[ندعوك للتسجيل في المنتدى أو التعريف بنفسك لمعاينة هذا الرابط]تتذكرون من چان أكو فرد شي ببيوتنا، ثگيل ويلمع، وبيه وايرات طويلة، وچنا نخلي الواير مال هالشي بمكان بالحايط إذا ما خانتني الذاكرة چنا نسميه سيويج الكهرباء أو البلاگ!! وهذا الشي الثگيل چان أول حاجة واحد يفكر بيها من يتزوج ويريد يأثث بيت، وأتذكر من تزوجت چانت أكو أزمة بالسوگ لأن مديرية أمن الأزلام طلبت ذيچ الفترة كميات هواية منها حتى تعدل الناس المو عدلة!! عرفتوا الحزورة لو نتصل بالست شريهان بلكن تعرف الجواب حتى لو أعتزلت لأن ذاكرتها قوية، بس هي تگول فزورة مو حزورة... فيكات مال أو لا لاااااااااااااه. وحتى لا تدوخون وتروحون بعيد وتتعبون بالجواب وترجعون لا جواب ولا ماي ولا كهرباء ، راح أنطيكم الجواب وأمري إلى الله إذا شهگتوا من البچي من تعرفوه، هذا الشي هو الراحل العزيز (أوتي كهربائي) الذي نعاه العراقيون في رسالة رثائية مؤثرة تلقت المرجعية نسخة منها وتم حفظها لتدريسها على طلبة الأصول، كما تلقت هيئة سخفاء المسلمين نسخة من المرثية حتى يدگون الدفوف ويغنوها على مقام (طالعة من بيت أبوها ورايحة لبيت الجيران) بس العزيز أوتي كهربائي طلع من بيت العراقيين وبعد ما رجع ولا هو ببيت الجيران لأن هم همين ما عدهم كهرباء... خطية (أوتي) برگبتكم يا عراقيين مثل ما گالت المطربة الكبيرة (سعاد الصغيرة) في أغنيتها الخالدة (آني بشاربك خلصني منهم) بس سعاد إجاها واحد چحنتي وكومها بالگاع بباب سينما بابل... لا الشوارب الفوگانية فادن، ولا الشوارب التحتانية... وما بينهما سوالف تعبانة... وخسر العراق المطربة الكبيرة سعاد الصغيرة.. خوش جدلية بأسمها، بنيوية وتفكيكية، ميتشيل فوكو على جاك دريدا!! ومن يوم ما فقدنا (أوتينا) من جلسة العائلة وما گمنا نشوفه تحت الدرج - المكان إللي يخلي بيه العراقيون ميز الأوتي – وآني نفسي مسدودة بالتبادوراية ما أريد أسمع ذكرى ذلك العزيز ولا حتى أشوف ميز مالته ! آيباااااخ عليه من چان يگعد على الميز، منو چان يگدر يروح يمه، والله چانت عنده كاريزما تخبل مو مثل شكولات هالوكت ما بيهم چهرة بيها خير، وحتى لو بالچذب أكو خير ما يبين لأن لحية قذرة راح تغطيه. وكل هاي الفترة أريد أنسى (أوتي)... نوبة بالعرگ ونوبة بالدومينو، بس البارحة بالليل نفسي هاجت عليّ وصارت شغلة خلتني أعيد شريط أيامي وي هذا العزيز (أوتينا). والشغلة إللي صارت أن كريم صفاته ووحيد زمانه صار لوتي براسنا وگام يبيع شرف... أبو الگرگري!! وراد يمثل دور شريف روما علينا، ولك شجابك على شريف روما إللي كلنا نعرف قصته چان واحد گ........رن (عفية أياد لا تمسح ويضيع المعنى مثل المقالة مال البارحة شايل سطر كامل من البداية) وإجت له فرصة يمثل دور بالمسرحية ويصير شريف حتى لو بالتمثيل والچذب! وهسة كريم صفاته ووحيد زمانه إجت له فرصة من ثورة الكهرباء في البصرة وراد يلعبها ويستفاد منها.. خوش صيدة.. وقدم إستقالته... ها ها ها هااااااااااااااااااااااااااااي... شايفين اللواتة، يقدم إستقالته من حكومة منتهية صلاحياتها، بالله صايرة دايرة لا حاطة ولا طايرة، يعني طول فترة وزارته من چان يسمع الشكاوى والعويل واللطم على الكهرباء ما تحركت عنده دودة الغيرة، يجوز چانت بعدها شرنقة بالقولون، بس هسة صارت دودة ونزلت للمستقيم (هاي المصطلحات حتى أياد ينشرها بس أنتو ممكن تبدلونها مع المصطلحات العربنجية المتداولة حصريا في مقالاتنا وتعرفون شنو مرادف المستقيم موووووو!! عفية عليكم)، ومن إجت إشارة لكريم صفاته ووحيد زمانه إن هو ما راح يظل بمنصبه بالحكومة الجاية إللي بعدها مگمطة بطهران، گال عد عيناك يا وطن العزة، يعني هذا الفلتة (خلي التاء قبل الفاء رجاءاً)ما قدم إستقالته من شاف الموقع الألكتروني الممتاز إللي طيح حظه وحظ السيسترمالته وما تحركت عنده الغيرة على شرفه وعلى عرضه من شاف الصور المخازي بهالموقع، هسة يجي ويصير شريف براسي؟ خوش بطة تلعب شناو بتك إيد!! وقدم إستقالته مثل إستقالة الچذاب عبدالناصر إللي طيح حظ العرب ومن ذيچ الطيحة وإحنا طايحي الحظ ونازلين حدرة بطيحان الحظ ولا أحد يهمنا. لا والنوب الحلو هسة يللا تذكر الأخ المناضل أن الأميركان قوات غزو وإحتلال!! من نعلة على ذيچ النطفة الخايسة إللي طالع منها، ولك الناس گاموا يسوون ثلاجات مالتهم كنتور ملابس وأنت گاعد ولا همك شي، والفريزرات باعوها للمغسلچية حتى يفرشون الميت عليه من يغسلوه، وترافيك لايتات صارت ذكرى من ماضي مؤلم مرتبط بالحصار ولغيناها لأن الأطفال يوگفون بالإشارات ويبيعون علج وهاي صورة أبداً ما حلوة في العراق الديمقراطي الجديد، وبعد ما چانت المطابخ العراقية تتباهى بيناتها بموديل ست البيت الكهربائي مالتها مولينيكس لو ناشيونال لو توشيبا، گمنا نستخدم بلندر مال ست البيت بدال الدولكة من عدنا خطار، والغسالة.... خو الغسالة ولا صايرة سوايتها وخاصة إذا بيها حوضين، لأن العبقرية العراقية شالت القبغ من كل حوض وخلت بيه چيس نايلون..حوض لزبل المطبخ قبل الأكل، وحوض لفضلات المواعين بعد الأكل.... والله كشخة، ولك كل هذا صارت وأنت بالحكومة ضارب دالغة أو صافن... وتعرف الصفنة إلمن يا كريمووووووووووو. يمعود گمنا نكتب في بطاقات المعايدات والمسجات للأحبة والگيرل فريند (إن شاء الله تنتليــن) من المعزة وخاصة في فالنتاين، هو وين لاگين كهرباء حتى ننتل، وصاروا الأفندية مالتنا كلهم يطلعون للسوگ لابسين بيجايم لو تراكسوتات ، يمعود حتى الطبيب گام يداوم بالتراكسوت لأن ما يحتاج أوتي، كل هذا وأنت جبل ما تهزك ريح، وتريد هسة تقنعنا أهتزيت وصرت شريف، شنو دودة الغيرة مالتك چانت في السبات الحكومي لو چانت بمجلس النوام وما صحت إلا من صارت الحكومة إكسباير !! وهاي همين مكرمة وكرامة للعراقيين الصابرين، الله عوضها علينا بدعاء الأمهات والصالحين من كثر ما دعينا (أللهم آجرنا في مصيبتنا وعوضنا خيراً منها) من فقدنا العزيز الغالي (أوتي كهربائي) ورب العالمين برحمته الواسعة عوض علينا بـــ (لوتي كهربائي) !! بالباكيت يتناسب وي العراق المسلفن الجديد... وينگط دهن غيرة !!! [ندعوك للتسجيل في المنتدى أو التعريف بنفسك لمعاينة هذا الرابط]
من هنا 
من هنا 
من هنا 
الخميس 24 يونيو 2010 - 2:08
