البيت الآرامي العراقي

 حبيب العربنجي :ديمقراطية حجي لفتة  Welcome2
 حبيب العربنجي :ديمقراطية حجي لفتة  619888zqg202ssdr
البيت الآرامي العراقي

 حبيب العربنجي :ديمقراطية حجي لفتة  Welcome2
 حبيب العربنجي :ديمقراطية حجي لفتة  619888zqg202ssdr
البيت الآرامي العراقي
هل تريد التفاعل مع هذه المساهمة؟ كل ما عليك هو إنشاء حساب جديد ببضع خطوات أو تسجيل الدخول للمتابعة.

البيت الآرامي العراقي

سياسي -ثقافي-أجتماعي


 
الرئيسيةالرئيسيةبحـثس .و .جالتسجيلarakeyboardchald keyboardدخول

 

  حبيب العربنجي :ديمقراطية حجي لفتة

اذهب الى الأسفل 
كاتب الموضوعرسالة
الشماس عصمت الدهين
مشرف مميز
مشرف مميز
الشماس عصمت الدهين


 حبيب العربنجي :ديمقراطية حجي لفتة  Usuuus10
 حبيب العربنجي :ديمقراطية حجي لفتة  8-steps1a
الدولة : المانيا
الجنس : ذكر
عدد المساهمات : 800
مزاجي : گدام الكمبيوتر
تاريخ التسجيل : 20/05/2010
الابراج : السرطان

 حبيب العربنجي :ديمقراطية حجي لفتة  Empty
مُساهمةموضوع: حبيب العربنجي :ديمقراطية حجي لفتة     حبيب العربنجي :ديمقراطية حجي لفتة  Icon_minitime1الخميس 22 يوليو 2010 - 20:33


حبيب العربنجي :ديمقراطية حجي لفتة


22/07/2010

[ندعوك للتسجيل في المنتدى أو التعريف بنفسك لمعاينة هذا الرابط]



[ندعوك للتسجيل في المنتدى أو التعريف بنفسك لمعاينة هذا الرابط]وحجي لفتة بطل سالفتنا... هو واحد من ربعنا، أمه سمته (لفتة) لأن زوجها (أبو لفتة) چان طاردها من البيت لأن جابت خمس بنات ولا ولد واحد، ومن طلعت أخذ الحاج حقه الشرعي منها قبل ما تطلع لبيت أهلها...وراحت لبيت أبوها وإهناك ظلت وعرفت نفسها
حامل (ما اعرف الصدگ من الچذب بالقصة) .، ومن جابت ولد حليو (بحسب مواصفات الحاج شتيوي ) رجعها رجلها للبيت في لفتة إنسانية من عنده ، فالأماية سمت أبنها (لفتة) على مود هاي اللفتة الإنسانية الحلوة من الحاج شتيوي إللي صار بعدين أبو لفتة!!
وچان أبو لفتة من يصير عصبي على سوالف أم لفتة يصيحها (أم تفلة) ونفس الشي من يصير عصبي على (لفتة)، أما أم لفتة فچانت ما مصدگة بروحها من تشوف أبنها بعد خمس بنات ويا ما نفخته گدام الناس وچانت تصيحه (فلتة) على أساس فلتة زمانه وفلته بطنها.
هاي المقدمة حتى نعرف منو حجي لفتة إللي هو هسة صار رجال ختيار وعنده بنين وحفدة، بس لازم نعرف البداية حتى نتصور النهاية.
كبر (لفتة) بين عقد أبوه ونفخات أمه، وصارت عنده أربع نسوان تحت كرشه، وصار صاحب چيخانة (ولو هو چان يتمنى يصير صاحب ميخانة بس لأسباب شرعية حولها لچايخانة) فيسمع سوالف السياسة والخياسة وصار خبيص سياسي ، ونقل خبصته للبيت، فزوجته الچبيرة سماها (أم فافون) لأن ما تطبخ إلا بجد فافون من أيام جدها، وزوجته إللي شايفة روحها وكل يوم مسافرة من النعيرية إلى أبو دشير سماها (أم حمزة) مع العلم هي جابت له ولد أسمه (أياد)، أما الزوجة الثالثة فطلبت تعيش بالطابق الثاني وما تنزل جوا ولو أكو كلام بين الناس أنو هي چانت مسوية ممر بين غرفتها بالطابق الفوگ وبين غرفة أبن الجيران إللي چانت مقابل غرفتها شباك على شباك، وچانت كلش تحب تسمع أغنية أوي نرجس نرجس فسماها حجي لفتة (أم ئازاد) بلكن يصير ئازاد منها (يعني يتحرر منها) ومن سوالفها التعبانة إللي چان حجي لفتة يدري بيها بس ساكت عنها لأن هي حلوة وتونس باللحظات الخاصة مال حجينا.
أما الزوجة الرابعة فچانت – اللهم لا تجعلها غيبة – عليها خوش صدر رغم هي مدحدحة ومچلبة بالعباية السودة، بس النسوان إللي زارنها بالبيت گالوا هي كلش تحب الكيف والونسة ودائما لابسة دلع بالبيت، وحجينا كان يدعي رب العالمين بلكن يهديها وچان ناصب عليها ويصيحها (أم مهتدى) على إيمانها وهداها.
ويوم من الأيام ظل حجي لفتة بالگهوة وكل الناس طلعوا، ومثل شغلته كل يوم گام يفتش جوا الكراسي بلكن أكو عبوة لاصقة لو عبوة خاتلة أو زاحفة أو ساقطة، لو يجوز أكو قنبرة إللي كان حجي لفتة عباله هي أخت فرد واحد يعرفه أسمه قنبر، وچان كل ما يسمع بقنبرة ساقطة يستغفر ربه ويگول هو قنبر خوش قنبر لعد أخته ليش ساقطة !! عموما... وهو دا يدور جوا الكراسي شاف چيس أسود مثل حظنا إللي ما موجود منه غير بس عدنا، والشهادة لله چان الحجي شجاع من ما خاف وفتح الچيس، وشاف داخل الچيس رزم أوراق....يمعودين أشوية على كيفكم مو أوراق يعني دولارات لأن حجينا وي الدولارات ما يتفاهم ..يعني لو چانت دولارات هسة لا چنا سامعين بهاي القصة ولا نعرف الدولارات وين صارن، المهم، الأوراق إللي چانت بالچيس هي اوراق قديمة مال الإنتخابات وما عليها لا إسم ولا شي، ولأن حجي لفتة يحب السياسة ، فجت بباله فكرة يسوي إنتخابات بالبيت ويوزع هاي الاوراق على نسوانه ويقرر مصير البيت والأسرة وآل حجي لفتة الكرام البررة.... والله شال الچيس ورجع للبيت قبل ما يصير حظر المشي والكهرباء مطفية!
ورجع للبيت وصاح على النسوان... طبعا صاحبتنا أم ئازاد ظلت فوگ بالطابق الثاني ورفضت تنزل... بس كلها ربع ساعة ونسمع العيطة وهي تهرول ووگعت من الدرج من خبصتها وخوفها وتصيح على حجي لفتة لأن شافت أبو بريص جوا الچرباية مالتها من چانت تدور على الأتك، لأن حجينا أشوية عنيف بهاي الشغلات ويشمر الغراض بكل مكان بذيج اللحظات، وأم ئازاد كلش تخاف من أبو بريص وكل مرة تتهم النسوان إللي بالطابق الأرضي بنشر كتائب أبو بريصية بغرفتها.
والله كعدن النسوان الأربعة وحجي لفتة بيناتهم مثل ديچ يريد يگوم بواجباته الحيوانية الديكية. بس قبل هالشي... گال سمعوني زين... آني اليوم عندي مسابقة إنتخابية وأكو أوراق بهذا الچيس الأسود راح أوزعها عليچن.. بس أوزعها بطريقتي يعني راح أفتح الچيس بنص الصينية وإللي تگدر تاخذ أكثر عدد من الأوراق هي راح تصير أم البيت وحتى أبو البيت في ظروف إستثنائية خاصة راح أگولها بعدين لأم البيت إللي تفوز بأكثر الاوراق.
وجابوا صينية چبيرة مطعوجة من ألف مكان، وطبعاً لا كهرباء ولا تهوية، وخلا حجي لفتة الصينية جوا البانكة السقفية لأن ماكو كهرباء والمولدة إستراحة، وبعدين البانكة مال بيت حجي لفتة چان بيها أربع ريش موديل هندي كلش قديم عبالك بروانة مال طيارة من الحرب العالمية الثانية، فگال حجينا هاي خوش فكرة راح جيب درج وأصعد فوگ بمستوى البانكة وأفتح الچيس حتى كل وحدة تأخذ قسمتها من الچيس بعدالة ونزاهة بحسب توصيات هيئة النزاهة.
وهناك صعد وفتح الچيس... بس الخايب ليش ما تجي الكهرباء إللي هي مطفية صار لها 23 ساعة وعشرين دقيقة وأربع ثوان وي فتحة الچيس (وأكو إشاعة إن البانكة إشتغلت بمحرك أمريكي تحتفظ بالطاقة للساعات الحرجة)، ووگع الخايب من الدرج والبانكة طيرت نص وجهه الحليو ، والاوراق طارن بكل مكان من البيت وتعالوا شوفوا النسوان هن يتراكضن على الاوراق وعافن حجي لفتة بدماياته وهو واگع بالگاع ويصيح من الوجع، وهناك جت أم حمزة وهي شلونها شوفتها تقطع النسل ... وچانت تشيل حجي لفتة وترگعه بالگاع لأن شافت ورقتين جواه رجله، أما أم ئازاد إللي كل سوالفها في المنطقة جوا الحزام وتحب هاي المنطقة فشالت دشداشة حجي لفتة بلكن أكو چم ورقة خاتلة جوا الدشداشة قريبة من منطقة بين الفخذين، أما أم مهتدى، فهي لوتية من يومها، لان عبايتها شالت هواية أوراق بطرق مشروعة وغير مشروعة ما ندري بيها شلون، أما أم فافون فراحت تتبچى عد راس حجي لفتة من ما حصلت على هواية أوراق بلكن حجينا يطلع إلها چم ورقة مضمومة عنده كحق رئاسي لأن هو صاحب البيت والقرار، وطبعاً چانت أم فافون عدها لسان أعوذ بالله وچانت متأكدة أن هي راح تأخذ أكثر عدد من الأوراق لأن ما شاء الله عليها خوش طول.
وبين هذا وذاك، تمالخن النسوان بيناتهن، وحجي لفتة گاعد ينزف ... والنوب حتى هجمن على دشداشته البيضة وگطعنها بلكن تفيد مثل قطع أوراق إنتخابية، حتى عافن الرجال هب بياض يسبح بدمه وهن مشغولات بتزوير نتائج إنتخابات حجي لفتة... بلكن وحدة بيهن تصير أم البيت بحسب كلام حجي لفتة... إللي صار هسة وصية حجي لفتة... بعد أن سلم الروح ولا وحدة من زوجاته حست بموته رغم الدماء إللي ملت البيت....وظلن النسوان باوراقهن الإنتخابية إللي ما تفيدهن بشي بعد ما راح أبو البيت...ولا حول ولا قوة إلا بالله... يرحم والديكم فاتحة على روح ديمقراطية حجي لفتة !!


[ندعوك للتسجيل في المنتدى أو التعريف بنفسك لمعاينة هذا الرابط]

الرجوع الى أعلى الصفحة اذهب الى الأسفل
 
حبيب العربنجي :ديمقراطية حجي لفتة
الرجوع الى أعلى الصفحة 
صفحة 1 من اصل 1

صلاحيات هذا المنتدى:لاتستطيع الرد على المواضيع في هذا المنتدى
البيت الآرامي العراقي :: الثقافية , الادبية , التاريخية , الحضارية , والتراثية Cultural, literary, historical, cultural, & heritage :: منتدى قرأت لك والثقافة العامة والمعرفة Forum I read you & general culture & knowledge-
انتقل الى: