البيت الآرامي العراقي




البيت الآرامي العراقي

سياسي ِ ثقافي ِ أجتماعي


 
الرئيسيةالرئيسيةبحـثالتسجيلarakeyboardsyrkeyboardدخول

شاطر | 
 

 من الظلم تسريح العتوي البطل على خلفية أجتثاث الجريذي !

استعرض الموضوع السابق استعرض الموضوع التالي اذهب الى الأسفل 
كاتب الموضوعرسالة
anton
عضو شرف الموقع
عضو شرف الموقع



الدولة : العراق
الجنس : ذكر
عدد المساهمات : 1319
تاريخ التسجيل : 25/08/2011
الابراج : العقرب
التوقيت :

مُساهمةموضوع: من الظلم تسريح العتوي البطل على خلفية أجتثاث الجريذي !   الخميس 16 فبراير 2012, 9:40 am

من الظلم تسريح العتوي البطل على خلفية أجتثاث الجريذي !
ظاهر جواد الشمري الأربعاء، 15 شباط، 2012 الساعة 22:51
في الغابة سبع وباقي الحيوانات تخدمه بس هم زين ويه ربعه ومداريهم ومداري روحه , بس السبع صار تسع اسنين يجي لبيته يلكاه ملعوب بيه طوبه وكله مدفون ومحفر من سوالف الجريذي الخبيث ابو نفس الدنية اللي يريد يفجر روحة بالسبع ويستارث املاكه .
وهناك مل السبع وطكت روحه من هذا القلق اليومي الي يسببه هذا الجريذي, وما كدر يوكع على جتال خيكَان , لان الجريذي فنان ومدعوم من مجموعة اجريذية من الغابات المجاوره ويسلك سياسة عليه وعلى اعدائي .فطلب الأسد الاستشارة من حكماء الغابة حيث جمعهم في مكان في الغابة وسوالهم وليمة تليق بهيجي خلق اوادم وبيهم كل الحض لان ينصحون من كل كلبهم , ويومها كال احدهم يابه هاي سهله ومايرادلهة روحه للقاضي ,انت موتريد مكانك يبق نظيف ومايوصله الجريذي الملعون , فقال السبع أي نعم والله مااريد غير هاي الامنية , كاله دز على العتوي وعينه رئيس مؤقت للغابه واطيه راتب رئاسي مجزي وخلي يكتلك الجريذي الخبيث لان الجريذي يتخبل من العتوي ويخاف منه موت ,
فتم استدعاء العتوي من خلال الاتصال بيه على بريده الالكتروني , فحضر مسرعا الى مسرح العمليات للاجتماع جوه الشجرة الجبيرة, ووافق العتوي على ان يتولى هذه المهمة وكال لابو سباهي والله عمي عد عيناك وماتشوف من يمي غير الامن والامان ونظافة المكان , واليوصل حدنه نكص ايده لكن اريد منطقه امنه ولو اتصير هاي المنطقه بشمال العرين احسن , كاله ابو سباهي ثلث مرات عفية عفية عفية ووياهه ابتسامه عريضة وشويه هزت جتف من هاي اللي تعجب الله يرحم ابوه .
طبعا ويومية السبع ابو سباهي من يجي للبيت يسال العتوي عن اخبار الجريذي ابو نفس الدنية , ويكله ها ماكتلته , والعتوي يرد عليه سيدنا انت مو(شسمه ) انت تدري الجريذي يتخبل مني ومستحيل يوصل ماطول اني حارس , ومرت الايام والاسد طابتله هاي الوضعية وبعد مايسال عن الجريذي لأن التخريب خف اشويه وشمل غير مناطق , بس الحجي بيناتنه العتوي ثاني يوم [ طبعا والله انتوا (القراء)اكبر فتانة واني متاكد بس اسولف سر العتوي راح تكَّلون للسبع لان هو السبع وعندك الحساب وانتوا تحبون دائما الجبير , وابد عيونكم ومشاعركم ما تجي على الفقره الزغار] لكن شنسوي لازم نكمل هاي السالفة : العتوي ثاني يوم من الحراسة كرص الجريذي وهو جاي كعادته يريد يخرب ويلعبس بغراض ابو سباهي ! فكَام العتوي ولزمه من لوزته وكَاله ها شلونك بهاي الله جابك يمي وانت عليك القاء قبض وهسه روحك بيدي تريد اطلع روحك لو تتأدب وتكع نفسك وتكع ربعك وكَرايبك من هاي السالفة الصارت مكشوفه , كَام الجريذي ابو نفس الدنية يرفس بيدين العتوي ,ويأشر اله باديه ورجليه ايكَله موافق على كل شروطك , فتم الاتفاق بينهم على أن يهد العتوي الجريذي مقابل عدم وصول أي منهم الى مكان ابو سباهي الا بعد هدوء الوضع , طبعا ً عاش العتوي عيشة الملوك من خلال الهدايه التي تأتي الى عائلة العتوي في كل مناسبة وطنية , وطبعا ً مناسباتهم الوطنية كثيرة لاتعد ولاتحصى , بحيث مايمر شهر اذا مابي 29 يوم عطله !! لأن الربع شعدهم شو الكَاع ماشاء الله عامره بالخضار بفضل دعوات العتاوي الخيرين اللي تجيب المطر والخير لارض الغابة , وهل الفواكه وكلشي موجود الجوز واللوز والوجه الحسن وصوت ام كلثوم يدوي في الافاق, وخوب اللحم مكوم يومية لأن ماكوا رحمه ابيناتهم , واحد ياكل بلحم الثاني من يشتهي اللحم ! وفد يوم مرض العتوي مرضا ً شديدا ً ولأنه مخلوق خيّر ومن اهل الله ويوميه جماعته يتغدون ويه الانبياء (احم احم) فقد عرف أن مرضه هذه المرة ماوراه كَومه , فقرر أن يجمع عياله ويوصيهم وصيته الأخيرة .
عندها أجتمع عيال العتوي حوله , يبجون ويكَلوله : شنوا هاي السالفة انت اول مرة قابل تتمرض؟ ليش هل المرة عالكَهة علينه ؟ وفطرت كَلوبنه عليك والله بوية اسمالله عليك انشالله عمرك طويل ونتربه بعزك , فقال لهم وهو يبتسم , بويه تعالوا أريد أوصيكم وصيه وحده بس لو متت , طبعا ً أكيد راح ابو سباهي يعين واحد من عدكم بمكاني على غاره ,فرد احد العتاوي على ابوه و كَاله: بويه عد عيناك آني اصير بمكانك بعد عمر طويل انشاء الله , فرد ابوهم العتوي وكَال وصيتي للي يصير بمكاني هي لايكتل الجريذي .
بعد يومين من هذا الحجي نطاكم عمره العتوي , فسمع أهل الغابة بالخبر , من خلال السماعة اللي صايره بنص الغابة وحاطيهه على أعلى شجرة من الغابة حتى يوصل الصوت لكل ساكني هذه الغابة , , وطبعا ً ذهب ملك الغابة الى الفاتحة , ووقف يستقبل المعزين على اعتبار ان المتوفي من حاشيته المخلصين , وتكفل بكل صرفيات الفاتحة التي استمرت لاسبوع وكل يوم طبخ ونفخ لان العتوي يعتبر من الصف الاول في قيادة الغابة , مو مثل البقية يوم ونص والحكَ ربعك , وثريدهم مو دسم لو أصلا ً مابيهه ثريد شنوا يكَلك يابه هذا الاكل غير جائز ومايوصل ثوابه للميت ! وطبعا ً بعد انتهاء الفاتحة الملك ابو سباهي كَال للويلاد خل واحد يلزم مكان ابوكم فطفر احد العتاوي الي جان لا عل البال ولا على الخاطر . وصار بمكان ابوه فقال الاسد على بركة الله وذهب كل الى غايته (لا تقل شئنا فان الحظ شاء), وبعد مرور فترة طويله على وفاة العتوي الكبير, جاء الجريذي الى بيت السبع لان يعتقد ان الاتفاق قد اصبح لاغيا ً على أعتبار الطرف الآخر في العقد قد توفى , فجاء غفلة الى هذا المكان ليعقد اتفاق اخر , وقد أمسك به العتوي الجديد الي جاي بكل حيله يريد ينظف الغابه كلها من الجريذيه مو بس بيت الاسد, ولزمه من لوزته وذاك ابو نفس الدنية كَام يرافس ويتوسل بي على مود يهده ويعوفه بسبيل حاله والعفو عند المقدرة هي من شيم العتاوي , لكن العتوي الجديد صفن صفنه طويله وتذكر كل التخريب الي سببته الجريذيه واصر على ان يقضي على رأس الجريذيه المتمثل بهذا الجريذي الموفود لعقد اتفاقيه جديده فضغط بقوة على بربخ القصبه الهوائية وقطع انفاسه ففارق الحياة , فما كان من العتوي الاّ أن ذهب مسرعا ً الى ملك الغابة وهو فرح بهذا الانجاز العظيم الذي لم يستطع سلفه من حسم هذا الموضوع ، وطبعا ً وقتهه الكَاع ماشالته وصارت طويلة بس يريد يوصل ويبشر الملك السبع من خلال سماعة الغابة , ففرح الملك ابو سباهي بهذا الانجاز الرائع الذي فعلا كما قال الملك لم يحققه اسلافك يابطل , فشكره على هذا العمل , ورأى بعض مستشاري الاسد في اجتماعهم التمهيدي ان يضعوا فقرة تسريح العتوي البطل بجدول أعمال اجتماعهم القادم ، لانه تسبب بمشكله كبيره بالنسبة لهم ستكون تداعياتها خطيره عليهم ، ولانهم كما تعرفون تعودوا على العيش على التناقضات.
بالله عليكم شتقترحون : يسرحون العتوي البطل ؟ لو يخلوه يروح ابفاله ويقضي على كل الجريذيه الي ما زالو يعبثون بمصيرجحر ابو سباهي؟ ولازم يكون الكم راي بهاي السالفه ، لان الوضع ما يتحمل السكته وهو كحد السيف ، ومو واحد يرد عليه ويكول خاف (شسمه).

الرجوع الى أعلى الصفحة اذهب الى الأسفل
 
من الظلم تسريح العتوي البطل على خلفية أجتثاث الجريذي !
استعرض الموضوع السابق استعرض الموضوع التالي الرجوع الى أعلى الصفحة 
صفحة 1 من اصل 1

صلاحيات هذا المنتدى:لاتستطيع الرد على المواضيع في هذا المنتدى
البيت الآرامي العراقي :: الاخبار العامة والسياسية General and political news :: منتدى المنبر السياسي والحوار الهادئ والنقاش الجاد الحر Political platform & forum for dialogue & discussion-
انتقل الى: