بساط السفر : الشاعر حامد الرعد

بساط السفر

بساط السفر
طير بيّه
بشوكك
ويّا حدر الفجر

وسويلي
الشمس شمسين


شوّفني
عشكك وهنه
بين غابات العمر

ونسيني
عذاب أسنين


علمني
سوالف اهلنه
الطيبات
ويّا الكمر

وامسح دموعي
من الخدّين


لا تتركني
وحدي بلياكك
على بساط السفر

لو بالماي
مجتوف العضدين


تراني
متحمل ظيم
وقهر

وسنين الهجر
يا روح الروح
ويا ضي العين


اضيع بلهفة
وشوكك
ويّا طيّات شعر الغجر

وهزّ خصر
و جتف
النهدين


واسكر
واتيه
على نغمات
ضرب الوتر

ويشمت بيّه
الراح
والرد
والزين
والشين


وادورلك
واسأل عليك
ومالي عذر

لو شايل على راسي
كل السلف
والصوبين


من بعد عيونك
عيوني أتسيل
مثل ماي النهر
بين صحرا
وصخر
وتيبس
كل البساتين


لا تتركني
شلون
يعيش بلا ماي
وركك الشجر

لو سافرت عنّه
شواطي الفراتين


اعيونك انهار
وجبال
وغابات
اشجار السدر

تكحل
رووس النخل
وتعطّر الرياحين


انت لي
كل الناس
من ريف
وبدو
وحضر

وكرامة
وخبز
وماي
وشمس
وللعراقين


انت والعباس
رفعة راس
غصب على
من غاب وحضر

انت نار
وغضب
واحساس
وكهوة للفناجين


انت الدرب
والمقياس
والنوم
والسهر

وعيد
وفرح
وشدّة ورد
للمعيدين


انت غيرة تاريخ
ومجد
وفرحة نصر

على روم
وعجم
وخدم
واراذل المعتدين


انت عراق
المجد والعز
بوجه سنين القهر

انت عراق
المجد والنصر
لكل العراقين



ابحث عن حبيبتي بغداد
هل تعلقت
باطراف الزمان
هل استقرت بمكان

لكنها رفعت فوق السماء
يوم السماء صارت
وردة كالدهان