الدولة : الجنس : عدد المساهمات : 10368تاريخ التسجيل : 07/10/2009
موضوع: حبيب العربنجي : دينار أبو الطواطة الجمعة 11 مارس 2011 - 1:27
حبيب العربنجي : دينار أبو الطواطة
10/03/2011
الدنيا ربيع، والناس في الدول إللي الله غاضب عليها وما عدهم لا مجلس الخياسات العليا ولا هيئة النزاحة ولا مبادرات الفهمان المسعور، الناس بذيچ الدول تشم ورود ورياحين في الربيع، وإحنا الربيع عدنا تطلع بيه ريحة الفساد وننزل للچول ندور على چم مليار إهنا وچم مليار هناك، عبالك الفلوس والمليارات چما ولازم نطلع للچول وندور عليها... دا تسمعون الاخبار لو الكهرباء عدكم بعدها مقطوعة !!! عيوني الاخبار تگول أكو 60 مليار دينار ضايعين بديالى، وأكو فوگ 450 مليار ضايعين بخزينة وزارة الزراعة، وأكو 43 مليار دولار...إي دولار من خزينة الدولة ضايعين لأن الدينار العراقي أثول إبن اثول..أكو واحد يعوف خزينة الدولة العامرة ويتهبذل بالشوارع ؟ ...روح إن شاء الله أبد ما حد يلگاك وأكو وأكو...وطبعا تعرفون ليش هاي الدنانير ضاعت...لأن إحنا البلد الوحيد بالعالم نطبع دنانير ما بيها طواطة...إي والله العظيم...طواطة بالدينار حتى من يضيع الدينار من كيفه يطوط ويصيح علينا: ترى آني إهنا تعالوا وشوفوني..آني مو ضايع....ولأن هسة وزير المالية مالتنا اكبر عقل إقتصادي (هو ليش أكو دكتور مو إقتصادي وتاجر چبير) ويفتهم شنو يعني الفلس ويعرف شلون يجبر الخاطر المكسور للإقتصاد العراقي المتكسر عبالك ساحگيه بالكرك من راسه حتى جوا النعل إللي لبسناه إياه تاجر النعلان ...فلازم يشوف إلنا حل وي الدنانير الضايعة ... والدينار أبو الطواطة راح تكون بيه شريحة ألكترونية تطوط من يضيع الدينار...... وهاي الشريحة مثل سيم كارد أو مثل الفسفورة في عملة خمسين دينار الشهيرة إللي دوختنا وإحنا ندور على الثلاثي المقدس حتى نتأكد الورقة ما مغشوشة..النخلة والفسفورة والشعرة بالشارب لأن الشارب مال صاحب العملة چان هواية يهتز حتى بالعملة الوطنية...صنع مطابع جريدة بابل. ومثل ما چان بس أبو الفسفورة يمشي عد أبو الفلافل وعد أبو التاتا المچرقعة وعد المجدية...وعد فراش المدرسة من تمد إيدك لجيبك المفتوك حتى تورق و تستلم درجات إبنك لو جثة إبن عمك من المشرحة ...نفس الشي..لازم بس دينار أبو الطواطة يمشي بالعراق الفدرالي الأقليمي الديناميكي والميكانيكي والهيدروليكي والأسفنيكي . أي وزير ما يعترف بالدينار أبو الطواطة إحنا همين ما نعترف بيه..إي عقود تجارية ما تندفع بالدينار ابو الطواطة إحنا همين ما نريدها...وأي ميزانية ما نصادق عليها – إحنا الشعب مو النوام – إذا مو بالدينار ابو الطواطة إللي راح نبرمج الشريحة الألكترونية إللي بالدينار حتى نعرف مكانه زين إذا راح مكان بعيد وما نسمع الطوط...فراح نبرمج الشريحة وي نظام التتبع بالأقمار الصناعية GPS مثل ما تسوي جمعية ناشيونال جيوغرافيك وي الطيور المهاجرة، وبهاي الطريقة نجيب الفلوس وما راح نخلي الدينار يضيع حتى لو راح لأقصى جزيرة بالمحيط الهادي إللي ما أعرف شنو أسمها...بمجرد نفتح الكمبيوتر لو حتى الــ(بي بي) مالتنا – اقصد بلاك بيري – وكلك على نظام التتبع وراح نشوف الدينار أبو الطواطة وين...ومن وين تصدر ذبذبات الطواطة...ونجيبه نجيبه... إخواني ...خلونا نشيل لافتة نكتب بيها نريد دينار ابو الطواطة...صح راح ندوخ من الصوت والضجيج لأن دنانيرنا الضايعة بكل مكان...بس لازم نصبر على أولها حتى نعرف شنو تاليها أقصد مكان الدنانير الضايعة...لأن مال نجي وننصح الدينار نصيحة أخوية يمعود لا تروح وي الناس الظالمة إللي يقشمروك ويودوك درب الزلگ ترى هاي النصيحة ما تفيد...لأن الدينار العراقي دثو إبن دچة دبنگ ماركة DDD الشهيرة...وإذا دكتورنا الورد يريد من صدگ يعالج الكسور في الإقتصاد العراقي...ما راح يحتاج إلى تجبير ولا اشعة ولا براغي لتثبيت العظام بمكانها....لازم يشيل إيده بالموافقة على طلب الشعب ونطبع الدنانير إللي جاية بالطريق كلها وي الشريحة الألكترونية...حتى نضمن إن الفلوس والدنانير ما راح تضيع. وشوفوا الفرق بين الدول إللي الله غاضب عليها وما عدها ديمقراطيات مفدرلة ولا مبادرات بارزانية ...وبين الدول الكشخة إللي كل زقاق بيه فدرالية...حتى المقابر مالتها مفدرلة وحسب الحروف الأبجدية الكردية ...لأن الجماعة إللي الله غاضب عليها...ربيعهم كله ورود وطيور مهاجرة يراقبوها من تطير...والدول المفدرلة والديمقراطية البارزانية ما عدها لا هم ولا غم...گاعدين يتابعون هجرة الدينار ابو الطواطة. طووووووووووووووط....طوووووووووووووووووط...طوووووووووووووووووووط