البيت الآرامي العراقي

كل عيد وأنت متأقلم : حبيب العربنجي Welcome2
كل عيد وأنت متأقلم : حبيب العربنجي 619888zqg202ssdr
البيت الآرامي العراقي

كل عيد وأنت متأقلم : حبيب العربنجي Welcome2
كل عيد وأنت متأقلم : حبيب العربنجي 619888zqg202ssdr
البيت الآرامي العراقي
هل تريد التفاعل مع هذه المساهمة؟ كل ما عليك هو إنشاء حساب جديد ببضع خطوات أو تسجيل الدخول للمتابعة.

البيت الآرامي العراقي

سياسي -ثقافي-أجتماعي


 
الرئيسيةالرئيسيةبحـثس .و .جالتسجيلarakeyboardchald keyboardدخول

 

 كل عيد وأنت متأقلم : حبيب العربنجي

اذهب الى الأسفل 
كاتب الموضوعرسالة
البيت الارامي العراقي
الادارة
الادارة
البيت الارامي العراقي


كل عيد وأنت متأقلم : حبيب العربنجي Usuuus10
كل عيد وأنت متأقلم : حبيب العربنجي 8-steps1a
الدولة : المانيا
الجنس : ذكر
عدد المساهمات : 10368
تاريخ التسجيل : 07/10/2009

كل عيد وأنت متأقلم : حبيب العربنجي Empty
مُساهمةموضوع: كل عيد وأنت متأقلم : حبيب العربنجي   كل عيد وأنت متأقلم : حبيب العربنجي Icon_minitime1الثلاثاء 31 يناير 2012 - 23:42

كل عيد وأنت متأقلم

حبيب العربنجي

من زغري أعرف عيد الچبير أربعة أيام ... أربعة أيام ناكل بيها حب شمسي قمر إذا الأمور تعبانة أو نكرز فستق أذا أموراتنا عالية أو نمطگ بالماكنتوش إذا بابا طبيب و بنت خالة ماما موظفة بالسوق المركزي ..چان لا سنة ولا شيعة...لا عبدالقبور السامرائي ولا ما أعرف منو شايل القبغ أو كاشف الغطا...مو محتر والكهرباء مگطوعة...وچنا نعرف آيات الله بس موجودة بالقرآن...مو مثل هسة جيب كوشر وخذ آيات ...وإذا أموراتك كلش عدلة تطلع الآية مالتك تگدر تزرعهاا بالحديقة وتگعد بظلها الوارف بالحر !

وأفترت الدنيا ودار الزمان بينا وكبرنا...والناس صاروا يا إما من السنة النواصب لعنهم الله ويا إما من الشيعة الروافض لعنهم الله همين حتى لا يزعلون...وصرنا نعرف الفرق بين واحد عمامته سودة واللاخ بيضة وواحد دشداشته گصيرة وواحد طربوشه بلا كركوشة...وصرنا نعرف الفرق الفقهي بين السكسوكة واللحية...واهمية حلق الشارب وإطلاق اللحية في تطوير الصناعة والإقتصاد والتنمية البشرية، تماما مثل ما عرفنا فائدة القماش الاخضر في معالجة مرض السرطان وتحسين نوعية التربة وزيادة إنتاج المحاصيل الزراعية وتعزيز الديمقراطية وخاصة من نشد الوصلة الخضرة على صندوق الإنتخابات يگوم الصندق و يبزغ ويرگص من فرحة الديمقراطية.

ولأن الديمقراطية كبرت وصارت شابة حليوة من حلاتها گامت توزع أقاليم موجات أقليمية ...والديمقراطية كريمة وسخية فالكل أخذوا هدية من الديمقراطية عبارة عن چرچوبة أقليمية وكل واحد صار داخل چرچوبة تناسبه...الكل صاروا أقليميين، من كاكا شيرزاد في الشمال إلى حجي لفتة بالبصرة والنوب ...جماعة عجل يابة همين يريدون يتأقلمون وي الديمقراطية...وباچر جماعة چا وين أهلنا !...هسة أحسن إستثمار وبزنس تعلن أقليم...وشوفوا بزنس مال الكاكاوات بالشمال شلون...من تصدير الكتل الكونكريتية إلى بغداد وحتى تصدير الحلول السياسية الجاهزة ...ماركة بارزاني...بس ديروا بالكم من تاريخ الإنتاجية لأن حتى لو إكسباير ما نعرف بيها لان مكتوب باللغة الكردية.

الكل صاروا أقليميين ومتأقلمين حتى الشغلة وصلت للعيد...صار العيد سبعة أيام بدون بخشيش ، وعشرة أيام وي البخشيش..يوم للأقليم السني ويوم للأقليم الشيعي جماعة آل ممة ويوم للأقليم الشيعي جماعة عزيزي عزوز .

عبدالقبور السامرائي عنده إتفاقية وي تلسكوب هابل ووكالة ناسا وتلسكوب مكتب ديوان خايس الحرمين الشريفين...يشوفون الهلال حتى لو الگمر بعده ببطن الحوت، ويعلنون العيد حتى لو مطي يركب مطي ما دام الملك عنده مزاج يستقبل المهنئين ويريد يرگص عرضة وتطلع الرگصة على قناة نجوم الخليج..

وجماعة الستياني...ما يشوفون الهلال حتى لو صعد الگمر للسما بعز الظهر...حويطين...عبالك عدنا مناقصة...الأفضل واحد يتأخر حتى يعرف العروض المقدمة وبعدين يقدم العرض مالته أرخص من باقي العروض إللي تسرعوا وقدموها...هذا حال جماعة عزيزي عزوز.

أما جماعة آل ممة...فخرابيط مو شلون ما چان...بس حتى الواحد يگول هذولة عدهم موقف، مثل مستر نو....اللقب إللي أطلقته الإدارة الاميركية على الرفيق أندريه گروميكو من چان وزير خارجية الإتحاد السوفييتي...آل ممة صايرين مستر نو...العيد يبدي بعد ما يخلصون جماعة عزيزي عزوز عيدهم وتوابع العيد وملحقاته الشرعية والدستورية.

الله يديم الأعياد والأفراح...ولكم إذا الشعب بالعيد والفرحة ما موحد ومو گلب واحد لعد شلون بالشدة والصعبة...أكيد راح يغنون " گلب گلب وين وين" .. قناة (العراقية) هي الوجه الرسمي للحكومة الإيرانية فرع العراق...يعني لازم تعيد وي الحكومة ويخلص عيدها وي الحكومة...بس إللي دا يصير أن (العراقية) تعيد وي جماعة عبدالقبور السامرائي (عطلة وإجت من الله) وتخلص العيد وي جماعة آل ممة...تجر اسبوع عدا البخشيش الحكومي يومين قبل العيد ويومين بعد العيد وعيد الغدير وعيد الچفچير...وهو العيد إللي يصادف ولادة أول چفچير أبو اليدة من سلالة طاوة أم الطعجة !

فيروس (الأقليم) ضرب العيد ...وهذا الفيروس من يضرب الواحد يخليه ضايع ما يعرف راسه من راس البصل...ضايع ما يعرف شنو أسمه وعنوانه...وما يعرف حتى تواريخ أعياده...هذا الفيروس يسبب إسهال تصريحات وغازات تسبب النفخ في الإجتماعات...العيد صار ضايع بين هذا وذاك...ما كفاهم البوگ لحگونا على فرحتنا الزائفة...چم يوم نضحك فيه على نفسنا ونلبس جديد حتى لو من البالة واللنگة...حرمونا حتى من هاي الفرحة من سووها أقليمية...صرنا ننحرج من نعايد صديق أو نتعايد مع معارفنا إذا العيد الأقليمي مالته مو وي عيدنا...ضيعوا علينا العيد صرنا ما نعرف إشوكت يبدي العيد وإشوكت يخلص...يعني البوگ مو كافي...من بوگ النجوم من العلم...وبوك المليارات وبوگ الألقاب العلمية والشهادات وبيوت الناس...وبوگ مستقبلنا وأعمارنا..والنوب البوگ يوصل إلى سرقة فرحة العيد بإدخال العيد في الچرچوبة الأقليمية !!

إحنا البلد الوحيد إللي ما نعرف تاريخ إستقلالنا أو العيد الوطني المعتمد (في الوثائق الرسمية العيد الوطني هو تاريخ إنضمام العراق إلى عصبة الأمم ورفع الوصاية البريطانية ...راجع مقالنا...كاكا هوشيار هل تعرف العيد الوطني؟)...وهسة صرنا البلد الوحيد إللي عيد الچبير صدگ چبير تريبل إكس لارج ...ما نعرف إشوكت يبدي وإشوكت يخلص...الله يلعن الأقلمة والأقاليم وأقليم كردستان بداية البلوى.

صدگ...مدا اتذكر أشوكت سووا إسفتاء إعلان أقليم كردستان...مو هيچ بالدستور؟؟ لازم أي اقليم وياه إستفتاء؟؟ أشو بهاي النقطة الدستور مجيم وما يشتغل؟؟ لو هم ولد ناس...وإحنا راس أبونا أگرع....والمصيبة حتى إذا راس أبونا أگرع ما راح نعرف...لأن أبونا إما معمم أو مطربش....وهاي قمة المشكلة...وحضيض المدنية...وإحنا بين القمة والحضيض ضايعين ودايخين....والعفو.... وآسف تأخرت بتهنئة العيد...بس ترى العيد بأقليم آل عربنجة توه بدا.!

habibarabenchi@yahoo.com


الرجوع الى أعلى الصفحة اذهب الى الأسفل
 
كل عيد وأنت متأقلم : حبيب العربنجي
الرجوع الى أعلى الصفحة 
صفحة 1 من اصل 1

صلاحيات هذا المنتدى:لاتستطيع الرد على المواضيع في هذا المنتدى
البيت الآرامي العراقي :: الاخبار العامة والسياسية General and political news :: منتدى المنبر السياسي والحوار الهادئ والنقاش الجاد الحر Political platform & forum for dialogue & discussion-
انتقل الى: