البيت الآرامي العراقي




البيت الآرامي العراقي

سياسي ِ ثقافي ِ أجتماعي


 
الرئيسيةالرئيسيةبحـثالتسجيلarakeyboardsyrkeyboardدخول

شاطر | 
 

  حبيب العربنجي : جمعة لا أنام

استعرض الموضوع السابق استعرض الموضوع التالي اذهب الى الأسفل 
كاتب الموضوعرسالة
Dr.Hannani Maya
المشرف العام
المشرف العام



الدولة : العراق
الجنس : ذكر
عدد المساهمات : 37577
مزاجي : أحب المنتدى
تاريخ التسجيل : 21/09/2009
الابراج : الجوزاء
التوقيت :

مُساهمةموضوع: حبيب العربنجي : جمعة لا أنام    الخميس 23 يونيو 2011, 1:19 am


حبيب العربنجي : جمعة لا أنام


22/06/2011




[ندعوك للتسجيل في المنتدى أو التعريف بنفسك لمعاينة هذه الصورة]أكو نقص كلش چبير في مستودع الأسماء لأن الشباب الفيسبوكيين فرهدوا كل الأسماء وما ظلت غير أسماء تعبانة وما حد يريدها، وبعد تسونامي الگروبات الفيسبوكية إللي صارت بلا ملح، صرنا حايرين شلون نختار أسماء (ثوراتنا الجمعوية)...وإذا ظلت الشغلة هيچ مزاج مال چم واحد ...راح نوصل إلى (جمعة خالتي گماشة) او (جمعة راجل وست ستات) و(جمعة أبو البلاوي) وصولاً إلى جمعة النصر والإنتصار في (جمعة الراية البيضاء) ...لأن الشغلة كلها تمثيل في تمثيل.
الحكومات تمثل على شعوبها سنوات وعقود ، والشعوب تمثل على حكامها في بيعات مليونية وبرقيات تأييد وإنتخابات مال ضياع وكت وكشخة ديمقراطية لأن ما إلها أي داعي ما دام الشعب والقيادة إيد وحدة...وتدرون إيد وحدة ما تصفگ...يعني لو ولاء....لو تصفيق. وإثنينهم بمكان واحد ما يرهم...وهذا هو السبب من تشوفون أكو شعب يصفگ لحكومته عرفوا هذولة ما إلهم أي ولاء، نفس الحالة من تحچي وي واحد وهذاك يحرك راسه على اساس هو وياك بالسالفة نقطة نقطة ...فهاي إشارة على كونه بدالغة وأنت بدالغة ثانية ما إلها أي علاقة بالدالغة مالته..أو نگعد نباوع على الأداء الكوميدي من غير ما نگدر نصفگ! السالفة كلها تمثيل ...وإحنا وحظنا...يجينا ممثل فاشل ونعرف هو فاشل بس لازم نگعد ونتفرج حتى نوصل للحلقة الأخيرة وبلكن تخلص هاي وتبدي وحدة جديدة بتمثيل أحسن وما نحس أكو تمثيل، او نعرف بس نتفرج وإحنا متونسين.
وآني أقترح على الشباب الفيسبوكيين تسمية الجمعة الجاية (جمعة لا أنام) لأن بالفعل صرنا ما نگدر ننام بفعل الغارات اللي تشنها قوات حلف البگ والحرمس من نريد ننام بالحديقة...فالنوم جوا والكهرباء ماكو مثل مال واحد گاعد دا يستوي على نار هادئة، فلازم يا ننام بالسطح أو نطلع للحديقة، السطح ما ظل بيه ستر بعد ما راح ستر الوطن وحدائقنا داير ما دايرها زبل وخرابة، وعگاريگ ، وحاملات طائرات لاسراب البگ والحرمس.
بس الظاهر الناس الموجودين فوگ...وخاصة النائمات دا ينامن كلش مرتاحات، وعدهن كهرباء بلا وجع گلب...لأن مال تطلع وحدة نايمة من جماعة أبو حمزة ورايحة لإجتماع سياسي ببيت اضخم واحد بالدولة (وزناً فيزياوياً ودستورياً)، ومحددة شفايفها بالحمرة تحديد تاخذ عد الكوافيرة ساعة ونصف للشفايف العليا وساعتين للشفايف الجوانية، في صالون لازم بارد ودرجة حرارة ما تتجاوز 20 درجة مئوية أو 68 درجة فهرنهايت إذا ثقافتكم أمريكية وهاي الدرجة ضرورية حتى الحمرة ما تسيح.
يعني هاي النايمة شلون تحس بمشكلة الشعب إذا هي عدها هيچ كهرباء وجو صحي ومعتدل وما تضطر تنام لا بالحديقة ولا بالسطح وتحرم البگ من الإستمتاع بدمها اللذيذ وخاصة هي سمرة ومربربة ودمها حار.
يمعودة خلي جماعتج يحددون موقفهم السياسي قبل تحديد شفايف النايمات وخلي صاحبكم الواوي ينيشن زين من يريد يچوت لأن خطية الضربات كلها آوت حتى مو بالعارضة.
عيوني شباب الفيسبوك :
الشعب محتاج إلى جمعة (لا أنام)، لا أنام من الكهرباء، ولا أنام من اليأس، لا أنام من الزبل، لا أنام من القهر، لا أنام لأن فقدت القدرة على النوم، النوم بحسب التعريف العلمي والنفسي هو حالة سكون الحواس بطمأنينة ، بشرفكم أكو عراقي يگدر يحقق هذا الشرط في العراق المفدرل أبو الچروخ؟! بس إذا عدنا نايمة عدها وكت تحديد شفايفها من غير ما تحدد موقفها السياسي، فهذا دليل على إن إحنا بخير وبركة وعدنا قدرة على تصدير الكهرباء لدول الجوار وحتى لسويسرا مرورا بجبال الألب الساحرة.
عيوني النايمة ذات الشفايف البوتيكسية والسكسية المحددة
آني أشجع الماكياج الأوفر وضد تطبيع الدين وي المظهر، وأتمنى لو كل وحدة عراقية تمشي بالشارع وشعرها تتطاير بالهواء وريحة البارفام (أو البارفان بالنسبة للمثقفين نص ردن) مالتها تجي نسمة وية كل خطوة تمشيها، أريد أشوف العراقية بكشختها ودلالها، مو ضاربة چادر وتشبه البيتنجان المحشي من تمشي بالشارع، آني مو ضد تحديد الشفايف ، بل آني من دعاة تحديد الشفايف حتى البصمة العاطفية تترك أثرها، بس وداعة ما أعرف منو (بكيفچ إنتي إختاري منو)، مال تطلعين عالشاشة ووجهچ لزگ ولطش وكلش كلوز على الكاميرا بحيث نشوف تحديدات قلم الحمرة بكل تفاصيلها على شفايفچ الغليظة، فهاي قمة الإبتعاد عن مشاكل الشعب، وقمة ضرب مشاكل الشعب بالقندرة (للأمانة ما أعرف قندرتچ يا قياس)، وإذا أنت هيچ حريصة على التحديد والماكياج...فأرجوچ خلي جماعتچ النايمات والنوام يسمعون مطالب الشعب، في (جمعة لا أنام)...وخلونا كلنا ننام، ونگعد الصبح ونحدد...وما عليچ نحدد شفايف لو نحدد موقف...المهم انطونا كهرباء! والله كريم....والشعب غشيم..إلى درجة ما يعرف شنو فائدة تحديد الشفايف في التصريحات السياسية بعد الإجتماعات الضخمة..وأرجو النايمة المستورة تفهمنا الفائدة حتى ما نظل غشمة بليل عتمة.
[ندعوك للتسجيل في المنتدى أو التعريف بنفسك لمعاينة هذا الرابط]

الرجوع الى أعلى الصفحة اذهب الى الأسفل
 
حبيب العربنجي : جمعة لا أنام
استعرض الموضوع السابق استعرض الموضوع التالي الرجوع الى أعلى الصفحة 
صفحة 1 من اصل 1

صلاحيات هذا المنتدى:لاتستطيع الرد على المواضيع في هذا المنتدى
البيت الآرامي العراقي :: الاخبار العامة والسياسية General and political news :: منتدى المنبر السياسي والحوار الهادئ والنقاش الجاد الحر Political platform & forum for dialogue & discussion-
انتقل الى: