جامعة مريدي الدولية لمنح شهادات عليا للمسؤولين الكبار في دولة القانون المالكية ااا

تعالوا معی لزيارة / جامعة مريدي الدولية !!

لم أسمع بهذا الصرح العلمي المتميز و بهذه الجامعة الكبيرة والعظيمة التي (تُخرج المئات دفعة واحدة وفي شتى المجالات وألأختصاصات خلال ساعات! ) إلا بعد الإحتلال من قبل ألأخوة ألأعزاء ـ ألأمريكان ـ الذين جعلوا من وطننا ـ ولاية بطيخ ـ بمعنى الكلمة حيث ساهموا وبشكل فعال ومدروس في خلق حالات سلبية وأمراض أجتماعية لم تكن في يوم من ألأيام موجودة في بلدنا آلآمن .
نعم (الفساد بشكل علني وسرقة أموال الشعب والدولة والقتل والخطف والطائفية والمحسوبية والمنسوبية والفقر والجهل والتزوير والمخدرات وألأيدز … الخ ) كلها من خيرات ألأخوة ألأمريكان..
ياترى هل هنالك أمتيازات وخيرات أكثر من هذه ألأمتيازات والخيرات وخلال عدد من السنوات ؟؟؟.
الذي نلاحظه هذه ألأيام ولربما قبل سنوات من عمرالأحتلال أو التحرير( سمها ما تشاء) إن أغلبية المسئولين في الدولة لابل حتى في ألأحزاب المشاركة في العملية السياسية أغلبهم يحملون شهادات أكاديمية عالية لاتقل عن الماجستير والدكتوراه وفي مختلف ألأختصاصات !!.
يشهد الباري أعرف أحدهم كا يملك عربانة و( زمال) يبيع ويشتري ( العتيك) ..اليوم دكتوراه في الفلسفة.. تصوروا الكارثة !!!.
ـ هنالك العشرات من حملة الدكتوراه في ألأقتصاد والعلوم السياسية والقانون .
ـ هنالك المئات من حملة شهادة الدكتوراه في الزراعة وألأداب واللغات والكيمياء والفيزياء !!.
ـ هنالك عدد كبير من حملة شهادة دكتوراه في العلوم ألأسلامية !!.ـ هنالك المئات من حملة الماجستيرررررر !!!.. في كل ألأختصاصات !!.فعلا حالة غريبة !!.
ياترى متى وكيف حصلوا على هذه الشهادات وهم عاشوا سنوات عمرهم في الغربة والعزلة والفقر ؟؟؟ و ( واحدهم حسرة عليه زوج قنادر جدد ، أو تناول وجبة محترمة من الطعام في مطعم درجة ثالثة !!) .
نعم بقدرة قادر أصبحوا أكاديميين ومحللين وأصحاب خبرات في جميع مجالات الحياة من ضمنها في مجال ( الفجل والشلغم والجاجيك لابل حتى الثوم والنعناع والشكرلمة وبيض اللگلگ!!) .
ــــــــــــــــــــــــــــــ
حمدااااان .. ماتخش بالموضوع !!! .. ليش هي هذه جديدة ؟؟؟.
لا أبدا مو جديدة.. بس الجديد بالمسألة أنه زرت مصدر شهاداتهم .. أقصد / جامعة مريدي !!!.
ـ يامصخم وهذه وين صايرة ؟؟ وشوداك ؟؟.
يامعزوز عيني هذه صايرة بمدينة الثورة سابقا !! ومدينة / صدام لاحقا ومدينة الصدر حاليا !!.
ـ أحچيلي.. شوصلك ؟؟ ماخفت ؟؟
أخاف ؟؟ ليش شنو رايح الى / حافات المياه ؟؟.. عندي هواية أصدقاء هناك ، كلفتهم وأخذوني وشفت العجب العجاب !!!.
ـ وأشفت ؟؟؟ بس بروح هذولاك الطيبين بالتفصيل الممل !!.
مو على عيني !! .. طبعا الدخول الى ( الحرم الجامعي !!! جامعة / مريدي) لاتسولفها .. ممنوع منعا باتا ، لكون اللي يريد شهادة ، هنالك وسيط ياخذ منك ( المقسوم وبالدولار) وتنطي الصور والمطلوب.. نعني أية شهادة خلال ساعات يمنحك اللي تريده ومصدقة وكاملة مكملة !!… بس أني فهمت الوسيط بواسطة (صديق) على أساس أريد عشرات الشهادات ولازم التقي بأحد المسؤلين عن هذه الشغلة!!.
ـ وأنت دخلت جوة ؟؟ تجولت بالأقسام ؟؟.
يا أقسام ؟؟.. هي كلها غرفة لو غرفتين ماتتعدى مساحة الواحدة ثلاثة × أربع مترات ، بيها أجهزة حاسوب وكم ميز وأختام وكم دفتر وجهاز أستنساخ ومولدة بالخارج تشتغل وجهاز تكييف ( أركونديشن ) وهذه ألأخيرة على مود ألأجهزة الموجودة .. وشفت عدد من الشباب واحدهم عبالك دارس ماأدري وين ؟.. عبالك موسوعة بالأسماء وألأماكن وألأختصاصات .. هذا كل الموجود .
ـ زين وأية شهادة يزوروها !!؟؟.
يزورولك أي مستمسك.. أنشاءالله / شهادة بروفيسورية .. شهادة الجنسية .. عقود تجارية .. هويات مختلفة .. ضابط .. مديرعام.. وكيل وزير.. أنشاءالله وزير .. بس كلشي بسعره .. يعني الشهادة الجامعية أقل من الماجستير وشهادة الدكتوراه أغلى بالتأكيد .سألت واحد من الشباب عن الزبائن .. گال :{ الله وكيلك أكثرية اللي بالحكومة والبرلمان ومجالس المحافظات ومسؤلي ألأحزاب } تخرجوا جوة أيدي وأني منحتهم الشهادات وهذه أسمائهم بهذا السجل!!! ـ أشر على سجل !!.
ـ زين ليش ما أطلعت عالأسماء؟؟؟.
حاولت .. ماخلاني وبشدة .. گال هذه من أسرار الجامعة !!!!. وعندما ناقشتهم گَالوا:
{ أحنة دنقدم خدمة كبيرة للمسئولين واحدهم ( ما كان يكَدر يسرح بنعجة .. هساع وزير لو برلماني لو مدير عام لو رئيس حزب أو قيادي !!) والمهم خلال الممارسة في العمل صار أكاديمي وديقدم خدمة ويحاور ويطلع بالتلفزيون ويناقش ويلبس قاط ورباط .. يعني وين العيب؟؟ .. بأختصار أحنة نصنع أكاديمين لخدمة الوطن والشعب !!.} .
ـ والنعمممممممممم .. أبختي بهذه تمام.. من هذه مثل (….. البعير نرجع ليورا !!) . .. وشنو اللي لفت نظرك كصحفي !!؟؟؟.
هذه ألأبيات اللي كان / رئيس الجامعة ( لابس بنطرون تراكسوت وتي شيرت ونعال أبو ألأصبع وترس حلگة علچ بمبي اللون أبو النعلجة !!) كان أمعلكها فوك راسه .. يكًول الشعر :
جامعتنا نشطة، كل يوم أتخرج العشرات
أكبر شهادة سعرها كم وريقة دولارات !!
شهاداتنا أصلية مية بالمية وأبد مو تزوير
أخذها ورأسا صير عند الحكومة وزير !!
ـ والله عمي خوش جامعة وخوش رئيس جامعة وخوش شعار .. اللهم زد وبارك .. حمدان خلي البقية لحلقة أخرى… اللهم أحفظ العراق وشعب العراق وأكشفنا أسماء أصحاب الشهادات المزورة… يارب
آمين يارب العالمين… وعهدا مني أن أكشفهم بأذن الله تعالى .. وحتى لا أنسى:
ما أريد يطلعلي ( عنتر بن شداد) ويدافعلي عن المزورين في الحكومة.. هذه الحالة يقرها الجميع من البرلمان الى مجلس الوزراء لابل حتى ألأحزاب