البيت الآرامي العراقي




البيت الآرامي العراقي

سياسي ِ ثقافي ِ أجتماعي


 
الرئيسيةالرئيسيةبحـثالتسجيلarakeyboardsyrkeyboardدخول

شاطر | 
 

  حبيب العربنجي :فرقة البرتقالة المدرعة

استعرض الموضوع السابق استعرض الموضوع التالي اذهب الى الأسفل 
كاتب الموضوعرسالة
البيت الارامي العراقي
الادارة
الادارة



الدولة : المانيا
الجنس : ذكر
عدد المساهمات : 9508
تاريخ التسجيل : 07/10/2009
التوقيت :

مُساهمةموضوع: حبيب العربنجي :فرقة البرتقالة المدرعة   الخميس 28 أبريل 2011, 1:41 am


حبيب العربنجي :فرقة البرتقالة المدرعة


27/04/2011





[ندعوك للتسجيل في المنتدى أو التعريف بنفسك لمعاينة هذه الصورة]قبل أكثر من خمسة وعشرين سنة بأشهرها القمرية والشمسية وبأيامها الهجرية والميلادية، وأعيادها الدينية والوطنية دخل إختراع الأزبري بالماكينة الكهربائية للحضارة العراقية وصرنا نشوف كل أبو محل حاط ماكينة أزبري گدام المحل مالته حتى لو هو بالأساس يبيع قنادر او گصاب والمحل مليان دم ومصارين وممبارات...بذيچ الفترة كل الشعب العراقي صاروا يتأزبرون بالأزبزري الوردي تحديدا لعدم ورود ألوان أخرى من المصدر . وصار العراقي يشوف الدنيا حلوة وردية من خلال الأزبري. ويمكن تسمية ذيچ الفترة بالعهد الأزبري بتاريخ العراق المليان نار وجهنم وإللي ما يطفيها شلالات نياگارا لو حولناها إلى ازبري بعد موافقة الحكومة الكندية.
وفرد يوم بالعهد الازبري، وآني توي نازل للمدينة، ولابس نايب عريف ودا أجر البسطال جر عبالك صاير حرف جر مو نايب عريف..وأتذكر چان شهر أغسطس (هلا بحسك) قصدي آب اللهاب أو آب المتوكل على الله إللي يعرفه كاكا مسعود من صار بوس الأچتاف والقنادر بفلس بلا حساب.. إي أتذكر چان فرد يوم عبالك معايشة جهنمية، وآني دا أمشي بشارع في مدينة عراقية جنوبية، وأشوفلك أزبري بلون خدود الجعفري ، طبعا النفس دنية ، أخذت گلاص أزبري مدا أتذكر بيش، وگمت ألطع بالأزبري عبالك شفايف اورنيللا موتي أو صوفي مارسو (حلوات جمال طبيعي مال سنة الطواعين قبل ربع قرن مو مال هسة كلها بوتكس وسليكون يطلعك المرحوم عزالدين طابو يشبه آلان ديلون)...وهووووووووووووب..ما أشوف إلا مفرزة إنضباط عسكري أخذوا مني الازبري وي هچة عسكرية محترمة لأن شلون تجرأت أكل أزبري وآني لابس عسكري ! ومن يومها ظل الازبري حسرة بگلبي وعلى شفايفي المتيبسة من حر نار الجبهات إلى ان خلصت العسكرية بخدمة ممتازة وبرتبة عريف...وإختفى الازبري من المشهد العراقي بمجىء الحصار على كل شيء في العراق حتى الازبري، ثم غياب الكهرباء عن محلات الدوندرمة ، وصارت ماكينة الازبري طشت مال اللبن وي قالب ثلج ....بررررررررررررررررد...برررررررررررد يا ولد !
يعني الجيش ما چان لا جيش محمد عاگول ولا البيش مرگة هوا ولا جيش المهدي ولا جيش كيويلية ، ولا چانت أكو بكل تشكيلات الجيش العراقي فرقة البرتقالة المختصة في الأعياد الوطنية والدستورية وغير الدستورية علماً أن الأعياد الدستورية العراقية عبالك نسخة قوبيا من الأعياد الدستورية الإيرانية...
وأكيد وصلكم الإيميل مال جيش الكيويلية (ضباط ولا فيفي عبدو وجنود ولا رگصة خناجر مال المستورة ملايين)...ما اعرف بيا معكسر لو بيا لواء أو فرقة، والله لو بفرقة أم علي للدنابك مو هيچ...و لو نجيب علاء سعد وي كتيبة البرتقالة مالته ونلبسهم ملابس الجيش العراقي مال هالوكت ما راح يسوون هيچ سواية...يمعودين الجيش يعني إنضباط وإحترام لعد بس عليّ الإنضباطية وخسروني أزبري في عز الصيف اللاهب !! أويلي عالزمن من يندار ...آيباااااااخ لو داينمو الزمن العراقي عالكهرباء !! هسة چنا لا تغيرنا ولا شي لأن الداينمو مجيم صار له سنوات وما راح يفتر من جديد...بس نظل نجر حسرات كل ما نگول لو...لو..
وآني أگول الجيش العراقي صار خرنگعي من يوم ما طلع نايب ضابط درجة سادسة يعزف على المطبگ گدام قائد الضروطة إللي چان القائد العام للقوات المسلطة، وبعد اشوية دخل ضابط برتبة نقيب للچوبي، إلى أن صاحبنا المزروف الكشن القاعد العام للقوات المسلطة القائد الضروطة ما أتحمل وچيت للچوبي...بذيچ اللحظة الچوبية قرينا الفاتحة على روح الجيش العراقي ...
آني بطول عمري ضد الجيش وإهانات الجيش، بس يظل الجيش بهيبته، وشحلاة الطالب بالكلية العسكرية بقيافته الشتوية أو الصيفية وينزل للمدينة، بجسمه الرياضي الجميل، وقيافته والبنطرون المكوي، يدخل للدربونة بهيبة بس يخجل تشوفه بنت الجيران وهو مزين زيرو، وفي المساء چانت تجي بنت الجيران بأي حجة حتى تحسس إبن الجيران الطالب في الكلية العسكرية أن هو هسة أحلى لأن صار رجال....وما أعتقد هسة بكل العراق أكو بنت الجيران تفتخر لأن حبيبها أبو الكرش ضابط باجيش العراقي المفدرل.. صنف الكيويلية...وهو أحسن بزاغ وراگوص بالجيش بدليل الناس گاموا يتفرجون رگصته على اليو تيوب.
الله عليك يا جيش العراقي...من الفرقة المرعبة العاشرة....إلى جيش فرقة البرتقالة
إليكم رابط الحفلة...مع هلهولة للديمقراطية بچيس مال زبل.

[ندعوك للتسجيل في المنتدى أو التعريف بنفسك لمعاينة هذا الرابط]
................

الرجوع الى أعلى الصفحة اذهب الى الأسفل
 
حبيب العربنجي :فرقة البرتقالة المدرعة
استعرض الموضوع السابق استعرض الموضوع التالي الرجوع الى أعلى الصفحة 
صفحة 1 من اصل 1

صلاحيات هذا المنتدى:لاتستطيع الرد على المواضيع في هذا المنتدى
البيت الآرامي العراقي :: الاخبار العامة والسياسية General and political news :: منتدى المنبر السياسي والحوار الهادئ والنقاش الجاد الحر Political platform & forum for dialogue & discussion-
انتقل الى: