم كان في التصنيع، خوش بطة تلعب شناو تك أصبع أبو شهاب الچلب ورافد وكل ربعهم، أكيد يشعرون بالفخر على إللي صار ويصير بالعراق، وگرة عين العراق بهيچ ولد، بس المشكلة إن هذولة متبرين من العراق بعد ما باعوه ولا يريدوه، بس عمت عين العراق، بعده مچلب بيهم، بلكن واحدهم يرجع ويگول آني آسف الرقم غلط...أو بلكن واحدهم يطلع إيراني، وما يخون...بعد ما نصير إحنا أقليم في جمهوري إسلامي إيران...بقيادة قائد الضرورة الإيرانية...المعيب الگرن....بوري كامل المواصفات الخيانية ! أي بلكن الحظ يلعب ويانا...ولو مرة ! habibarabenchi@yahoo.com
من هنا 
من هنا 
من هنا 
الخميس 17 فبراير 2011 - 22:43
