البيت الآرامي العراقي




البيت الآرامي العراقي

سياسي ِ ثقافي ِ أجتماعي


 
الرئيسيةالرئيسيةبحـثالتسجيلarakeyboardsyrkeyboardدخول

شاطر | 
 

 زعيم طيحان حظ العراق : حبيب العربنجي

استعرض الموضوع السابق استعرض الموضوع التالي اذهب الى الأسفل 
كاتب الموضوعرسالة
Dr.Hannani Maya
المشرف العام
المشرف العام



الدولة : العراق
الجنس : ذكر
عدد المساهمات : 37595
مزاجي : أحب المنتدى
تاريخ التسجيل : 21/09/2009
الابراج : الجوزاء
التوقيت :

مُساهمةموضوع: زعيم طيحان حظ العراق : حبيب العربنجي   السبت 11 فبراير 2012, 9:22 pm

17:31 Samstag, 11.Februar 2012




والله صح ماطاح حظ العراق الا من وقت المجنون الاغبر الذي كان يسمي نفسه الزعيم الاوحد ثم الاوحد وهو اول من اخترع السحل بالشوارع... وجماله جان شيوعي..وكان ازلامه بالمقاومه الشعبيه يهتفون ..بعد شهر ماكو مهر والقاضي انذبه بالنهر.. فليسمع ادعياء الاسلام اللي ثابرينا بالزعيم الاعظم ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟








زعيم طيحان حظ العراق

حبيب العربنجي [ندعوك للتسجيل في المنتدى أو التعريف بنفسك لمعاينة هذه الصورة]
الجمعة، 10 شباط، 2012 الساعة 00:09

قناة العراقية گلبت الدنيا في ذكرى إعدام عبدالكريم قاسم وسوته عبالك بوذا نبي غير معلن...رمز الإصلاح والعدالة الإجتماعية...وبچت قناة العراقية على إعدام عبدالكريم قاسم لأن الفترة إللي إجت وراها چانت فترة إعدامات ومجازر...صح مية مية...بس ليش نست قناة العراقية تگول أن عبدالكريم قاسم هو إللي فتح باب طيحان حظ العراق في يوم 14 تموز1958 في قصر الرحاب وما حد گدر يسد هذا الباب؟؟ شنو الملك ما چان بشر لو قتل ملك حلال وقتل عبدالكريم قاسم جريمة سماوية وأرضية وصاروخ أرض جو للسموات العلى؟
لا والنوب قناة العراقية تگول أن عبدالكريم قاسم ومن خلال (الثورة) و طيحان الحظ في 14 تموز جاب إلنا الديمقراطية...ونست ديمقراطية الباشا نوري السعيد ونست إن الديمقراطية العراقية وكت الملكية وعصر العراق الزاهي چانت من أرقى الديمقراطيات العالمية (صناعة إنگليز وعندك الحساب مو مثل هسة ساخت إيران بأول لوفة تگوم سيارة الديمقراطية تعفط وما بيها حيل تمشي). نست قناة العراقية تحچي عن المجازر اللي صارت بوكت عبدالكريم قاسم زعيم عصابة الضباط الأشرار...مجرزة الموصل ومجزرو كركوك في 1959...اول مرة في تاريخ العراق يصير سحل بالشوارع إذا بالموصل أو بكركوك....وچانت تلك بداية ما شفنا بعدين بوكت الازلام ووكت ما بعد الأزلام ببركة الرفيق بريمر...وي الأهزوجة اللوگية " بالكاهي والگيمر...نفديك يا بريمر".
أنا أتفق مع الكل إن عبدالكريم قاسم چان نزيه وما باگ فلس...لأن هو باگ مستقبل العراق وشبع بوگ...باگ فرحة العراق في يوم 14 تموز 1958...مكتفي وما يريد يبوگ فلوس...مهووس بالخوف ما شعر براحة يوم..وما تزوج لأن خاف زوجته تقتله وهو نايم رغم قصة الغرام بينه وبين زهور حسين.. ومن خوفه چان ينام بوزارة الدفاع والكل شايفين صورته وهو لابس بيجاما عبالك عبدالوارث عسر...قاسم أول من دشن عهد الديكتاتورية في العراق...وأول واحد حاط صورته في المواعين ومن هذا طلع المثل إللي يگول " هذا يطلع إلنا حتى بالمرگة".
الأزلاميون والبعثيون (مبتدأ مرفوع) لو چانوا يحاولون ألف سنة ما چانوا يگدرون يوصلون للحكم ويذبحون العراق لو ما عبدالكريم قاسم سوا دولة ضعيفة ومخترقة ...منو فتح باب الإنقلابات العسكرية غير عبدالكريم...چنا هسة حالنا مثل حال بريطانيا نحتفل بالعيد الماسي لجلوس الملك فيصل الثاني على عرش العراق لان بحسب علمي هو وأليزابيث بنفس السنة صاروا ملوك إذا ما خرفت والذاكرة صارت تعبانة...وأليزابيث قبل ثلاثة أيام إحتفلت بالعيد الماسي...مو مثل حالنا هسة صايرين كل يوم نحتفل بعيد المآسي...مآآآآآآسي مو ماسي.
وبعدين شنو هالتناقض في المواقف....(الشريف) علي بن الحسين إللي يدّعي بالملكية الدستورية هو بنفس الكتلة البرلمانية والسياسية وي جماعة إللي قضوا على الملكية وقتلوا الملك .....يا إما إحنا قشامر ويضحكون علينا وعلى غبائنا...ويا إما هذا مو (شريف) .
لا تنسوا إن عبدالكريم هو من أسس لوجود العصابات في بغداد وأول من فتح باب الحرامية للدخول إلى بغداد بإنشاء مدينة للعصابات إللي هسة صارت مدينة آل ممة...مصنع تفريخ فروخ جيش الإمام الغائب....غير جيش مهزلة القائد مالته غايب .
كل شي عدنا غريب وأبنورمال..الدولة الوحيدة بالعالم إللي تحتفل بذكرى طيحان حظها...وقريبا...راح نشوف ركضة طويريج جديدة إلى قبر الإمام عبدالكريم قاسم إمام العدالة الإجتماعية خاصة بعد ما كشفت قناة العراقية عن مكان المحتمل لقبر عبدالكريم...يعني خلي الموظفين يتونسون جتهم عطلة زيادة رحمة من قناة العراقية.
..خوش طيحان حظ...عبدالكريم قاسم بداية لطيحان حظ كل شي بالعراق...قانون النفط إللي وقعه عبدالكريم چان بداية لجنون أبو الأزلام والبداية للقرار الغبي في واحد حزيران 1972...لو مو قانون النفط چان النفط العراقي مزدهر حالنا حال أرامكو السعودية...مو نجي نسوي تأميم نفط وما نعرف نفتح كاك نفط...قارنوا بين مجمع البرجسية في البصرة قبل واحد حزيران 1972 وبين مجمع البرجسية بعد هذا التاريخ.....يمعودين الفورمان العادي قبل 1972 چان بلبل بالأنگليزي...وهسة يجينا وزير يگول (هو إز يو How is you).
يمعودين قبل عبدالكريم چان باب ولا باب خيبر مسدود والمفتاح بيد الباشا نوري السعيد...ومن كسروا هذا الباب بالدبابات يوم 14 تموز 1958...صار العراق مفتوح للجهة الثانية...جهة طيحان الحظ...أو مثل ما گال الباشا نوري السعيد..." يمعودين ترى آني واگف على سبتتنك" ..لعد شبعوا سبتتنك لا قبغ ولا باب بينكم وبين السبتتنك ..والمجاري تعبانة من يوم لجنة الإعمار ماكو ولا مشروع..وخلوا الغشمة يرگصون مثل القرود وي كل تغيير....بس يا ريت لو يعرفون شلون يرگصون..
[ندعوك للتسجيل في المنتدى أو التعريف بنفسك لمعاينة هذا الرابط]



الرجوع الى أعلى الصفحة اذهب الى الأسفل
 
زعيم طيحان حظ العراق : حبيب العربنجي
استعرض الموضوع السابق استعرض الموضوع التالي الرجوع الى أعلى الصفحة 
صفحة 1 من اصل 1

صلاحيات هذا المنتدى:لاتستطيع الرد على المواضيع في هذا المنتدى
البيت الآرامي العراقي :: الاخبار العامة والسياسية General and political news :: منتدى المنبر السياسي والحوار الهادئ والنقاش الجاد الحر Political platform & forum for dialogue & discussion-
انتقل الى: