البيت الآرامي العراقي




البيت الآرامي العراقي

سياسي ِ ثقافي ِ أجتماعي


 
الرئيسيةالرئيسيةبحـثالتسجيلarakeyboardsyrkeyboardدخول

شاطر | 
 

  حبيب العربنجي :عنوان بيتنا زي ماكان

استعرض الموضوع السابق استعرض الموضوع التالي اذهب الى الأسفل 
كاتب الموضوعرسالة
Dr.Hannani Maya
المشرف العام
المشرف العام



الدولة : العراق
الجنس : ذكر
عدد المساهمات : 37592
مزاجي : أحب المنتدى
تاريخ التسجيل : 21/09/2009
الابراج : الجوزاء
التوقيت :

مُساهمةموضوع: حبيب العربنجي :عنوان بيتنا زي ماكان    الإثنين 18 أبريل 2011, 8:31 pm


حبيب العربنجي :عنوان بيتنا زي ماكان


18/04/2011





[ندعوك للتسجيل في المنتدى أو التعريف بنفسك لمعاينة هذه الصورة]خابرني صديقي إللي أول مرة يطلع خارج حدود الديمقراطية العراقية...خابرني وما يعرف شي يگول...وآني همين ما عرفت من صوته هو فرحان لو دا يلطم...يمعود شنهي ما شنهي شبيك؟..وقبل ما يخلص الرصيد مالته بنص دقيقة سيطر على نفسه وگدر يحچي ..وگال بعد أن أثنى باللعنة على الحظ الخايب وأردف اللعنات إلى كل من والاه إلى يوم الانتخابات الجاية :
" يمعود قبل ربع ساعة صار حادث سيارة بالشارع إللي يم الفندق إللي آني نازل بيه..سيارة ضربت عمود إشارة لأن الدنيا دا تمطر...قبل نص ساعة بس...وهسة أكو جماعة جايين من دائرة تصميم الطرق والمرور ... گطعوا العمود المضروب وخلوا واحد جديد برغم الجو الماطر والإعصار....خررررررررررررررر.....
خلص رصيد صديقي المصدوم بالنتلة الحضارية مال الدول التعبانة .
ورجعت وي نفسي إلى سوالفنا العراقية من نريد ننطي عنوان بيتنا لواحد يجي يزورنا...مثلاً آني شخصياً أستخدم هاي الكليشة لكل من يريد يندل بيتنا... والكليشة هي كالآتي:
" يم تانكي الماي إللي إنضرب بحرب إيران ولحد هسة ما حد صلحه...وأول فتحة يمين تلگي عمود كهرباء وايراته كلها مگطعة و طالعة لأن من ضربت الطيارات المحطة الكهربائية بحرب 1991 هذا العمود صار خارج الخدمة العسكرية وظل على حاله..تمشي بعده أربع بيوت وتجيك فتحة زقاق على اليسار... أول ما تدخل للزقاق أكو فتحة مجاري كلش چبيرة مغطيها بچنكو مزنجر مثل چهرة مسعول عراقي ما متريگ كاهي وگيمر..وراها أكو بقايا بناية چانت مدرسة مكتوب على الحايط مالتها (( جماهير الحزب تندد بإتفاقية كامب ديفيد وزيارة السادات)) إللي كتبناها باول أسبوع بعد زيارة السادات...بيتنا ورا الحايط مباشرة...بصف بيتنا أكو خرابة بيها سيارة سكراب " .
هاي الكليشة تغطي 34 سنة إذا مو أكثر من تاريخ الوطن العراقي المنبطح.. لأن بصراحة ما أعرف تاريخ ذيچ السيارة السكراب بالخرابة لأن ما أعرف موديلها ولا لونها..بس أعرف الچلاب إللي تنام بيها.
خلال هاي السنين ...الخاين صار مناضل ...ورجع يحكم...الشهيد صار خاين...والمعدوم صار شهيد...المهيب الركن صار مزروف الكشن...وهز الشوارب صار بس من واحد يمضمض..والحمد لله كلنا صارت عدنا نعلان إيرانية وما نحتاج إلى تاجر نعلان يقود مسيرة الحفاي الظافرة...العمامة صارت الزي الرسمي للكلاوات في العراق...عيد الغدير صار هو العيد الوحيد بالعراق اللاطم من كثر أيام الجرح الديني والسياسي وأيامنا الدامية والنزيف إللي بيها...يا ريت الوطن يوصل لسن اليأس بلكن يتوقف النزيف...يا ريت !
وإذا ظلت العمامة تغطي الوطن بالغمامة السودة من فوگ وبالقمامة من تحت رجلينا وحتى خشومنا إللي چانت عالية أيام ما چنا نتبغدد قبل ما يندار الزمن وصرنا نتزبل...فأتوقع هاي الكليشة تظل بدون أي تغيير في المفردات الأساسية مثل البطاقة التموينية مع الفرق أن هاي الكليشة نگدر نضيف عليها أشياء أكثر بمرور الوكت بس البطاقة التموينية نشيل منها وما يبقى منها شي غير مال هي تذكرنا بالمذلة والإهانة والحسرة على أيام كارتونة دجاج برازيلي بيها 11 دجاجة عبالك منتخب مو كارتونة...كلها بعشرة دنانير.
ومو بعيدة عراقي مغترب صار له أربعين سنة برة ...اربعين سنة ما شايف مدينته ولا زقاق طفولته...يرجع بعد هاي السنين حتى يجي ويعيش ببلد ديمقراطي لأن خطية ما يگدر يفتح حلگه بالسويد ولا بكندا ولا حتى بالهند المستبدة والدكتاتورية ..يجي بعد اربعين سنة ويصعد التاكسي ويگول للسايق وديني يم الخرابة إللي بصفها عمود واگع بالگاع...براس الشارع مال فتحة المجاري إللي ما عليها غطا...أريدك توديني هناك...
وشنو تتوقعون؟؟
طبعا السايق راح يجيبه عالوصف بدون أي تردد اللهم غير وجود إشوية حواجز كونكريتية بسبب تقسيمات إدارية ضمن أرقى المواصفات العالمية في تخطيط المدن إللي خلاها المعماري الفذ لابوركوزييه من صمم التخطيط الأساسي لمدينة بغداد ايام هيئة الإعمار...السايق راح يوصل للعنوان ولا كأنه شي تغير في الصورة العنوانية خلال أربعين سنة گضاها الخايب برة في دولة دكتاتورية مستبدة... لا ويجوز الصورة تكون أوضح والخرابة أكثر تعددا في ألوان الزبالة بسبب تكنولوجيا ديمقراطية ديجيتال .
ها صاحبي وصديقي المنتول والمنتوف (لأن صاحبي كلما يضوج ينتف شعر راسه)...
إنت دا تحچي عن عمود واحد تصلــّح بعد ربع ساعة من الحادث، مو عن وطن تبهذل وإنهان خمسين سنة...لا عمود ولا عمودين ولا شارع... إي ما تگول لي الوطن چم ربع ساعة يحتاج ؟؟ صح مليارات ربعيات ونصاصة ونص ربع ... صدگني هاي المليارات تبدا تنقص لو بدينا بأول ربع ساعة...بس المشكلة بعدنا مختلفين نحسب ربع ساعة بيا توقيت؟؟؟ توقيت قم وطهران...لو توقيت مكة المكرمة...لو توقيت غرينيتش...لو توقيت الحكم الماليزي إللي أبد ما يفتهم لا طوبة ولا بقانون التسلل ! وتعال جيب گول وي هيچ حكم!


[ندعوك للتسجيل في المنتدى أو التعريف بنفسك لمعاينة هذا الرابط]

الرجوع الى أعلى الصفحة اذهب الى الأسفل
 
حبيب العربنجي :عنوان بيتنا زي ماكان
استعرض الموضوع السابق استعرض الموضوع التالي الرجوع الى أعلى الصفحة 
صفحة 1 من اصل 1

صلاحيات هذا المنتدى:لاتستطيع الرد على المواضيع في هذا المنتدى
البيت الآرامي العراقي :: الاخبار العامة والسياسية General and political news :: منتدى المنبر السياسي والحوار الهادئ والنقاش الجاد الحر Political platform & forum for dialogue & discussion-
انتقل الى: