البيت الآرامي العراقي




البيت الآرامي العراقي

سياسي ِ ثقافي ِ أجتماعي


 
الرئيسيةالرئيسيةبحـثالتسجيلarakeyboardsyrkeyboardدخول

شاطر | 
 

 حبيب العربنجي: الــكــــرتة

استعرض الموضوع السابق استعرض الموضوع التالي اذهب الى الأسفل 
كاتب الموضوعرسالة
البيت الارامي العراقي
الادارة
الادارة



الدولة : المانيا
الجنس : ذكر
عدد المساهمات : 9469
تاريخ التسجيل : 07/10/2009
التوقيت :

مُساهمةموضوع: حبيب العربنجي: الــكــــرتة    الجمعة 27 مايو 2011, 12:00 am


حبيب العربنجي: الــكــــرتة


25/05/2011




[ندعوك للتسجيل في المنتدى أو التعريف بنفسك لمعاينة هذه الصورة]آني احبك وأموت في حبك...بس إنت مشبعني چلاليق ودفرات ومطمسني في الخياس والزبل...
شنو عبالكم هاي حزورة لو فزورة من فوازير " إضحك مع الديمقراطية " من بطولة الجوگة التعبانة...تمثيلاً وإخراجا وأداءاً ...لا...بس هذه هي بالضبط حالتنا وي الحنونة جداً مولانا ومولى اللاطمين إيران المعظمة والمحروسة بجاه الأئمة
المعصومين والائمة نص ردن...أو حتى الائمة نص دشداشة ونعال أبو الأصبع...بشرط الأظافر صار إلها سنين ما شايفة مگراضة ! هذا شرط من شروط العصمة مال سوگ مريدي ومدينة آل ممة !
شنو الموضوع !!
جماعتنا ما يتركون أي فرصة لنيل رضا إيران إلا ويوسعوها أكثر حتى الكل ياخذ مكانه بهاي الفرصة (ومو كل واحد يگدر يوســّع ..هاي ينرادلها مختصين في عملية البواســـير) ...إلى درجة صارت أعيادنا الدينية والقومية نفس أعياد إيران المقدسة..وصرنا نلبس مثلهم نحرم الباينباغ ونقدس المحابس ونستحرم معجون الحلاقة ونلغي الألوان من الحياة العامة ..وصرنا نعرف إسم مدير بلدية طهران وما نعرف إسم رئيس جامعة بغداد أو الموصل او البصرة (آخر إسم لرئيس جامعة البصرة أتذكره چان البروفسور داخل حسن جريو) ...لا.. النوب وصل الامر إلى إلغاء شركات مثل سيمنز و ميتسوبيشي وجنرال إلكتريك وشنايدر من تعاقدات وزارة الكهرباء وصرنا نركض ركضة طويريج بإتجاه الخبرة الإيرانية في الكهرباء...وزارة الكهرباء توقع أربع مشاريع عملاقة وي إيران لتزويد العراق بالكهرباء وإعادة الحياة لشبكات كهرباء العراق...يمعودين والله إذا أصدگ خامنئي يگدر يخلي نادي الصويرة يفوز على نادي برشلونة ما راح أصدگ إن إيران تگدر ترجع إلنا الكهرباء ! أو أكو خبرة إيرانية تعرف الفرق بين القدرة الكهربائية والطاقة الكهربائية...ولا أعتقد أكو بوزارة الكهرباء العراقية من جماعة القرار والعقود واحد يگدر يعرف شنو معنى القدرة الكهربائية..يمعودين الخيــّر إللي بيهم يقرا القدرة الكهربائية القندرة الكهربائية... وسبحان إللي نطى هالسحر للحرف يغير من القدرة إلى القندرة.
وبنفس الوكت من چان خبر هذا التعاقد على الشاشة (سب- تايتل) ...چان الخبر الرئيسي في نشرة الأخبار على القناة الحكومية الرسمية..أو ببغاء لببغاء الحكومة... هو الإعتداء الإيراني – الله اكبر والله هيج سمعت – على المياه الأقليمية العراقية (مو عبالكم اقليم كردستان ...ليش كل أقليم اقليم...لو كل نعال يعتبر أبو أصبع ؟ يمعود چم مسئود شاطر عدنا؟ باربا الشاطر خلــّف بس واحد..كاكا مسئود)...قوارب مسلحة إيرانية تدخل مياه محافظة البصرة وتعتقل أربعة صيادين عراقيين...بس الخبر حلو من ناحية لان هذا تأكيد على وجود أشوية ماي بالبصرة...يعني مو كلها جفت وصارت حقول لإنتاج الملح الملوث...وفرحت لأن هي المرة الأولى وأكيد الأخيرة نسمع كلمة (إعتداء إيراني) على القناة الرسمية العراقية...ويمكن المحرر الصحفي للخبر چان مقندل و هسة راح بالزلگ لإستخدامه هاي العبارة الغليظة مع الجارة الودودة الرقيقة الوديعة إيران - الصلوات واجبة يا أمة محمد - ! والحمد لله چان وطني يعمل في ذيچ اللحظات التاريخية وسمعت هاي العبارة على التلفزيون العراقي...ويمكن (وطني يعمل) چان نوع من الدعاية لتلك المشاريع الكهربائية وي إيران...صاحبة التاريخ الطويل في المشاريع الهندسية اللطمية...مليون لاطم و..طـــوّاط...قصدي ميگا واط.
شفتوا شلون هي مو حزورة...بس هي هاي حالتنا إللي مضيعين راسنا من رجلينا لأن العباية الحوزوية كلش طويلة وصرنا ما نشوف رجلينا ، وراسنا مقبغ بالعمامة السودة إللي لازم نسميها الغمامة السودة بسبب ما جابت من سواد لأرض السواد.. الدولة (هاي في حالة بعدنا دولة بعلم واحد ودستور موحد...وولاء وطني واحد) بيديها مفاتيح اللعب وي إيران (إي مو كلهم مال الگهاوي)...نگدر نضبطهم لو نكتل الدوشيش بيديهم...يوم إللي نشوفهم يلعبون لعب خشن لو خطر... دا تجي مواد كيمياوية بالشط لو تحويل مجرى الانهار لو ما أعرف شنو...خلي تطلع أي وزارة من وزاراتنا الوطنية وتگول إذا إيران ما تعتذر وتدفع غرامات عن هذه التجاوزات أو تعالج التلوث وتوقف الإعتداءات...راح نلغي مشروع واحد...إي والله واحد كافي...من مشاريعنا الموقعة وياهم...وشوفوا شلون راح يجون بالكرتة ونگدر نلبسهم حذاء قبغلي قياس 32 على رجل إيراني قياس 54 ما دام أكو كرتة...هاي في حالة إن كلمة (إعتداء إيراني) إللي سمعناها ما چانت غلطة مطبعية أو فلتة لسان...لأن إحنا هالأيام فلتاتنا صايرة كلش هواية..فلتة لسان علي أبو الدبغة...فلتة لسان ضخامة جلجل طنطل...فلتة مؤخرة ما أعرف منو...وتفلة حلگ بوجه منو...هم ما أعرف وداعة الغالي إللي بالشارع ونتفل عليه بالبيت مثل ايام الأزلام! من چانت هي هاي الحالة وي عباس فلكة !
والله يرحم علي الوردي...ألف رحمة على سدارته البغدادية...من حچى وگال عالشخصية المزدوجة في الإنسان العراقي في سلسلته الرائعة عن تحليل الشخصية العراقية، وإذا چان المرحوم علي الوردي طلع بنتيجة أن الأزدواجية هي بسبب الصراع بين البداوة والحضارة إللي ما فارقت الشخصية العراقية، فآني أترخص من روح علي الوردي إن كل شي صار عدنا دبل مزدوج...عدنا علمين...رئيسين...رئيسين للوزراء (في الطريق إليكم الثالث من تكريت والرابع من البصرة والخامس من أبو دشير أو الشعلة) وعدنا راسين...راس ببغداد بس خراعة خضرة في المنطقة الخضراء (من هاي يسموها المنطقة الخضراء) ورأس بإيران...دماغ مفتح...إطاعته واجبة...وأمره مقدس...حتى لو وصلت القوارب الإيرانية وخطفت الشباب من نص البصرة...المهم بالأول والأخير...صيانة المذهب...وصيانة الدستور ...الدستور الإيراني بحسب المصلحة العامة...أم الطابقين...وطبعا الطابقين ثنيناتهم يروحون لإيران...مو عبالكم الطابق الجوا لباب الشرجي...والطابق الفوگ لملعب آزادي في طهران ! المصيبة إن السايق ما يعرف غير شارع واحد... وهذا الشارع يودينا كلنا...للضياع !
حيرة مووووووووو !
[ندعوك للتسجيل في المنتدى أو التعريف بنفسك لمعاينة هذا الرابط]

الرجوع الى أعلى الصفحة اذهب الى الأسفل
 
حبيب العربنجي: الــكــــرتة
استعرض الموضوع السابق استعرض الموضوع التالي الرجوع الى أعلى الصفحة 
صفحة 1 من اصل 1

صلاحيات هذا المنتدى:لاتستطيع الرد على المواضيع في هذا المنتدى
البيت الآرامي العراقي :: الاخبار العامة والسياسية General and political news :: منتدى المنبر السياسي والحوار الهادئ والنقاش الجاد الحر Political platform & forum for dialogue & discussion-
انتقل الى: