البيت الآرامي العراقي




البيت الآرامي العراقي

سياسي ِ ثقافي ِ أجتماعي


 
الرئيسيةالرئيسيةبحـثالتسجيلarakeyboardsyrkeyboardدخول

شاطر | 
 

  حبيب العربنجي :سارو دگم بصوزة *

استعرض الموضوع السابق استعرض الموضوع التالي اذهب الى الأسفل 
كاتب الموضوعرسالة
البيت الارامي العراقي
الادارة
الادارة



الدولة : المانيا
الجنس : ذكر
عدد المساهمات : 9517
تاريخ التسجيل : 07/10/2009
التوقيت :

مُساهمةموضوع: حبيب العربنجي :سارو دگم بصوزة *   الإثنين 02 مايو 2011, 12:52 am


حبيب العربنجي :سارو دگم بصوزة *


01/05/2011




[ندعوك للتسجيل في المنتدى أو التعريف بنفسك لمعاينة هذه الصورة]هسة تأكدت ليش إنضحك علينا بالدستور من طلعنا وگلنا إيييييييييييي للدستور وإحنا كل شي ما نعرف ونستحي نگول يا جماعة ترى إحنا ما قرينا الدستور مال الرفيق حجي همام لان إحنا ما نعرف نقرا ولا نكتب، ترى إحنا بس كلش شاطرين بطگ الإصبعتين للديمقراطية في ساحة الفردوس المخصصة لعروض سيرك مهرجي وقرود الديمقراطية.
وهسة عرفت ليش طلعنا مرتين للإنتخابات وياهو نشوفه ماخذ خوش بوز وچهرته فوتوجانيك وحاط خوش ريحة بالصورة گلنا إي هذا إللي نريده...من غير ما نعرف شنو إسمه ومن وين گرعة ابوه من فوگ لو من جوا...وشنو قياس قندرته هذا إذا لم يكن من المستفيدين من النعال الحكومي أيام الأزلام...وچان يستلم الحصة النعالية السنوية من تاجر النعلان شخصياً !
وهمين...توي عرفت ليش ما عدنا بتاريخ الدراما التلفزيونية العراقية شي أحسن وأصدق وأفضل من التحفة العراقية (تحت موس الحلاق) لأن إحنا بالحقيقة كلنا مثل الحجي راضي..راضين بقسمتنا الديمقراطية...وكلنا (تحت دوس الچلاق)...چلاليق الحكومات وچلاليق الديمقراطيات والشعارات والهوسات...و هيوات " إحنا البير إحنا بالك تهوي وتوگع بيه" ..تالي طلع البير مالتنا مركبين عليه مصعد وإحنا نايمين أشو نازلين وصاعدين وماخذين خيرات البير وإحنا بعدنا نهوس هوساتنا الوطنية والقومية والدينية واللطمية...حتى هيثم يوسف عاف البير وراح...وأرتاح .
تسعة ملايين عراقي ما يعرفون يكتبون أساميهم ولا يقرون حرف ، وطبعا هذا من صالح الإنتخابات لأن هذولة يروحون عامي شامي ويبعصون الديمقراطية بأصبعهم الإنتخابي وهمّ ما يدورن البعصة وين راح تجي ...صح هذا الرقم تراكمي مو مال يومين وثلاثة ايام، بس كل إللي شاركوا في مهزلة وزارة التربية يتحملون هذا الرقم... من أيام ما چان المسودن الكيويلي عبدالفلاح وزير التربية (قبل ما يبوگ الحصة) وبعدين إجى أعجوبة التخلف الدعوچي خضير الخرائي من كوّم قذارته بنص منهج التربية ولحد هسة نفسنا تلعب شلون نشيل هاي القذارة ..بالعمامة لو باللحية..
عيوني النوام والنائمات.....يابة هاي الأرقام وبيديكم وقبل ما توافقون على خضير الخرائي للمنصب الجديد إو توافقون على أي واحد من كتلته القذرة...جيبوه وخلي يگول شنو چانت الخطة مالته من چان وزير التربية غير تدريس أصول اللطم في المدارس الإبتدائية ومعرفة نوع الزنجيل (او الزنجير حتى لا يزعل علينا غالب زنجيل) الأصلي الإيراني من التقليد التايواني...سألوا ولكم الخايبين شنو كانت خطة وزارة التربية السنوية لتخفيض نسبة الأمية بالعراق في العهد البوري الأول - الوزارة السابقة – وأگص إيدي بسچينة عمية ومزنجرة وخلي يصير بي گزاز وگرگرينا إذا يگدر يجاوب حتى بالإستعانة بدعاء الجوشن لو يجي للبرلمان لابس عباية خضرة مقري عليها بصوت الرادود ابو عبدالامير الأجقم ونغمة موبايل مالته حيدر حيدر..أو عبود كنبر...بس للتوضيح (حيدر حيدر) إسم لكاتب سوري عنده رواية (وليمة لأعشاب البحر) وآني ما أعرف غيره أسمه حيدر حيدر.
وبعدين شنو هذا البلد إللي مليان شهادات مزورة...خمسين ألف شهادة مزورة هاي إللي نعرفها وإللي ما نعرفها اكثر من هذا العدد...وينكم نوامنا ونائماتنا المستورات...جيبوا أسماء هذولة الخمسين الف وبكل جلسة أقروا إسم الف واحد وي إسم الجهة الحزبية مالته وبعدين نشروا الأسماء في الجرايد حتى الفضيحة تصير ولا فضيحة رزان مغربي على اليوتيوب من گامت تلعب لعب خشن جوا الحزام وي البوي فريند مالتها... من وين إجت هاي الشهادات و طبعا شهادة وزير التربية وحدة من هاي الشهادات الخمسين ألف وهاي متأكدين منها بدليل معالي خضير يذكر على الموقع مالته اسماء جامعات دارس بيها ما موجودة على الخريطة الاكاديمية العالمية لا في تصنيف شنغهاي للجامعات ولا في تصنيف الحوزة للكيشوانيات، وهمين ذاكر أسماء عمداء كليات ما موجودين إلا في سوگ مريدي.
وأعتقد هسة من نشوف الحجي راضي وهو دا يقرا الرسالة التاريخية من كلكوتا ما حد بينا راح يضحك مثل ما چنا ...لا هالمرة تسعة ملايين مشاهد راح يحسدون الحجي راضي لان دا يگدر يقرا رسالة حتى لو (أمي العزيزة) صارت (أمسي الفريزة)... وهاي تاليها صفت على گولة الرائع فؤاد سالم الله ينطيه الصحة والعافية (بس خاطر الله بلا باروكة لأن ما لايگة عليك)...صدگ هاي تاليها صفت ...بس مثل ما يگول ابو المثل (الماطور چتال صاحبه) يعني هذولة التسعة ملايين واحد ما يعرفون يقرون ولا يكتبون نطرحهم من الحساب من الجماعة يريدون يطبعون شعارات إنتخابية ...وبدال ما نخسر ربع مليار دولار بجيب حمدية إلحَ...سيني (وهي شلون جيب عدها يا ستار...همر مو جيب) أو تحت جاكيتة المهندسة الديمقراطية أمل أنور...إللي أخذت الديمقراطية مقاولات شلع بجيب المحروس والمحروسة !.. بدال هاي ما راح نطبعها أصلاً وهاي هي فائدة الأمية...ويجوز من هاي أستقالت حمدية بعد ما لحست الديمقراطية وي حبيب أمه الفروج الحيدري .
وإذا استمر معدل زيادة فلتان التربية بالعراق بهذا المستوى الراقي إللي يليق بحكومة رشيدة راقية قياس 42...راح نصير من صدگ (فلفين نـَحـّوي)* لأن هاي الأرقام تخوف ومقلقة حتى بدون (نحوي) .
يابة وداعة الغالية والغالي عدكم (يعني إيران العزيزة وأحمدي نجاد الغالي )...ما نريد منكم كل شي ولا دگم بصووووووووزة....بس خلونا أشوية نحس عدنا وطن وعدكم غيرة عالوطن....بس لا تخلونا ولا (تيفو)*...
..................
أشوية معاني كلمات لغير الناطقين بالعراقية...أو لجيل ما بعد تحت موس الحلاق
سارو دگم بصوزة : سأزودكم بصورة*
فلفين نـَحّوي : قلقين نـَحوي*
* ولا تيفو: صدگ ولا تيفو....لأن لو تيفو چنا ناخذ تطعيم ونرتاح...حتى لو تطعيم ضد داء الكلاب
....................
[ندعوك للتسجيل في المنتدى أو التعريف بنفسك لمعاينة هذا الرابط]

الرجوع الى أعلى الصفحة اذهب الى الأسفل
 
حبيب العربنجي :سارو دگم بصوزة *
استعرض الموضوع السابق استعرض الموضوع التالي الرجوع الى أعلى الصفحة 
صفحة 1 من اصل 1

صلاحيات هذا المنتدى:لاتستطيع الرد على المواضيع في هذا المنتدى
البيت الآرامي العراقي :: الاخبار العامة والسياسية General and political news :: منتدى المنبر السياسي والحوار الهادئ والنقاش الجاد الحر Political platform & forum for dialogue & discussion-
انتقل الى: