آويلي على الوطن...صار شحماية بحلگ بزازين المزابل...مو بس عدنا...لا يمكن إحنا آخر الناس – متعودة دايماً – ولا نقبل نسبق الآخرين بأي شي، حتى من جبنا كلمة (الوطني) وي إسم الكتلة الحاكمة في بغداد الحرة...بغداد الحرة أخت قناة الحرة لصاحبها المخابرات الاميركية، يعني بغداد الحرة همين صاحبتها المخابرات الاميركية إلا إذا هي تدعي عدها نسب وي الحرة وهي مو حرة....صح يا رجااااااااااااااااااااااال...أيوه صح على رأي فهد بلان ! وين أكو شي (وطني) لاعب بالوطن طوبة بدون قانون تسلل ولا بنالتي، إلى ان بالدقيقة الآخيرة من عمر المباراة – أقصد من عمر النظام والحاكم – وبعد ما يعتگ الشرشف الگولگولي إللي مكتوب عليه (الوطني) وتطلع العورة القبيحة من جوا الشرشف العتيگ المشگوگ والمشكوك فيه..بذيج اللحظة البائسة نكتشف إشكد غشمة من مشينا ورا واحد وطني ! إللي باگ بالمليارات بمصر چان تحت مسمى (الحزب الوطني)، و(المنتخب الوطني) مالتنا ما بيه خير ولا چارة وما كو من وراه غير حسرة وندامة عبالك إبليس مو منتخب..وندور بالسوگ وما نلگي(المنتوج الوطني)...وإللي باگ الإنتخابات وضحك على الغشمة بگلاص لبن أربيل هو (التحالف الوطني)....وإللي أدور عليه وما ألگيه حتى بالحلم هو (وطني) إللي ببالي...إي (وطني) إللي چنا نسمع أغنية حلوة بالراديو قبل أخبار الساعة سبعة الصبح وإحنا نتريگ قبل ما نروح للدوام...چانت الاغنية تگول: " قالوا سماء صافية ونسمات غافية تهب مثل العافية فقلت هذا...وطني....وطني....فقلت هذا وطني " أكيد هذا الشاعر چان من أرباب القندلة ومن المقندلين الأغيار، أو يجوز چان ضارب دالغة على صورة جبال الألب حول جنيف ويكرز حب رگي من كتب هاي الإغنية الأفلاطونية ! تماما مثل ما يگولون أهل العمايم الزفرة واللحى المخطانية والدشاديش الميني جوب وأهل مثنى وثلاث ورباع..ما أجتمع رجل وإمرأة إلا الرفيق إبليس يكون حاضر وياهم حتى يرفع تقرير بيهم للسلطات العليا ويطيح حظهم..نفس الشي ما أجتمع إسم حزب أو تجمع سياسي وي كلمة (وطني) إلا طيح حظ الوطن وگلبه على بطانته. لأن علم النفس يگول الناقص يحاول يتصرف بالشكل إللي يوهم الآخرين أن هذا النقص ما موجود بيه ولا بتصرفاته ولا بولاءاته...أي (وطني) هو في الجهة المقابلة من الولاء الوطني وما بيه قطرة وطنية ولا جغرافيا أو علوم تطبيقية إللي ما اعرف شنو معناها. والله جيب لابتوب توشيبا من مصنع لابتوب قبل تسونامي اليابان...وشيل قطعة ( مــــيد إن جابان ) وخلي بدالها (منتوج وطني) راح تشوف اللابتوب صار خرگة ، ولو تجيب نيلسون مانديلا (الله ينطيه طول العمر والعافية) وتنطيه إستمارة عضوية في أي حزب وطني راح تشوف الرفيق مانديللا يطلع بالتلفزيون وحلگه مثل دوشكة عبدالله يحارب الفساد وجوا الميز دا يقبض حتى من المذيع لأن تفضل عليه وطلع بالبرنامج مالته وإيديناته الثنتين طامسات بالخياس والفساد (الوطني). الوطن مو چلمة نلزگها بقطعة الحزب بباب المقر الحزبي .. "الحزب الوطني لصاحبه الفلان الفلاني"...وكيلنا في الجامع الملا الفلاني...ووكيلنا في الحوزة السيد الفلاني..الوطن مو موال نلطم عليه...الوطن مو حسرة تحرگ صدورنا...الوطن كاس عرگ بليلة وراها صبح نسمع بيه أصوات البلابل مو قاذفات بي 52...الوطن گعدة تشريب باگلاء بالدهن ومو حاير منو يدفع الحساب، الوطن توگف سرة بباب الطيارة حتى تسافر تشوف الدنيا الحلوة مو توگف سرة للبنزين ...الوطن ينطيك عمر...مو ياخذ منك نص عمرك بالسرة على الماي والبنزين والغاز...ونص عمرك حرب ...ويا ريت لو الحرب جابت نتيجة....الحرب جابت إلنا چلاب جوعانة من كل مزابل العالم. الوطن وي (التحالف الوطني) هو دولاب هوا....يوهمك أنت بالعالي للحظات...وتاليتك تتحسر على إللي فوگ. هسة أكيد صار معلوم شنو يعني (وطني)... سلمونا على إللي ما شفناهم...هيء...هيء...هيييييييييء....وطن! habibarabenchi@yahoo.com
من هنا 
من هنا 
من هنا 
العمل/الترفيه
الثلاثاء 15 مارس 2011 - 1:40
