البيت الآرامي العراقي




البيت الآرامي العراقي

سياسي ِ ثقافي ِ أجتماعي


 
الرئيسيةالرئيسيةبحـثالتسجيلarakeyboardsyrkeyboardدخول

شاطر | 
 

  حبيب العربنجي : طيارة ست البيت

استعرض الموضوع السابق استعرض الموضوع التالي اذهب الى الأسفل 
كاتب الموضوعرسالة
Dr.Hannani Maya
المشرف العام
المشرف العام



الدولة : العراق
الجنس : ذكر
عدد المساهمات : 37598
مزاجي : أحب المنتدى
تاريخ التسجيل : 21/09/2009
الابراج : الجوزاء
التوقيت :

مُساهمةموضوع: حبيب العربنجي : طيارة ست البيت   الأربعاء 23 نوفمبر 2011, 12:05 am


حبيب العربنجي : طيارة ست البيت


22/11/2011




[ندعوك للتسجيل في المنتدى أو التعريف بنفسك لمعاينة هذه الصورة]إللي أدري ومتأكد منه أن الوزراء عدهم كهرباء حالهم حال المواطن العادي، ومتأكد إن الوزراء ما يحبون يتفرجون عالمسلسلات المدبلجة بس هم بارعين في كتابة سيناريوهات وإخراج المسلسلات السياسية إللي تنافس
حاليا المسلسلات المكسيكية لكسر الرقم القياسي العالمي في عدد حلقاتها. ثمان سنوات، وكل يوم مو أقل من عشر حلقات من نفس المسلسل، وشوفوا الحساب إحنا بيا حلقة هسة ! أكيد بالحلقة المفرغة إذا مو بالحلقة مثل مال عضوة الفرقة في النكتة الحلوة من يسلم واحد بالسوگ على الرفيقة الأزلامية فيسألها زوجها : منو هذا؟ فتجاوب الرفيقة " هذا الرفيق عضو بالحلقة مالتي !! "
المهم...إذا الوزراء عدهم كهرباء يعني عدهم كمبيوتر لأن لحد هسة لا Dell ولا Apple مخترعين لابتوب يشتغل عاللالة والفانوس وخاصة بعد وفاة ستيف جوبز لأن يگولون لگوا على مكتبه تخطيط للابتوب يشتغل على الفانوس ومات گبل ما يشوف هالمشروع النور...مثل عيوننا إللي أبد ما راح تشوف النور في بلاد ما بين العهرين...عهر السياسة وعهر الجهل.
والوزراء إذا عدهم كمبيوتر يعني أكيد عدهم إنترنت حتى يتفرجون على بزغ الكيويلية عاليوتيوب ورگصة ميريام فارس في حفلة نادي الصيد ويعرفون من وين يشتورن چكليتة المهاجري العجيبة إللي تشفي حتى داء الچلب إللي يصيب الچلاب...بس ما تفيد السياسيين لأن السياسي من يصيبه داء الچلب ما يفيد وياه حتى لو طن من چكليتة المهاجري لو مقري عليها حتى الدستور العراقي ...وما صاحبكم المسعور عن هذا ببعيد...وبكيفكم منو المسعور ?!
وإذا عدهم أنترنت أكيد عدهم الحجي گوگول إللي هو مثل المرجعية مال الأنترنت، شعندك سؤال وبيا مجال، تلگى الجواب عد گوگول...بشرفكم مو الحجي گوگول يستاهل ننطيه لقب آية الله الانترنيتي؟ ...بس هالأيام كل شي بالواسطة حتى آيات الله العظمى والصغرى ...والرطوبة النسبية!...وهذا الحجي ما يخلي واحد يگول والله ما أعرف لو ما سامع بهالشي...يعني أي عذر ماكو وي حجة الله گوگول....أدامه الله على عباده الانترنتيين.
ولو يجي إللي وقع عقد الطيارات الاوكرانية بوزارة الدفاع العراقية... ويسأل آية الله الحجي گوگول عن حوادث طيارات الشحن العسكرية خلال عشرين سنة الآخيرة ..راح يجاوبه الحجي گوگول إن الطيارات إللي هي صناعة وإنتاج اوكراني هي الطيارات الأكثر سقوطا وحريقا وعزا أسود خلال العشرين سنة إللي فاتت..وإن الأسلحة الاوكرانية هي أكثر الأسلحة فسادا وفشلا في العالم إلى درجة أن اوكرانيا باعت حاملة طيارات بسعر الخردة لأن فشلت المحركات الاوكرانية من تشغيلها وإشترتها الهند...يعني الأسلحة الاوكرانية بين الأسلحة مثل العراق بين دول العالم....فشل..فساد...مو عالمواصفات...بوگ...كلاوات...ولعبان نفس .
بس الظاهر بذيچ اللحظة إللي وقعت وزارة الدفاع العراقية عقد شراء طيارات شحن أوكرانية چان الحجي گوگول مشغول لو الكمبيوتر مضروب چلوة...أقصد مضروب فايروس. بس الشغلة العجيبة بعقد الطيارات الأوكرانية هي عبارة (متعددة الإستخدامات) إللي توصف هاي الطيارات، وهي عبارة مليانة كلاوات وبوگ فلوس. و ما أحد يعرف شنو هاي الإستخدامات المتعددة بس اللوتية إللي وقعوا العقد من الجانب العراقي والاوكراني وإللي كتبوا هاي العبارة بالعقد . لأن لو چان سعر طيارة شحن بعشرين مليون دولار – مثلا – فأن نفس الطيارة من نضيف إلها چلمة (متعددة الإستخدامات) راح تصير بمائة مليون مثل الزلاطة...لأن ممكن إستخدام هاي الطيارة بالشحن الجوي للجنود...وشحن الأسلحة...وشحن الزمايل...وحتى شحن الموبايل إذا ماكو كهرباء..صدك طيارة ست البيت...حالها حال المولينيكس...من الدوندرمة إلى كبة السراي.وفي المناسبات الديمقراطية دولمة للناخبات والمرشحات.
ومو بعيدة بالأيام الجاية راح نسمع أن وزارة النقل تحتفل بوصول اول طيارة كونكورد إلى مطار بغداد بعد تعاقد العراق مع فرنسا لشراء طيارات الكونكورد...وراح تسوي وزارة النقل إحتفال چبير ولا إحتفالية ذكرى ولادة النعجة دوللي تماما مثل إحتفال وزارة الدفاع بوصول الطيارة الاوكرانية متعددة الاغراض إلى بغداد كدفعة أولى من ست طيارات أشترتها الوزارة من أوكرانيا، مع العلم إن الكونكورد صارت جزءا من التاريخ بعد إحالتها على التقاعد القسري بسبب حادثتين والسمعة الوسخة بسبب الضجيج العالي إللي أزعج صباحات الاوروبيين الهادئة والجميلة..بس المشكلة إن الحكومة الجاهلة ما تتعب روحها وتسأل الحجي گوگول گبل ما توقع أي عقد...مثل ما صار وي العقود الوهمية مال الكهرباء...حتى تتأكد من أصل وفصل الشركة والماركة وتاريخ الحوادث والمافيا...وخطية الحجي گوگول ما يگول شي بس إحنا سحيوة ونستحي نسأل.
عيوني...من هسة كتبوا الخبر الآتي إللي راح تسمعوه بعد سنة : سقوط طائرة شحن عراقية...اوكرانية الصنع يعود تاريخ صناعتها إلى الحقبة السوفييتية.
خووووووووش كلاو.

الرجوع الى أعلى الصفحة اذهب الى الأسفل
 
حبيب العربنجي : طيارة ست البيت
استعرض الموضوع السابق استعرض الموضوع التالي الرجوع الى أعلى الصفحة 
صفحة 1 من اصل 1

صلاحيات هذا المنتدى:لاتستطيع الرد على المواضيع في هذا المنتدى
البيت الآرامي العراقي :: الاخبار العامة والسياسية General and political news :: منتدى المنبر السياسي والحوار الهادئ والنقاش الجاد الحر Political platform & forum for dialogue & discussion-
انتقل الى: