البيت الآرامي العراقي




البيت الآرامي العراقي

سياسي ِ ثقافي ِ أجتماعي


 
الرئيسيةالرئيسيةبحـثالتسجيلarakeyboardsyrkeyboardدخول

شاطر | 
 

  حبيب العربنجي :شجرة الزقوم...

استعرض الموضوع السابق استعرض الموضوع التالي اذهب الى الأسفل 
كاتب الموضوعرسالة
Dr.Hannani Maya
المشرف العام
المشرف العام



الدولة : العراق
الجنس : ذكر
عدد المساهمات : 37598
مزاجي : أحب المنتدى
تاريخ التسجيل : 21/09/2009
الابراج : الجوزاء
التوقيت :

مُساهمةموضوع: حبيب العربنجي :شجرة الزقوم...    الثلاثاء 24 مايو 2011, 3:47 am


حبيب العربنجي :شجرة الزقوم...


23/05/2011





[ندعوك للتسجيل في المنتدى أو التعريف بنفسك لمعاينة هذه الصورة]أكو نكتة عراقية تگول...چانت أكو مزرعة مال جزر، وكل يوم يگعد الفلاح ويلگي الجزر معضوض وماكول...يوم يومين..راقب المزرعة وشاف مجموعة من الارانب دا تجي للمزرعة بالليل ياكل ويگرط الجزر...وحلف براس السيد (حذفت الرقابة إسم السيد )
راح يمسك بالأرانب ويشلع سنونهم (شلع السن هنا لا يعني شلع السن بالمصطلح العراقي أيام الأزلام من چان واحد يفلت بطريقة غير قانونية من العراق ويگولون فلان شلع سنه).
المهم...گدر هذا الفلاح العصبي وبمساعدة من الدول الجوار – أقصد البساتين المجاورة - أن يمسك بالأرانب ويشلع أسنانهم كلها..وعافهم بس حتى يخرب ضحك عليهم وهم بلا سنون. وثاني يوم گعد وراح للمزرعة فرحان بنصره المؤزر...وإنصدم من شاف الجزر كله مهروس ومجعوص والأرانب گاعدة تباوع عليه وخربانة ضحك...حتى أجى كبير الأرانب وگال " ولك مصخم...شنو عبالك ما نعرف نسوي عصير " ...
إنتهت النكتة ...بس مهزلتنا ما انتهت..لأن إحنا صايرين المسرحية الكوميدية العبثية إللي ما كتبها بيكيت ولا يوجين يونسكو ...إحنا النكتة الديناميكية إللي ما تصير إكسباير ولا تموت بموت الأشخاص والأصنام والرموز..لأن المهم السيناريو إللي ما نعرف منو كاتبه...يعني ممكن إحتمال نعرف شخصية الرفيق دبش... بس ما راح نعرف كاتب السيناريو مال المهزلة العراقية لو يجي العزير صاعد عالريل !..
يا جماعة...اكو شي أسمه شجرة الإخفاقات...وهاي مو مثل شجرة العائلة إللي ياهو تلزمه يطلـّع لك فرع من شجرة النبوة وينصب نفسه سيد سادات قريش عبالك هو إللي حارب ابرهة مو عبدالمطلب بحسب مسلسل على هامش السيرة تأليف طه حسين تمثيل أحمد مظهر...غناء ياسمين الخيام...لا شجرة الإخفاقات غير شي وإللي يتمسك بيها يصير براسه خير مو يصير سيد مثل شجرة العائلة مال السادة مال سوگ مريدي إللي ما يشورون وراسهم أبد مو حار حتى لو تصب عليهم قير...شجرة الإخفاقات أو بالإنگليزي FAILURE TREE ANALYSIS هي لدراسة أسباب الفشل في حال حصول حادث أو إخفاق أو فشل في مشروع أو خطة معينة ..ومثل ما تشوفون أن العراق أكبر ساحة للإخفاقات والفشل وعلى كافة المستويات الرسمية والشعبية والسياسية والإخلاقية والدينية وحتى الجاجيكية...طبعاً الجاجيك همين ينصاب بالإخفاقات وخاصة في موسم البيتنجان والتعروزي...وخلونا نحچي ضربة حرة مباشرة مثل مال كريستيانو رونالدو.. يعني إحنا الكل متفقين على شي واحد...وهذا الشي ما يخص لا خلافة علي ولا عمر....ولا الروافض أو النواصب...ولا أهل السنة والجماعة وأهل الميكروفون والسماعة (يعني الرادود)...الكل متفقين على وجود الفساد بالدولة ...عبالك هذا الفساد مثل البكتيريا مال المعدة لازم تكون موجودة حتى نهضم الأكل...والفساد لازم يكون موجود حتى نتحمل الوطن!.. والكل شايل سيفه ويحارب الفساد...مو مهم إذا السيف مزنجر أو سيف خشبي أو هوائي مثل مال دون كيشوت...بس ياهو يجي يوگف گدام الشاشة صار هو الديتول إللي يحارب الفساد...زين ولكم ولاد المستورات..ليش ما حد بيكم جاب طاري جذر المشكلة أو Root Causes حتى نقطعها ونخلص من المشكلة لأن شجرة الفساد راح تيبس وتموت إذا ماكو جذور تغذيها؟؟
إي مو الفساد بالعراق دا يتغذى عن طريق مليون جذر وجذر...مو جايين تگطعون چم ورقة هنا وهناك...ولكم الغشمة شنو ما قارين درس الزراعة في الصف الثالث الإبتدائي شعبة جيم إذا الشجرة تگطع أوراقها راح تكبر أسرع وتصير أقوى وراح يطلع بدال الغصن ثلاثة أغصان لو أكثر!! شنو أنتو لا بالزراعة ولا بالصناعة ولا بالصگلة ؟...شنو بس تعرفون العمامة چم دورة عالراس لو شنو الطول الشرعي للدشداشة لو الموس جيليت حلال لو الشيرة الشرعية وخاصة للأماكن الحساسة؟ گبرررررررررررررر بالخرابة آمين حتى تبول عليكم الچلاب وأنتو جيف.
عيوني التعبانات إللي إنعمت من الحسرة...عيوني أنتو...خلونا اشوية نرجع لدرس الزراعة مال الإبتدائية وكل واحد يلزم كرك ويحفر بالمكان إللي هو واگف عليه...لأن أكيد أكو فساد حتى لو هو واگف بمحراب جامع لو منبر حسينية...الكل فاسدين...وخلونا نحفر حتى نلگي جذور الفساد ونگطعها و خلي تموت اشجار الفساد إللي محملة زقوم..حتى بالقرآن مذكورة شجرة الزقوم إللي طلعها كأنها رؤوس الشياطين...وهسة دا نشوف إشگد رؤوس شياطين عدنا بالعراق...عمائم...طرابيش...قذارات...كلها رؤوس شياطين...مو تگولون دين وديانة؟ زين ...جاي وياكم....أكيد أنتو تفسير رؤوس الشياطين...وأكيد شجرة الزقوم هي الفساد لأنها تطلع في أصل الجحيم...وهسة ماكو على الطوبة الأرضية مكان يستحق يصير أصل الجحيم غير العراق العقيم .
الحل في الزراعة...هذا مو شعار جمعية الفلاحين مال الرفيق خالد البدر أيام الأزلام..بس صدگوني إذا نريد نخلص من الفساد بالعراق لازم نتعلم فنون الزراعة وكيفية قطع الجذور...ومدا أقصد الحل عد الوزير أبو السكسوكة الموصلية إللي ما أظن يعرف الفرق بين الحنطة والشعير ...بس الحل بيدينا...خلونا كل واحد يشيل الكرك مالته ويبدي يحفر...و راح نلگي جذور شجرة الزقوم أو الفساد حتى نقطعها ونخلص من رؤوس الشياطين إذا نريد نتحرر من أصل الجحيم .
هذا قصدي من شجرة الإخفاقات...وللمعلومة...قبل يومين فاز فلم أسمه (شجرة الحياة) بالسعفة الذهبية في مهرجان كان السينمائي...وإذا إحنا نسوي حملة شجرة الإخفاقات...أكيد راح نفوز بالجائزة الكبرى لمهرجان الحياة...مو بس السعفة الذهبية... حتى ما نصير مثل ذاك الفلاح وي الأرانب... لو تريدون تضحك علينا حتى الواوية !! بكيفكم !


[ندعوك للتسجيل في المنتدى أو التعريف بنفسك لمعاينة هذا الرابط]


الرجوع الى أعلى الصفحة اذهب الى الأسفل
 
حبيب العربنجي :شجرة الزقوم...
استعرض الموضوع السابق استعرض الموضوع التالي الرجوع الى أعلى الصفحة 
صفحة 1 من اصل 1

صلاحيات هذا المنتدى:لاتستطيع الرد على المواضيع في هذا المنتدى
البيت الآرامي العراقي :: الاخبار العامة والسياسية General and political news :: منتدى المنبر السياسي والحوار الهادئ والنقاش الجاد الحر Political platform & forum for dialogue & discussion-
انتقل الى: