البيت الآرامي العراقي




البيت الآرامي العراقي

سياسي ِ ثقافي ِ أجتماعي


 
الرئيسيةالرئيسيةبحـثالتسجيلarakeyboardsyrkeyboardدخول

شاطر | 
 

  ناطرين :حبيب العربنجي

استعرض الموضوع السابق استعرض الموضوع التالي اذهب الى الأسفل 
كاتب الموضوعرسالة
البيت الارامي العراقي
الادارة
الادارة



الدولة : المانيا
الجنس : ذكر
عدد المساهمات : 9455
تاريخ التسجيل : 07/10/2009
التوقيت :

مُساهمةموضوع: ناطرين :حبيب العربنجي    الخميس 31 مارس 2011, 1:16 am


: ناطرين :حبيب العربنجي


30/03/2011




[ندعوك للتسجيل في المنتدى أو التعريف بنفسك لمعاينة هذه الصورة]بالدول إللي الله غاضب عليها وما عدهم لا فدرلة ولا دقرطة ولا برزنة *...بذيچ الدول التعبانة وإللي تكسر الخاطر مثل الگلاص، يجيبون شاشة كلش چبيرة أكبر من كرش مولانا ضخامة الريس، وينصبوها بنص أكبر ساحة عدهم ويخلون بيها ساعة ديجيتال تحسب العد العكسي لمناسبة مهمة مثل مهرجان موسيقي (عييييييييييع) أو إنتظار نهاية سنة وبداية سنة جديدة أو العد التنازلي لرحيل رئيس الوزاراء....أي مو دا أگول إلكم دول تعبانة والله غاضب عليها...ليش أكو دولة تغير رئيس وزرائها إلا إذا هي خارج رحمة رب العالمين ...الحمد لله إحنا مو من ذيچ الدول المتخلفة إللي ما تعرف قيمة رئيس وزرائها ولا قيمة رئيسها ...من يوم الرئيس القاعد مزروف الكشن إلى يوم الرئيس (حلال آطلب آني) المعروف في الاوساط الشعبية والگهاوي بإسم مام جلــّو.
إي يابة إي وبعدين ....!
ولأن إحنا عدنا قيادة رشيدة وحكومة حكيمة وشعب سعيد أكثر من العيد السعيد وخروف الذبح البليد إللي يروح للذبح وهو يغني أغنية العيد "ما ضاع حق وراءه باع....بااااااااااااااع...بااااااااااااااااااااع" ، ولأن حكومتنا تجيب الحق لحد عدنا وأصلا عدها خطة إستراتيجية لتوزيع حقوق الشعب بالحصة التموينية بس إشوية أكو خلل بتصميم البطاقة الحقوقية التموينية الشاملة..ولأن إحنا گد الحچاية إللي نحچيها من يوم شعارات الأزلام الهوائية إلى يوم تحدي العمالقة من طلع بورينا على التلفزيون بوجهه البشوش عبالك وجه ميساء الساحرة في مغامرات سندباء...من طلع وگال أنطونا 100 يوم وبعدين عاتبوني...وطبعا عتاب محبة مو حساب وكتاب ومعرفة الأسباب...لكل هاي الأسباب الموجبة..أقترح على السيد البوري المحترم (إي ترى حتى البواري درجات )...أقترح وأنا العبد العربنجي الفقير إلى الديمقراطية..أشوية ننزل قدرنا ونصير مثل ذيچ الدول التعبانة حتى نحس بمعاناتها ونشاركها البؤس الإنساني لأن الإنسانية هي وحدة..أمة إنسانية واحدة (هذا بوگ من شعار الأزلام) ...والشغلة ما يرادلها غير نجيب شاشة عملاقة وننصبها بنص ساحة التحرير ببغداد...بس طبعا لازم نشغلها بالبطاريات ...ونفس الشي نخلي بيها ساعة ديجيتال وماكو مشكلة بحسب التوقيت السني لو بحسب التوقيت الشيعي...المهم ساعة مضبوطة لأن شغلتنا اضبط من الصوم ومن شغلة تقديم وتأخير الإفطار والسحور بحسب الجهلة في الملتين الطربوشية والعمائمية....ملة الدشدايش القصيرة أو المحابس السليمانية !
وهاي الساعة راح تحسب الوكت بالعد التنازلي إلى يوم الوعد المعلوم لبورينا إللي هو حدده...وبكل ليلة من يخلص يوم ويبدي يوم...نقترب من اليوم السعيد ورؤوية هلال العيد...يوم إللي واحدنا ما يستحي ويمد إيده على سويچ الكهرباء ويفتح الگلوب ويروح بكل گوة عين ويگول لأبو المولدة (أنت ومولدتك دي ولي وبعد ولا أشوف چهرتك الزفرة) لأن أكو كهرباء والوزير ما خذلنا وجاب إلنا كهرباء بمئة يوم...إي طبعا ليش بورينا عباله راح نحسب 100 يوم بدون ما نحسب عليه خمس سنوات من الكلام الحلو مال مشاريع الكهرباء لو شنو...شايفنا غشمة لو خرفان العيد لو ضحايا تسونامي !!! ترى إحنا نعرف الحساب...يعني أصلاً الحساب هو خمس سنوات زائداً تسعة أشهر مال الحمل الحكومي حتى نزل الوحي المبرزن في أربيل...وبعدين 100 يوم من يوم ما تحدى بورينا كل الناس ...الغشمة والمفتحة..المؤمنة بالديمقراطية والملحدة بالوجود الامريكي في البحرين !!!
نقترب من اليوم السعيد...اليوم إللي واحدنا إذا عنده معاملة بدائرة حكومية بعد ما يشيل وياه جنطة زايدة بيها فلوس رزم حگ البخشيش الحكومي من فراش الدائرة حتى المدير العام وكل من باسمه وحسب وزنه الجسدي والمعنوي...اليوم السعيد من واحدنا من يروح للمستشفى ما يگول لأهله حضروا لي الگبر لأن هو رايح للموت برجليه....اليوم السعيد من واحدنا يوگف گدام وكيل الحصة التموينية ويشگ البطاقة التموينية مالته لان كل شي موجود ومتوفر والحصار خلاص وهسة إحنا دبس وراشي وي آل نباح في المطلاع والكاظمة والجهراء...شنو داعي للبطاقة التموينية إلا اللهم نحتاجها في إستخراج شهادة وفاة!ومن تخلص ليلة ويبدي يوم...تزداد الإحتفالات حول ساعة الحكومة (إي راح نسميها ساعة حكومة) بنص ساحة التحرير...وراح تصير أعراس فرح بساحة الامة وراح يحضرون الوزراء ويانا للإحتفال باليوم الكبير وبإنجازهم الوطني لان ما خذولوا الشعب وقبلوا تحدي البوري الكبير... بس خايف لا يسويها البخت المايل و تطلع بطارية الشاشة والساعة بطارية تايوانية والساعة تطفى قبل اليوم الأخير من العيد السعيد بليلة.... بس ليلة ويوم... صدگ خيبة ...بذيچ اللحظات الحاسمة من عمر البؤس العراقي... راح أگعد أبچي وأصيح... " نطرت هلال وصلك والحصاد (همووووووووووووم)...ليلة ويوم..ليلة ويوم....يمعود ....كل ليلة ويوم".
* من كتاب الشرح الوافي لأسرار النعمة في العراق المتعافي..نقدم لكم هذه المعاني
الفدرلة: دولة فيدرالية على الطريقة البارزانية
دقرطة: دولة ديمقراطية على الطريقة البورية
برزنة : تطبيق مبادرة لبن أربيل
[ندعوك للتسجيل في المنتدى أو التعريف بنفسك لمعاينة هذا الرابط]


الرجوع الى أعلى الصفحة اذهب الى الأسفل
 
ناطرين :حبيب العربنجي
استعرض الموضوع السابق استعرض الموضوع التالي الرجوع الى أعلى الصفحة 
صفحة 1 من اصل 1

صلاحيات هذا المنتدى:لاتستطيع الرد على المواضيع في هذا المنتدى
البيت الآرامي العراقي :: الاخبار العامة والسياسية General and political news :: منتدى المنبر السياسي والحوار الهادئ والنقاش الجاد الحر Political platform & forum for dialogue & discussion-
انتقل الى: