البيت الآرامي العراقي




البيت الآرامي العراقي

سياسي ِ ثقافي ِ أجتماعي


 
الرئيسيةالرئيسيةبحـثالتسجيلarakeyboardsyrkeyboardدخول

شاطر | 
 

  حبيب العربنجي : محافظة رشوستان

استعرض الموضوع السابق استعرض الموضوع التالي اذهب الى الأسفل 
كاتب الموضوعرسالة
Dr.Hannani Maya
المشرف العام
المشرف العام



الدولة : العراق
الجنس : ذكر
عدد المساهمات : 37598
مزاجي : أحب المنتدى
تاريخ التسجيل : 21/09/2009
الابراج : الجوزاء
التوقيت :

مُساهمةموضوع: حبيب العربنجي : محافظة رشوستان    الخميس 29 يوليو 2010, 8:27 pm


حبيب العربنجي : محافظة رشوستان


28/07/2010



[ندعوك للتسجيل في المنتدى أو التعريف بنفسك لمعاينة هذه الصورة]ببركات الأئمة وإجتهادات الحوزة، أحرز نادي النجف – أقصد أحرزت (حرز من كل عين حاسد) محافظة النجف المركز الأول في المسابقة السنوية السابعة في بطولة الرشوة الشرعية التي تقيمها هيئة النزاهة في بلاد ما بين الوهمين... وراح تسألون ليش ما بين الوهمين!..
وطبعا عندي جواب لأن آني مثل فتاح الفال عنده جواب لكل كلاو.. أگول الوهمين، أما الوهم الأول فهو وهم التغيير إللي أبد ما يصير بالعراق، والوهم الثاني هو وهم معرفة شنو إللي جاي يصير بالبلد.. وهذا مستحيل نعرفه لأن هاي الشغلة مثل (عمر الستات) سر رباني حتى عبدالحليم حافظ إللي كان يعرف كل شي ويفتي كل الفتوات ويفتهم باللوغاريتمات والنسبية والذرة... إلا عمر الستات، وأعتقد لو أمدّ الله عمر عبدالحليم چان هسة يسوي تعديل بسيط على فقرات دستور أغنية (دئوا الشماسي) ويگول " إلا موضوع العراق" !
المهم نرجع لسالفتنا وبطولة الرشوة الشرعية، فبعد منافسة شريفة بين كل المحافظات في بلاد ما بين الوهمين للحصول على شرف رأس كأس بطولة الرشوة المقدسة، إجت محافظة النجف الأشرف من أشرف عبدالغفور بالمركز الأول...وطبعا شلون ما تفوز بالمركز الاول إذا بركات الأئمة كلها وي فريق محافظة النجف، وطبعاً الحكم ما يگدر يعترض لأن البركة ربانية وماكو إعتراض على حكم رب العالمين.. وكل مرة تريد محافظة أخرى تنافس النجف على الصدارة تجي بركة من إمام حوزوي عتوي وتدفع النجف إلى المركز الأول والصدارة عبالك شادين على النجف محرك 600 زمال.. أقصد 600 حصان !
ويمكن الكليدارية النجفية يأخذون رشاوى من المخدوعين إذا يريدون طلبيات من الأئمة عبالك ما يطلبه المشاهدون أيام من چانت أم كاميران (مديحة معارج) تقدم هذا البرنامج، فمثلاُ تطلب سيارة جديدة لازم تدفع رشوة خمس أوراق ، ورشوة زواج سعيد دفتر.. إي طبعا هذا زواج مو ضرب چعوب وكلاوات...بس بعد ما سوينا كشوفاتنا المختبرية العربنجية لدفع الأذى والشبهات عن الصالحين ، لگينا أن سوگ الكلاوات كان خوش سوگ هالسنة بسبب الإنتخابات إللي نسينا نتائجها.. فاللي يريد يصير نائم بمجلس الدواب أو نائمة جوا قبة البرلمان حتى يخلص من الواتر بمب بالصيف وصوبة علاء الدين بالشتا لازم يدفع بلاوي للأئمة والكليدارية وما تهمه، لأن گعدة برلمانية وحدة (إي والله أكو وحدة نائمة تسميها گعدة برلمانية مو جلسة برلمانية) ويطلعون أبو أبوها الرشوة إللي دفعوها، وإذا تجي على تمرير قانون لو عقد مقاولات هاي لا تحچيها.. لأن هاي تجيب فلوس عبالك كاك مفتوح على الإحتياطي الفيدرالي الأميركي من الدولارات.
بس ترى خطوط لعب محافظة النجف ما حد يگدر يجيب مثلها... يعني خلونا نبدي من المدرب.. شوفوا شلون مدرب محترف بالرشاوى.. يعني فتوى من عنده لمساندة الكتلة الفلانية أو القائمة العلانية تكون بملايين الدولارات.. مدرب ما جابته جيابة.. حتى مورينيو مو هيچي. وعندك لاعب مراوغ بمركز خطيب صلاة الجمعة، أبدا ما يتفاهم، أصلاً نشاطاته طالعة بـــرة مثل طـــــ--ي--ـــــــز الصخلة، ويفتهم حتى بالبرنامج المنوي العفو البرنامج النووي الإيراني وفضايح ساركوزي وأنواع الخيار والتعروزي ويعرف الفرق بين الرواندوزي والليمون دوزي، يعني مثل هذا اللاعب ماكو منه لو تدورون غابات مدغشقر بإستعمال گوگول إيرث.
ونجي هسة لخط الكلاو الأقوى في محافظة النجف..وهو خط المواسم المليونية، مصنع مال رشاوى إذا تريد زيارتك توصل للإمام وتكون من المبشرين بالرحمة والمغفرة وتأخذ بيدك صك الغفران مالتك وتكبسه بالنايلون اللماع حتى تقدمه للحاج رضوان إللي يوگف بباب الجنة حتى تدخل للجنة بغير حساب ما دام إنت زرت الإمام في المواسم المليونية، وبعدين هذا الخط العجيب بيه لواعيب فنانين، إذا ما تدفع وتمشي إيدك ما تحصل على خوش زنجير حتى تملخ روحك بالضرب بالزنجير لسبب ما زلنا نبحث عن جواب له حتى بالإستعانة بتلسكوب هابل بلكن نلگي الجواب في المجرات البعيدة عن كوكبنا، وإذا ما تدفع زين راح تحصل على زنجير تايواني بدال الزنجير الإيراني، والزنجير التايواني لو تظل تضرب نفسك يومين بدون توقف (إن شاء الله للكهرباء يومين بدون توقف ولا برمجة) ما راح تشوف ولا قطرة دم على جسدك التائب الطاهر!!
وبعدين نجي على خط الدفانة.. يا يابة شلون خط يخوف.. وهذا الخط لعبته بالرشوة لعبة ذكية، إمدومن عالراسين، يعني لازم تدفع رشوة حتى تحصل سرداب قريب من وادي السلام هذا إذا الأخوة الإيرانيين خلونا مكان، وفوت بفالك من تحصل مكان هناك، لا يجيك مالــــــك خازن النار ولا يوصل يمك، وإذا چــان الحجي مالتكم (يعني الوالـــد الله يرحمه) عرقــــچي وگــــ---ح---ـــــبـچي ولاعب بذيله هواية من چان بالحياة، فأكيد ما راح تبخلون عليه وتدفعون الرشوة حتى تصيرون خوش ولد وتطلعون من حق الحجي إللي رباكم وتعب عليكم حتى لا ينحرج يوم القيامة ويروح لجهنم وعينه المدمعة على باب الجنة ويلعن سلسفيل أجدادكم لأن ما دفعتوا له فلسين وتخلصوه من هذا الموقف المحرج خاصة گدام الحجية الوالدة وهي تسمع نشرة أخبار الحجي الگـــ--ح--ـــبچي. وبعدين إذا ما تدفعون الرشوة المطلوبة للدفان راح يروح يدومن من الراس الثاني... شلوووووون !! أگوللكم شلون..يعني راح يتفق الدفان وي طلاب كلية الطب وراح يبيع لشة الحجي لطلاب الطبية حتى يتعلموا براس الحجي الأگرع فنون أبقراط الطبية، ومو بعيدة بعد چم سنة من وفاة الحجي تروح لعيادة دكتور بالنجف وتوگف گدام جمجمة الوالد وما تعرف أن هاي الجمجمة هي جمجمة الوالد إنباعت للدكتور حتى يكشخ بيها بالعيادة ومن تلزمها يگوللك الدكتور عيني دير بالك لا تكسرها... عبالك هي مو جمجمة الوالد وإلك حق بيها تلزمها وتلعب بيها !! وبعدين الدفانة رضوان الله عليهم عدهم لعبة ذكية أخرى هي البيع والتجارة بأخشاب التوابيت، وآني شخصياً أعرف واحد يشتغل دفان وعنده محل موبيليات بالنجف كلها من أخشاب التوابيت... ويبن تلگون هيچ لواعيب !
وإذا نجي على مجلس المحافظة..يا ستار يا رب.. أكيد سمعتوا بالقطار الطائر..يعني هذا الكلاو ما حد يدبره غير مجلس محافظة متمرس بالكلاو والرشاوى...قطار وطائر !! الله أكبر!! مثل واحد محشش سأل صديقه " هو اليوم شنو السبت لو الأحد" فجاوبه صديقه " اليوم الإثنين" فگال المحشش " بشرفك !! الإثنين سوا فرد نوب... والله خوش حكومة"!! وهذا المشروع كلفته 30 مليار دولار يعني كلفة ميزانية دولة مو مشروع مال قطار، بس يمكن من يطير القطار يوصل لهالرقم لأن الفلوس تطير وي القطار الطائر، وبعدين تعالوا وشوفوا منو المقاول والإستشاري؟! شركة نيجيرية، وإذا تروحون على الانترنت وتسوون بحث وتكتبون (الإحتيال النيجيري) راح تشوفون أكو نصب وإحتيال وبراءة إختراع بالنصب مسجل بإسم النيجيريين من يتفننون في قشمرة الحكومات والأشخاص والنصب عليهم بإرسال إيميل عن خبرات كلها چذب وعن مشاريع كلها كلاوات و " آني زوجة مدير المصرف الفلاني إللي مات بحادث طيارة لوكربي وترك لي 500 مليون دولار وما أعرف وين أستثمره" وأكيد السيد محافظ النجف شاف واحد من هاي الإيميلات وصار ميز مال نصبة.
بس دا يگولون هالأيام السوگ واگف بالنجف عبالك ماخذ شريطين فياجرا.. والدليل أن ما أحد من الأحزاب والكتل السياسية دفع رشوة حتى تجي له بركة وفتوى ويصير رئيس وزراء بلاد ما بين الوهمين.. يا جماعة ترى البخل مو زين وراح يوديكم للنار وجهنم.. وراح يودي الوطن إلى مزبلة التاريخ، هذا إذا ظل فيها أشوية مكان وما أنترست من زبالة سوالفنا التعبانة... يمعودين ورقوا وخلصونا من هاي المسرحية الحزينة !
[ندعوك للتسجيل في المنتدى أو التعريف بنفسك لمعاينة هذا الرابط]
الرجوع الى أعلى الصفحة اذهب الى الأسفل
 
حبيب العربنجي : محافظة رشوستان
استعرض الموضوع السابق استعرض الموضوع التالي الرجوع الى أعلى الصفحة 
صفحة 1 من اصل 1

صلاحيات هذا المنتدى:لاتستطيع الرد على المواضيع في هذا المنتدى
البيت الآرامي العراقي :: الثقافية , الادبية , التاريخية , الحضارية , والتراثية Cultural, literary, historical, cultural, & heritage :: منتدى قرأت لك والثقافة العامة والمعرفة Forum I read you & general culture & knowledge-
انتقل الى: