البيت الآرامي العراقي




البيت الآرامي العراقي

سياسي ِ ثقافي ِ أجتماعي


 
الرئيسيةالرئيسيةبحـثالتسجيلarakeyboardsyrkeyboardدخول

شاطر | 
 

  حبيب العربنجي : وجدتها يا بوريخميدس

استعرض الموضوع السابق استعرض الموضوع التالي اذهب الى الأسفل 
كاتب الموضوعرسالة
Dr.Hannani Maya
المشرف العام
المشرف العام



الدولة : العراق
الجنس : ذكر
عدد المساهمات : 37595
مزاجي : أحب المنتدى
تاريخ التسجيل : 21/09/2009
الابراج : الجوزاء
التوقيت :

مُساهمةموضوع: حبيب العربنجي : وجدتها يا بوريخميدس    الثلاثاء 05 أبريل 2011, 3:30 am


حبيب العربنجي : وجدتها يا بوريخميدس


04/04/2011




[ندعوك للتسجيل في المنتدى أو التعريف بنفسك لمعاينة هذه الصورة]وجدت أخيرا لگيت الحل ...وجدتها.... ليش ندزخ ونروح لتلفات الدنيا ونبوس القنادر الروغان اللماعة حتى الأوادم يجون يلگون الحل إلنا...وتالي الحل موجود بإيدينا مثل المحبس إللي لابسه أخونا في الكذب المصفط قاسم أبو الجل...ببغاء عمليات بغداد..بس منتوف نتف مو ملون...إي ليش دايخين !
وإذا ما تطبقون هذا الحل راح تظلون تطلعون كل جمعة لساحة التحرير وما حد راح يسمعكم لأن اصواتكم ما حلوة وشكولاتكم مو مثل شكل ميريام فارس في حفلة نادي الصيد إللي أتصور چانت هي السبب في زلزال وتسونامي اليابان من كثر ما دبچت وصعدت فوگ وجوا...على المسرح يمعودين مو في غير الظروف التشغيلية المسموح بيها في شرع الله ودولة الفافون ! ..بس خلوها سكتة أخاف اليابان ومحطة فوكوشيما راح يطالبونا بتعويضات...وشراح ننطيهم تعويض...فاصل غنائي من ميريام فارس لو ننطيهم هدية فكرة عبقرية وحدة من الأفكار العظيمة للعقلية الجبارة في تصميم الطرق والقطارات والمترو في العراق السيد الوزير المحترم إللي نقل إلنا التجربة الإيرانية في عدم لبس الباينباغ...إي مو وزير نقل لعد شلون !!! غير لازم ينقل إلنا تجارب الامم الاخرى...لا حول ولا قوة إلا بإيران وبها نستعين !
والله حل بسيط ما يكلف الدولة شي ولا يكلف قاسم عفطة تصريحات ...ولا يكلف مسعود البرزنة گلاص لبن إللي هو كلفة وسعر مبادرة برزنة العراق ...اللي بيها صار حالنا حال البراز من الجماعة صدگوا بالبرزنة ومبادرة لبن أربيل.
الحل بسيط ...طبقوا هذا الحل وراح تشوفون مجلس الدواب العراقي كلهم راح يصيرون أوادم ويسمعوكم وراح يلغون إجتماعاتهم إذا ظلليتوا زعلانين...ليش منو يگدر يزعل الشعب ...هو چم شعب عدنا؟؟؟ إحنا جماعة ما عدنا غير جنسية وحدة..يعني عدنا شعب واحد مو مثل غباء الأعرجي الإيرلندي لو يس- يم السامرائي الأمريكي إللي باگنا فوگ العباية وجوا الميز من عقود الكهرباء وشلع...أو مثل ابو الكيويلية الوزير المسودن إللي باگ طحين الحصة وشلع...وطلع مثل الشعرة من العجينة...مو عنده خبرة بالطحين والشيرة...منعول الواليدن اباً عن جد...في حال إذا يعرفهم وما يغلط بأسمائهم!
ومن نطبق هذا الحل...راح تطلع مسيرات تأييد بشوارع بغداد من باب المراد في الكاظم حتى حسينية الرسول بالكرادة ومن الشعلة المنورة وحتى أبو دشير والنعيرية والكمالية بكافة طبقاتها العاملة!! كلها راح تطلع مسيرات تأييد..وراح تشوفون القنوات العراقية من قناة العراقية إللي صار لي شهر آني مضيع ترددها وكلما أفتح أشوف وأسمع قناة إيرانية تنقل أخبار الوزارة الخارجية الإيرانية...يمعودين ما حد بيكم عنده تردد قناة العراقية...أريد أسمع أخبار عراقية مو إيرانية ! وقناة بلادي إللي تعتبر إيران (بلادي) مو العراق..وقناة (العهر) السياسي...وقناة وقناة وقناة...كل هاي القنوات راح تخصص كل اوقات البث حتى تسمع صوتكم وحقوقكم قبل ما يوصل البوري للزردوم وتگولون بثثثثثثث بحسب النكتة العراقية الشهيرة من يدخل ما أعرف شنو بما أعرف وين حتى يصيح...بثثثثثثثثثثثثثثثثثثثثثثث ! يمعودين صحنا بثثثثثثث من البوري بس الظاهر ما حد بيهم سامع هاي النكتة حتى يفهم معنى البثثثثثثثثثثثثث !
والحل هو كالآتي : كلنا نتجنس بالجنسية البحرينية..أصلاً حتى تاريخيا البحرين والعراق واحد من الحضارة السومرية وأرض دلمون وحتى سألوا خزعل الماجدي وراح يوافق كلامي..يعني ماكو مشكلة التجانس الحضاري...ومن نصير بحارنة وإشما نگول شي الحكومة راح تسمعنا وراح تسوي مؤتمرات وتشوف شنو السالفة ليش إحنا ما مرتاحين حشاكم وحشا السامعين. وراح يجينا أبو شهاب الچلوب شخصيا رغم المليارات مال بيت إللي خلفوه ويجي يسمعنا... حاله من حال إللي ما عنده ومستعد يروح للكاظمة والمطلاع حتى يشوف إلنا حل...يعني أبو شهاب الچلوب ما سمعنا من عنده فرد يوم يريد راح وباس قنادر أل نباح بلكن يلغون التعويضات إللي ما إلنا أي صوچ بيها...بس ترى من نشيل الجنسية البحرينية راح يروح ويبوس حتى النعل ويلحس الدبانستري...يمعودين ترى أهل البحرين ما مرتاحين وشوفوا حل !
راح أصير بحريني...وإللي يريد خلي يشيل إيده وأسجل اسمه وياي حتى بلا ما أطلب نسخة من البطاقة التموينية وتعداد سبعة وخمسين...بس قبل ما نصير بحرينيين...خلونا أشوية نبرد گلبنا لآخر مرة بصفتنا العراقية....ونگول:
بوري بوري إسمع زين
إحنا شعبك لو البحرين
[ندعوك للتسجيل في المنتدى أو التعريف بنفسك لمعاينة هذا الرابط]

الرجوع الى أعلى الصفحة اذهب الى الأسفل
 
حبيب العربنجي : وجدتها يا بوريخميدس
استعرض الموضوع السابق استعرض الموضوع التالي الرجوع الى أعلى الصفحة 
صفحة 1 من اصل 1

صلاحيات هذا المنتدى:لاتستطيع الرد على المواضيع في هذا المنتدى
البيت الآرامي العراقي :: الاخبار العامة والسياسية General and political news :: منتدى المنبر السياسي والحوار الهادئ والنقاش الجاد الحر Political platform & forum for dialogue & discussion-
انتقل الى: