البيت الآرامي العراقي




البيت الآرامي العراقي

سياسي ِ ثقافي ِ أجتماعي


 
الرئيسيةالرئيسيةبحـثالتسجيلarakeyboardsyrkeyboardدخول

شاطر | 
 

 █ نوري المالكـــــي ... أنــــتَ فاشــــــل !!! █

استعرض الموضوع السابق استعرض الموضوع التالي اذهب الى الأسفل 
كاتب الموضوعرسالة
حبيب حنا حبيب
مشرف مميز
مشرف مميز









الدولة : العراق
الجنس : ذكر
عدد المساهمات : 20127
مزاجي : احبكم
تاريخ التسجيل : 25/01/2010
الابراج : الجوزاء
التوقيت :

مُساهمةموضوع: █ نوري المالكـــــي ... أنــــتَ فاشــــــل !!! █   الثلاثاء 03 يونيو 2014, 2:37 pm




 irag 

نوري المالكي .. أنت فاشل !
بقلم / فالح العتابي :
چنا نحلم نشوف العراق , كله خضار وسلام ومحبه , وضحينا بالالاف من الشهداء , حتى نتخلص من الدكتاتوريه والعبوديه والظلم ..
وشــگد فرحنا , من شفنا زلم عراقيين جايين من بره , گلونا راح نبني ونعمر هذا العراق , ونزيح الظلم والحيف
اللي وگع على شعبنا , جراء سياسات فاشله للقائد والرمز الاوحد , وراح يصير الحكم بالعراق وفق العداله الاجتماعيه ..
وبيني وبينكم , شــگد فرحت , من عرفت الشيعه , ولاول مره بعد أربعميتسنه , راح يحكمون .. وچنت أتراهن ويه أصدقائي ,
لو بس الشيعه تحكم مره , راح تشوفون , شلون جماعتنا , تحكم , مثل ما چانو أهل بيت الرسول الكريم يحكمون ..
وهم بيني وبينكم , من عرفت نوري المالكي , صار رئيس وزراء العراق , ما تصدگون شلون چانت فرحتي ..
لان أبو سراوي , رجل نزيه ومؤمن بالله , ومن صدگ عزم وبناء وأعمار, ورجل ما يؤمن بالطائفيه ,
وعنده الرجل المناسب في المكان المناسب ..
وجيبه جيبه , خلصن أربع سنين , وأحنا بس أنباوع , هاي شنهي , أشو كلشي ماكو ! .. معقوله الحچي أبو سراوي هذا ..
اجـــا .. وين البناء والاعمار ؟ , وين تعويض مظلومية الشعب ؟ .. أشو بغداد من صارت سئ الى الاسوء ! ..
الفقر والعوز وصل لأبو موزه , الزباله والخيسه صارت عنوان بغداد الحبيبه ! , خريجين كليات ومعاهد گاعدين بالگهاوي
ينتظرون الفرج , المخدرات وحبوب الهلوسه صارت تغزو مدنا ! , والارهاب يضرب بينا , ويمكن راح نشوفه ببيوتنا
في يوم من الايام , ويوميه عدنا فواجع , من وره قاده فاشلين وأنتهازيين .. لا وچماله الحچي أبو سراوي ,
أيدافع عن اللّي خمّــطو فلوس الشعب , وصار الفساد بالعراق صفه أطلقت على الولايه الاولى للمالكي !..
وهم رحنا وتقشمرنا وأنتخبنا الحجي مرة ثانيه ! .. وبهاي الولايه , أثبت نوري المالكي فشله وتخبطه بكلشي ..
داخليا وخارجيا .. سياسيا وأقتصاديا وأجتماعيا ..أول ريس وزراء عراقي , يثبت باليقين أنو فاشل وضحل ! ,
ومو مال رئيس وزراء يا عالم .. چلب أبن چلب اللّـي قشمر هذا الرجال , وخلاه بهذا المكان ! ..
هاي شنو ؟ ! هذا دمر العراق والعراقيين ! .. نهب كل ثرواتنا , هجّــرالوادم بأسم محاربة الارهاب ,
أستغل القضاء لأغراض دنيئه ضد خصومه اللّي شاركوه بالعمليه السياسيه ! .. سيطر على كلشي ..
وهم صار الضروره والقائد الرمز ! .. وأحنه مشينا للحرب .. بأختصار ما سوينا كلشي .. راح صنم وجابولنا أصنام ! ..
وشــگد عيب على ررئيس وزراء عايف شغله ومسؤوليته , وحط كورته ويه الوطنيين الشرفاء اللي كشفو زيفه وخياسه ! ..
والقضاء االأرعن أيطبق شيريده هذا الفاشل ؟ ! .. وتعلم طريقة لجم حلوگ الاعلامين والمثقفين , وحطلي چـم سيبندي بمحكمة النشر البعثيه ,
حتى يبتزون كل صوت عراقي شريف .. هاي مو حاله حجي .. والله عيب عليك ! .. روح شوف شلون تخيط الشك اللّي فتحته بالانبار ,
هاي وصمة عار تبقى بگصتك يا نوري المالكي ! ..
كافي هسه عاد يا أبو سراوي .. كلشي آنكشف وبان على حقيقته .. وجربت حظك مرتين .. وهذا الشعب يا أبو سراوي مو للتجربه !..
أشو ذاك كضا بينه 35 سنه , شبعنا ضيم وقهر, وندش بخيسه وهسه طلعنا منها نرد ندش بخيسه ثانيه ! ..
وجيت يا حجي بعد أنكس من الاول ! .. أي أدري چـم دوب يا عالم نبقى حقل تجارب لعقول مريضه وفاشله ! ..
معقوله هذا قدرنا .. ليش شعبنا نايم وهو بيده كل أدوات التغيير ؟ .. ليش ساكت مو كافي ظلم وأستعباد ؟ ..
خلّـونا أنحط أصابعنا البنفسجيه بكل العيون الوقحه اللّي تريد تضحك علينا مره ثالثه ! , وتقشمرنا أبطانيه لو بشغلات رخيصه وتافهه ! ..
بالحرب العراقيه الايرانيه , وبنهر جاسم بالضبط .. طلبت من رب العالمين , طلبتيـن .. ردت الله سبحانه ينطي عمر أطول للخميني والصدام ! ..
والثاني ردت من ربي بس أشوف نهايتهم .. وتحققت الأمنيه .. وهسه , أطلب من ربي , أشوفك بقفص الاتهام ! ,
ونفسه منير حداد هو القاضي , والادعاء العام جعفر الموسوي ! ..
وراح يطلع خياس عشر سنين .. وبس الله هو ساتر العراق والعراقيين ! ..
الرجوع الى أعلى الصفحة اذهب الى الأسفل
 
█ نوري المالكـــــي ... أنــــتَ فاشــــــل !!! █
استعرض الموضوع السابق استعرض الموضوع التالي الرجوع الى أعلى الصفحة 
صفحة 1 من اصل 1

صلاحيات هذا المنتدى:لاتستطيع الرد على المواضيع في هذا المنتدى
البيت الآرامي العراقي :: الثقافية , الادبية , التاريخية , الحضارية , والتراثية Cultural, literary, historical, cultural, & heritage :: منتدى قرأت لك والثقافة العامة والمعرفة Forum I read you & general culture & knowledge-
انتقل الى: