البيت الآرامي العراقي




البيت الآرامي العراقي

سياسي ِ ثقافي ِ أجتماعي


 
الرئيسيةالرئيسيةبحـثالتسجيلarakeyboardsyrkeyboardدخول

شاطر | 
 

 حبيب العربنجي : نفر شفافية سفري

استعرض الموضوع السابق استعرض الموضوع التالي اذهب الى الأسفل 
كاتب الموضوعرسالة
البيت الارامي العراقي
الادارة
الادارة



الدولة : المانيا
الجنس : ذكر
عدد المساهمات : 9521
تاريخ التسجيل : 07/10/2009
التوقيت :

مُساهمةموضوع: حبيب العربنجي : نفر شفافية سفري   الإثنين 21 يونيو 2010, 1:55 am


حبيب العربنجي : نفر شفافية سفري


19/06/2010



[ندعوك للتسجيل في المنتدى أو التعريف بنفسك لمعاينة هذه الصورة]يوم بعد يوم نكتشف إبداعات جماعتنا، ودا نشوف إشگد دا نظلمهم لأن مدا نفتهمهم لأن همّ مو مال هالزمان ولا همّ لشكولات مثل شكولاتنا... وياما ضحكنا على أبو الشفافية ونصبنا عليه، تالي طلعنا إحنا النصبة، وتعال إنصب علينا شتريد، والله نصبة ولا عبالك ميز 24 كرسي، تگدر تنصب إشما تريد عليه، يعني الحكومة والسياسيين الخايسين صار لهم سبع سنوات ناصبين علينا وبعد أكو مجال للنصبة، عبالك حروف النصب والجر مخترعيها إلنا، واحد ينصب واللاخ يجرنا مثل الزمايل ويا ريت لو نعرف وين يجرنا، يعني حتى الزمال مال عربانة أبو النفط يعرف دربه أنو رايح للبنزينخانة حتى يجيب نفط، بس إحنا صايرين زمايل تايهين، وماكو لا إعتراض ولا فاول أو أوفسايد (هاي مصطلحات بمناسبة المونديال وفوفوزيلا).
وتعالوا شوفوا موضوع الشفافية وشنو آخر أخباره، ...بس والله العظيم الناس برة العراق العقيم عدها حظ من كونكريت گاعد ذيج الگعدة ولا يتزحزح حتى لو يجي تسونامي عليه، يمعودين إللي عنده حظ حتى يدخل للجنة بغير حساب" وما يلقاها إلا ذو حظ عظيم" وإذا إشتغل الحظ وي الواسطة.... بهي بهي....إنت والگول والهوا بظهرك. يعني الناس إللي الله مفضل عليهم عدهم ملكة جمال الشافية، والله العظيم، وإسمها " ديانا ميندوزا" وإذا تعرفون منو هي ديانا ميندوزا راح تلطمون ولا لطمكم على الهريسة، وترگعون راسكم بالحايط لمدة أسبوع قابل للزيادة لأسباب أمنية بعد تقديم الطعون القانونية اللازمة، لأن ديانا ميندوا الفليبينية هي ملكة جمال الكون لسنة 2008، يعني تخبللللللللللللللللللل فرد بمبونة أرق من جنح فراشة، صدك شفافة، صارت ملكة الشفافية ، وما أعرف شبيه حظنا الخايس مثل چهرة السياسيين مالتنا، إي إشبينا أشو الشفافية مالتنا لا بيها ملكة ولا أميرة، إحنا عدنا أبو الشفافية، عبالك منتول بالكهرباء (هنيا له إذا صدگ لأن اكو كهرباء ودينتله.... حظظظظظظظظظظظ هي گوة !!) وطالعة من راسه وايرات عبالك مولدة ديزل، ويا ريت لو مولدة بيها خير، وفوگ كل القهر والضيم عنده لقب راس ثور....يعني دكتور....
والله العتب على الحكومة... يعني لو مقدمة ملف العراق في الدعوة إلى الشفافية چنا هسة مكان ميندوزا، وتخيلوا صاحبنا السرسري وهو لابس مايوه بكيني (عييييييييييييييييييييييييييع) ويتمختر على المسرح لأستلام عرش الشفافية العالمية، بس يجوز يجوز لأسباب إنسانية وحفاظا على الذوق العام والخاص راح يتنازل عن هذا الحق والظهور التاريخي للمناضلة الكبيرة صفوة (قلبت الياء واواً لضروة النشر) إللي لقبها من إسم نجمة العرب بالجاهلية ...تصوروها هي بوزنها فوق الوزن المفتوح بالملاكمة وتطلع تتهادى على المسرح ولابسة بكيني ياباني آخر موديل وأكيد تعرفون شلونه هو البكيني الياباني... صدگ يلائم موضوع الشفافية لأن الملاعين اليابانيين طلعوا إلنا موديل صدگ شفاف، بس قبغ على النقاط الحمرا، شوفوا اليابانيين ما عدهم خطوط حمراء لأن الخط عبارة عن عدد لا متناهي من النقاط، بس همّ ناس عمليين، شغلتهم بس نقاط حمر معدودة، المهم البكيني الياباني مناسب جدا للحكومات اللي ترفع شعار الشفافية وتغني ليل ونهار " البسمة إرتسمت بلطافة، والسياسة صارت شفافة" وطبعا همين نرجع ونگول أحسن واحد يغني هاي الأغنية هو أبو كرار الزبادي بصوته اللي هو مصنف ضمن أنواع العذاب يوم القيامة ولا صوت فوفوزيلا المزعج إللي دوخ اللواعيب والجمهور في المونديال.... عيوني أبو كرار.
وتعالوا شوفوا شنو أولى مهمات الملكة ميندوزا؟
أول شي أجتمعت وي السياسيين إللي عدهم إنتخابات وفهمتهم شنو معنى الشفافية... وللأمانة والباص أبو الطابقين والتاريخ الطبيعي، ما أعرف هي شلون فهمتهم شنو تعني الشفافية، يعني بعرض سلايدات لو عرض من تلفزيون الواقع أو باللمس والإحساس، المهم هي هسة عدها حملة عالمية لتشجيع الشفافية (يا رب توصل يمنا وتورينا الشفافية مالتها...........يا رب دعاء عراقي مقطوع عنه الكهرباء 21 ساعة وأربعين دقيقة يوم الجمعة من چانت درجة الحرارة 51 مئوية). وصرحت ميندوزا "صدقة لألله شلون ميندوزا... والنوب تصرح.... خرة بألمانيا" إن هي أملها - يا حرام عدها أمل – تشوف العالم شفاف ...شنو گاعدين بملهى لو بالعالم !!
وتگول الأخبار أن ميندوزا نشطة حييييييييييل... حتى أن بركة حسين أبو عمامة والمعروف بالأسم الحركي باراك أوباما گال عن ميندوزا هي خوش بنية وعدها شفافية ما تنوصف (طبعا ليش هي الشفافية تنشاف حتى تنوصف؟...يعني صدك أوباما دا يخربط).
أما الإتحاد الأوروبي... فگال نهنىء الملكة ميندوزا، ونهنىء الشعب الفليبين لأن إختيار الملكة جرى بسلاسة...شلون بخت....الناس عدها سلس الإنتخابات، وإحنا عدنا سياسيين عدهم سلس البول وتعيط من عدهم ريحة البول وين ما راحوا ومن وين ما أجوا.
بس آني وصلتني أخبار توها طالعة من سراديب النجف... تگول هاي الأخبار إن جماعة السرسري وبمساعدة رسمية من دولة الفافون راح يقدمون طعن في نتائج إنتخابات ملكة الشفافية، وراح يطالبون بإعادة الإنتخابات بطريقة اللمس اليدوي للتأكد من إنعدام أي شي على جسم الملكة حتى تستاهل لقب الشفافية... مثل ما هم نزعوا أي كرامة من جسد العراق... وخلونا ربي كما خلقتني عراة بين دول العالم، لا عدنا كرامة تغطينا، ولا عدنا سياسيين يسترونا.... وهي هاي الشفافية مالتنا...هل من منافس !!
الرجوع الى أعلى الصفحة اذهب الى الأسفل
 
حبيب العربنجي : نفر شفافية سفري
استعرض الموضوع السابق استعرض الموضوع التالي الرجوع الى أعلى الصفحة 
صفحة 1 من اصل 1

صلاحيات هذا المنتدى:لاتستطيع الرد على المواضيع في هذا المنتدى
البيت الآرامي العراقي :: الثقافية , الادبية , التاريخية , الحضارية , والتراثية Cultural, literary, historical, cultural, & heritage :: منتدى قرأت لك والثقافة العامة والمعرفة Forum I read you & general culture & knowledge-
انتقل الى: