البيت الآرامي العراقي




البيت الآرامي العراقي

سياسي ِ ثقافي ِ أجتماعي


 
الرئيسيةالرئيسيةبحـثالتسجيلarakeyboardsyrkeyboardدخول

شاطر | 
 

 انا اخوكم من الفئه الباقيه / والبقاء لله : أخوكم شمخي

استعرض الموضوع السابق استعرض الموضوع التالي اذهب الى الأسفل 
كاتب الموضوعرسالة
Dr.Hannani Maya
المشرف العام
المشرف العام



الدولة : العراق
الجنس : ذكر
عدد المساهمات : 37598
مزاجي : أحب المنتدى
تاريخ التسجيل : 21/09/2009
الابراج : الجوزاء
التوقيت :

مُساهمةموضوع: رد: انا اخوكم من الفئه الباقيه / والبقاء لله : أخوكم شمخي   الأحد 01 مايو 2011, 4:54 am

أنا أخوكم من الفئة الباقية في بغداد والتي لم تهاجر او تذهب الى بلد شقيق تجد ابعد مكان عن بغداد ...لتأمن على افرادها ..بقيت وعائلتي في بغداد الحبيبة حبا بها اولا وكرها لتركها ثانية (اخاف على بيتي وما اكدر ابيعه) وخوفا من المجهول خارج اسوارها وخاصة أنه لم يكن لي ما يؤمن المعيشة في بلاد الغربة او حتى الوصول اليها ولكم اقولها امانة في عنقي ....كيف او نعيش في...بغداد الان





1- الدخل الشهري : ما يكفي لعائلة من اربعة افراد وطفل ان تعيش في بغداد الان هو بين 800000 اي حوالي 700$ الى 1100000 اي حوالي 950$ وهو ما يكفي للطعام فقط (كيلو اللحم 16000 يعني 13.5$ بس اقل فاكهه 2000 دينار للكيلو)






2- السكن : اذا لم يكن للعائلة ماوى فحاجتها الى ما بين 600000 اي حوالي 500$ الى1000000 اي حوالي 900$ شهريا وهو حال ربع عوائل بغداد





3- الكهرباء : في اوقات الصيف تحتاج العائله ما بين 250000 اي حوالي 200$ الى 400000 اي حوالي 340$ لدفع اجور الكهرباء وهي الكهرباء الماخوذة من مولد الشارع من الساعة الثانية ظهرا الى الساعه السادسة صباحا علما ان كهرباء الوطن هي اربع ساعات متقطعة يوميا(متفيد حته ابو الشاميه) طبعا هذا الكلام اذا انطوها





4- النقل والبانزين (تنباك بالبانزين خانه لو تطلع نخلة براسك وتطلع انته الممنون) لملء الخزان تحتاج ما بين 30 الى 50 دولار ويكفي لاسبوع (هاي بدون مولدة البيت الاحتياطية اذا عالبانزين) واذا لم تكن لديك سياره (اكيد لازم تكون ام التبريد) فالنقل الخاص مع كثرته بدون رقابة او تسعير رسمي (اذا تريد تروح من البياع لباب المعظم روحه وجيه تحتاج 5000 واذا تكسي 18000)





-5


الوضع الامني: حالنا حال كل العالم مع فارق بسيط (حييييييل)وهو ان القانون عباره عن اجتهادات شخصيه (من المرور والحرس الوطني) (بحيث انته اذا مشغل تبريد وتوصل يم السيطرة لازم تنزل الجامه باعتبار احترام حته لو ميوكفوك ويطير الهوة البارد من السيارة ......وبما انه كل 200 متر سيطرة فماكو داعي تشغل تبريد اصلا ) اما بالنسبه للوقوف قرب الرصيف وشراء سندويج فلافل مثلا فممنوع منعا باتا (تخيل صارت المطاعم كلهه تيك اوي ....يعني تطور مو طبيعي) واذا اردت انزال شخص من السياره مثلا فيجب ان ينزل خلال 3 ثواني (مثل لعبة السله ممنوع اللاعب يلزم الطوبه اكثر) والا وجدت نفسك محاطا بـ (عشيره) من المرور(القفاصه) والحرس الوطني (رجال القانون) لينهالو عليك بالشتائم.
واما اذا عطلت السيارة(ما اتمناهه للعدو) فيجب عليك دفعها حتى لوكنت لوحدك الى اقرب شارع فرعي (متروس جذوع نخل وميخلوك توكف وانته تخيل) لتجد اصحاب البيوت يقفون لك بالمرصاد وبكل احترام (اخويه طلعهه منانه حته لو عاطله تره اخابر على 130 وافوتك ارهاب) بحيث لا يمكن ان تعرف ما سيحصل (كلشي بعلم الله) واذا وافق مشكورا فيجب عليك ان (تنفض السياره نفض كدامه). اما عن طريقه الانتقال من منطقه لاخرى فيجب عليك السؤال كيف اذهب الى تللك المنطقة لانك دوما تفاجىء بتغيير مكان الدخول الى تللك المنطقة وهي من مستلزمات الخطة الامنية (كل منطقة مطوقة بسياج كونكريتي خاص بها وتحتوي على منفذ دخول واحد وخروج واحد وهي طبعا لتعويد العراقيين اولا على البيت الواحد وثانيا على السجون






7- المعاملات :يكفيك 400 دولار للحصول على جواز و100 دولار لهوية الاحوال و200 دولار لشهادة الجنسية ومبلغ 20 دولار رشوة لاقل موظف ليقوم بعمله مثل التوقيع او تمشية المعاملة اصوليا واما ان لم تكن المعاملة اصولية (هاي اللي الله كتبهه عليك) فالفارق هائل قد يصل الى 4000 دولار



8- السيارات: لحد الان لم يتم تسجيل السيارات الداخلة الى العراق بعد السقوط رسميا (نسميهه منفيس) وتكون ذات رقم اسود (والشغله تايهه) اما اذا اردت ادخال سيارة حديثة الان فتحتاج الى 5000 دولار على الاقل لتسقيط سيارة وتسجيل الجديدة ( ومو باسمك باسم صاحب المنفيس) حيث وصل سعر الرقم الابيض الى 4500 دولار (وماكو) والرقم الاصفر الى 7000 دولار. واذا اردت شراء سيارة من الشركه العامه للسيارت (يكلم) فيطلع الحساب يك حساب والسيارة بدون مواصفات تذكر (سيارات زبل ايراني وصيني مثلا البيجو موديل محركهه 67) والقياس للقارئ الكريم



-9

البيوت والاراضي مرت بمرحلة وصل سعر بيت في منطقة الري الى عشرين الف دولار اما الان فمتر الارض بين 800 دولار الى 3000 دولاروالبيوت كلهه مشاع يعني حصص ونادر ماتلكه بيت تشتريه وكل الورثه موجودين لان اكيد واحد منهم انعلس



10- العلاج والمستشفيات(احسنلك متتمرض وتموت بمفخخه عالسريع) لان العلاج فاشل وشركات الادوية هي من اسوأ الشركات في العالم والاطباء جيدين (بس شلون يخيط الخياط بس بالابره) مع هروب العديد منهم خوفا من الخطف وليس القتل (اكيد هذا الطبيب عنده هواي فلوس). اما عن العيادات الخاصة واللي اذا تريد تحجز بيها عند طبيب معروف (يوزع ارواح) فينرادلك تروح من الساعة السادسة صباحا وتلزم سره حتى يجيك السكرتير بالعشرة ويسجل اسمك بقائمة ويكلك تعال بعد شهرين. اما قيمة الكشف لا تقل عن 20$ ويلحكها المختبر والاشعة 200$ وبعدين يكتبلك وصفة تاخذها من الصيدلية اخت البلاش 200$ على الاقل



-11

هاي كلها وما احجيلكم على سعر جلكان النفط ابو 20 لتر 15$ والمدرس الخصوصي اللي ما يقبل الطالب بمجموعته الا 300$ على اقل تقدير والمدارس الاهلية اللي صارت بكل منطقة وسعر السنة بيها يوصل الى 1000$ واكثر. وخرجية الجهال اللي ما تقل عن 2$ على الاقل. وطلبات المدرسة اللي ما تقل عن 20$ شهريا والحبل على الجرار.



12- الاعلام حر ومقيد في نفس الوقت حاله حال الطفل ان صرخ فيجب لطمه وان تكلم فيجب ان لا يتكلم كثيرا وان خرس فالاحسن له



13- المسؤلين: بعد ثمان سنوات (كل من جلس على كرسي المسؤولية فهو حرامي ابن حرامي 100 بالميه وابو النخله والفسفوره مع مرتبة الشرف) والكل يسرق من موقعه سواء من رواتب الموظفين وهميين اوارضا كانت للدوله او طلب شراء لمواد تحتاجها مؤسسته (مثل مؤسسة السجناء السياسيين والشهداء وغيرها وغيرها والقصص توكف العقل....واذا الشغلة مو ضعف فلوسها ميشتروهه) وموائد الغداء (مثلا مائدة غداء وزير الدفاع (ليس هو فقط المقصود لكن اللي اعرف شي عنه) تصل الى 25000000 اي 20000 عشريييين الف دولار يوميا!!!!!!!!!!!!!! ( قابل الاكل مستورد من المريخ ومستوي بالشمس وخاليله بهارات من القمر) وكلما سقط وزير او مسؤول ليجد الكرسي نفسه فارغا ومرتاحا لبضعة ايام يأتي الآخر (ويطلع اضرب بميتين مره) وعلى هذا المنوال (صار ثمن سنين) واما عن افراد الحماية في الشارع في مواكب المسؤولين (فدير باللك توكف كدامهم تره تروح قضية ارهاب) فبلا اخلاق اصلا وبلا اسلوب اساسا (مره اجه وزير الكهرباء على محل انارة براس شارعنا ...وكف بنص الشارع هو والموكب مالته وسدو الشارع ونزل الافندي على المحل اللي فاتح كلوبات كومه واضويه اناره وتبريد ... فات للمحل سلم ..همزين ........ كله لابو المحل هاي ليش فاتح هلكد اضويه....ابو المحل انصدم جاوبه كله اني مشغل المحل من المولد الشخصي مالتي ......... الوزير بكل عين وقحه كله واذا تجي الوطنيه تطفي شي ابو المحل كله ليش اطفي وهيه تجي ساعتين باليوم ورة ما اني ااعزل ..... الوزير كله انته دافع الورقه مال الكهرباء ... ابو المحل طلعهه وشوفهه للوزير ... اي دافع .... الوزير الخوش ادمي اندار عالحمايه مالته كلهم اقطعو كيبل الكهرباء الوطني مال هذا المحل!!!!!!!!!!!!!!!!!!!!!!!!) وهذي الحادثه حصلت امامي ( وانتو قيسو عالمسؤول العراقي ابن العراقي)



اخواني واخواتي .......اخيرا هذا بلدكم ويتمنى رجعتكم ......ارجعو لكن رتبوا اموركم ولا تنصدمون بالواقع مباشره.



اخوكم شمخي
الرجوع الى أعلى الصفحة اذهب الى الأسفل
 
انا اخوكم من الفئه الباقيه / والبقاء لله : أخوكم شمخي
استعرض الموضوع السابق استعرض الموضوع التالي الرجوع الى أعلى الصفحة 
صفحة 1 من اصل 1

صلاحيات هذا المنتدى:لاتستطيع الرد على المواضيع في هذا المنتدى
البيت الآرامي العراقي :: الثقافية , الادبية , التاريخية , الحضارية , والتراثية Cultural, literary, historical, cultural, & heritage :: منتدى قرأت لك والثقافة العامة والمعرفة Forum I read you & general culture & knowledge-
انتقل الى: