يابة آني مضيع البوصلة مالتي وما أعرف الشمال الشرقي من علي الغربي... الأماكن كلها تايهة عليّ.. چنت حاسب نفسي في العراق المتحرر المفدرل المدمقرط بس الظاهر آني وييييييييييييييين والعراق المفدرل وين...لأن آني هسة واگع بديرة أشو كل يوم أكو چم واحد ينمطلون بالشارع وأسأل والناس يگولون هذا راح بالكاتم ! والشوارع صايرة عبالك صينية بقلاوة – مو من الحلاوة يا بة إشگد نفسكم دنية – بس صايرة تشبه صينية بقلاوة من كثر الحواجز الأمنية...يعني ديرة ما بيها لا أمن ولا أمان (شنو الفرق بيناتهم ؟؟ أعتقد نفس الفرق بين نوري وبوري) .. وآني چنت بصراحة كلما أسمع صوت إنفجار أگول من ألف نعلة على هالديرة ...شنو وطن لو فلم أكشن...أدري هم گالوا العراق لو العراك.. اشو كلهم عراكة وشقاوات وهتلية وسرسرية...وتالي طلعت ظالم وغشيم...لأن طلعت آني مو بالعراق وجاي اسب وأشتم وألعن العراق !! إي وداعة تسريحة نوري أبو الفافون ما اعرف آني هسة وين! صح أحچي اللهجة العراقية بس آني مو بالعراق...آني وووووووووووووين !! وصار لي يومين وآني دا أضرب نفسي دفرات وچلاليق على هاي الدگة...شلون آني عبالي بالعراق وتالي طلعت بغير ديرة!!...صدگ إللي ما يشرب لبن أربيل ويتبرزن وإللي ما يعمر راسه بالحكم العمارية مال إبن عزيزنا عزوز تخرب عنده البوصلة وهو ما يدري..ويمشي الماي من جوا رجله مثل سيان الدربونة وهو عباله أنهار جنة الخلد اللي تبشر بيها الديمقراطية المستوردة مثل چكليت ماكنتوش مال الأسواق المركزية إللي چنا نوگف سرة عليها تالي إكتشفنا هي أرخص أنواع الچكليت...بس هاي هي ...دگايگ الأزلام من شعارنا إلى أهدافنا كلها نفاخات هوائية تالي كلها طلعت مزروفة...حتى بالطگ ما فادت...وين أكو نفاخة مزروفة تطگ ! يگولون العراق أكثر بلد آمن ومستقر ...اللهم إجعلني من أهل العراق وأخرجني من هاي الديرة إللي ما أعرف هي وين وشنو اسمها... أشو يمي كل يوم إنفجارات وهجوم على مقرات الجيش والشرطة ومبنى المحافظة...وكل وزير عنده لواء من الحماية المسلحة...وكل الشوارع مقسمة بحسب وزن كل مسعول إللي يسكن في محيط دائرة قطرها خمسة كيلومترات من الشارع...أللهم أخرجني من هذه الديرة الظالم أهلها...أدري آني شجابني بهاي الديرة وعايف العراق والأمن الموجود بالعراق...شنو عمى لو دايخ لو مضروب بوري وما گمت أشوف دربي؟؟؟ عيوني أي واحد يسمعني بالعراق الآمن والمطمئن...عيوني أنتو...آني أخوكم ما اعرف وين ديرتي هسة..طلعت غشيم أبو البرغي ومضيع الإسبانة...ضيعت نفسي وآني عبالي گاعد بالعراق...ديرة هلي ...تالي طلعت كل شي ما افتهم .. يمعودين رجعوني للعراق...بلكن أخلص من اصوات الإنفجارات اليومية..رجعوني بلكن أخلص أشوف كل واحد صاير جيمس بوند وشايل مسدس كاتم للصوت...رجعوني للعراق أريد أركب سيارة تمشي وما توگف إلا بإشارة المرور أو من توصل للبيت... وإذا ما گدرتوا ترجعوني للعراق لأي سبب ...ممكن أستعير منكم البوري السحري مالتكم إللي خلاكم تتمتعون بكل هالأمان والأمن العائلي والغذائي والمعلوماتي والديني بلا وزير داخلية ولا دفاع عبالك باربا الشاطر مال هالوكت...وحتى الجماعة الموجودين بهاي الديرة التعبانة إللي آني بيها ما يحسدون نعمة الأمن إللي أنتو بالعراق عايشين بيها...بس نريد البوري مالتكم معايشة عدنا يومين وبس.ولا تخافون ماكو حجابات....وأكيد راح يگلب حالنا ويسوينا مثل العراق إلا أشوية حتى العراق يبقى بالمركز الاول أكثر بلد آمن ومستقر وإحنا نجي بالمركز الثاني ميخالف ...المركز الثاني ولا هالحالة إللي ما أعرف شي اسميها... عيوني بوري العراق المفدى أخاف ما أحد يوصللك الطلب مالتي...وإذا حضرتك كلش مشغول بالعراق...ممكن تكتب لي نوع حبوب الهلوسة إللي تاخذها وتشوف الدنيا كلها بمبي...بس خاطر المشاهدين دير بالك تكثر من هاي الحبوب لأن ترى ما نتحمل چهرتك تطلع بالتلفزيون وتسوي نفسك سعاد حسني وتغني... " الحياة بئى لونها بمبي "....وطبعاً أحمدي نجاد راح ياخذ دور حسين فهمي ..مع الحقوق المنصوص عليها في سيناريو فلم ( أميرة حبي أنا).
من هنا 
من هنا 
من هنا 
الأربعاء 13 أبريل 2011 - 22:19
