[ندعوك للتسجيل في المنتدى أو التعريف بنفسك لمعاينة هذا الرابط]ما اريد ارجع باك... مو أوروزدي باك، قصدي أرجع لي ورا وأكرر الجملة المملة مال ماكو كهرباء وإنقطاع الدورة الشهرية والتيار الكهربائي ، فهاي الشغلة صارت من مقومات الوجود العراقي التعيس على الطوبة الأرضية الحايرة بروحها من ورا التسونامي الحراري ، بس الشغلة هالمرة غير شكل عالبايسيكل ! فحكومتنا الرشيدة الرائدة في إبتكار الجمل الترويجية والترويحية إللي ما تنصرف غير براس الغشمة... والحمد لله الشعب كله غشيم في العراق العقيم، يعني خوش سوگ صرافة مال كلاو حكومي بالعراق بس هي وينها الحكومة، أشو الحالة صايرة مثل زمال متيه صاحبه ودا يجوعر مدا يعرف وين طريق الكراب مالته، يعني الزمال زمال بدال ما يسكت من يتيه صاحبه بلكن اشوية يرتاح، نشوفه يگوم يجوعر حتى صاحبه يلگيه ويرجعه للكراب، وطبقوا هاي الحالة على حالتنا العراقية الأبية وراح تعرفون إحنا ضمن هذا الفصيل الحيواني لو لا !! المهم... الحكومة الجبارة إللي عبالك هي خطوة أرمسترونغ الجبارة على القمر...تريد تريح الشعب من التسونامي الحراري وتريده يعتمد على نفسه بأستعمال الطاقة الذاتية المتوفرة في كل أبناء العراق، وهاي الطاقة لا تفنى، بس تستحدث في تحدي سافر لقوانين الثرموديناميك وخاصة القانون الأول إللي يگول الطاقة لا تفنى ولا تستحدث، فكل الشعب العراقي دايخين ومصابين بفيروس الدوخة إللي ينتشر في العراق حصريا مثل المسلسلات الرمضانية الحصرية على القنوات المصرية ، يعني كل واحد من الشعب العراقي عنده الطاقة الدوخانية تخلي راسه يفتر بسرعة 7000 r.p.m وإللي ما يعرفون هاي الرموز أگول هي تعني دورة بالدقيقة الواحدة، يعني راس العراقي يفتر بسرعة مثل جناح طائر الطنان إللي يهتز ضعف هذا العدد بالدقيقة، بس الفرق أن الطائر الطنان يحرك جناحه بفرح وهي ترگص من وردة إلى إليسا... أهووووووووووووو قصدي من وردة إلى وردة ، بينما سرعة دوران الراس العراقي لا بيها فرح ولا چوبي ولا رگص العمارة إللي صار هسة رگصة البرتقالة، فالراس العراقي صاير بروانة ذاتية الحركية وهاي هي فكرة الحكومة، إستغلال دوخة العراقي حتى يظل راسه يفتر بسرعات كبيرة لتوليد تيار هوائي بارد حول نفسه، وما يعتمد على الكهرباء الوطنية إللي دفناها في مقبرة الغرباء، لأن كلش غريبة علينا نفتح سويچ الكهرباء ونشوف الگلوب يشتعل، ومن راحت العزيزة الغالية كل واحد تبرا منها عبالك مسوية سواية وعملة سودة، أشو ياهو يجي يگول مشكلة الموت المأساوي للطاقة الكهربائية ما نعرفها شنو السبب... فگلنا أحسن شي خلي ندفنها في مقبرة الغرباء في إنتظار أن يبعث الله لنا العم فاراداي لتصليح حالتنا مثلما بعث لبني إسرائيل طالوت ملكا، وإحنا مستعدين إذا الله سبحانه بعث إلنا عم فاراداي جديد نقاتل تحت رايته كما قاتل داوود تحت راية طالوت الملك وقتل جالوت (هذا فاصل ديني بمناسبة رمضان...وكل رمضان وإحنا أبو أبونا مسموط ... وآني بديرة والحكومة بديرة والكرسي في حيرة) ! يعني هسة كل عراقي عنده بروانة... وقبل چانت عدنا منطقة بروانة بين البغدادي والحديثة وبيها جسر حديدي طايف ما أدري بعده لو تفرهد ... حتى نگول تبچي حديثة وعانة على جسر بروانة والحكومة تعرف شلون تشغل البروانة عد كل عراقي وتخلي ما يحس لا بحرارة الصيف ولا بضيم رمضان وي هذا التسونامي الحراري، وشوف ا التصريحات الحكومية الرمضانية ، تخلي الراس يصير بورانة مال طيارة Focke-Wulf الألمانية الجبارة مال الحرب العالمية الثانية ، ومن راسه يفتر يشعر بدوارن هواء منعش يبدي من راسه وحتى أصابع قدميه هذا في حال هو حافي وما لابس جواريب اما في حال هو لابس قندرة مثل قندرة منتظر الزيدي فالهوا ما راح يوصل إلى أبعد من ركبته... وله الخيار والتعروزي في ذلك وشي يريد خلي يختار. وهاي الطاقة الدورانية براس كل عراقي طاقة متجددة لا تتأثر بأزمة البنزين في الموصل ولا توقف مصفى بيجي ولا تفجير أنبوب الغاز أو حتى تفجير أنبوب النفط داخل الأراضي التركية عن طريق حزب PKK او بالعربي حزب العمال الكردستاني وبمساعدة اخوية من رئيس مسعورستان حتى يظل هوا يودي نفط قجغ لإيران يعني الشغلة كلها بزنس مثل المناوشات الكلامية بين فيفي عبده ودينا حول الرقص الشرقي، وللإستفادة القصوى من هاي الطاقة نوصي كل العراقيين ان يصيروا خنافس وشعرهم طويل مثل أيام فرقة الخنافس مال جون لينون ورينكو وبنطرون چارلس (مو عبالكم جارلس برونسون) حتى من راسه يفتر يستفاد من خصلات شعره، والأصلع إله الله چماله فوگ القهر ما عنده شعر النوب ما يگدر يستفاد الإستفادة القصوى من الطاقة الدورانية من راسه يفتر وهو يسمع التصريحات الحكومية... يعني الحكو مة الحريصة على الشعب (هاي وين) بس يريد يخلي راس الشعب يفتر...تصريحات بهلوانية تخلي الراس يفتر حتى لو مجيم أو مزنجر، .... والله لو طالع واحد ويصرح بإنطلاق مهرجان تقشير البطاطا أشرف مليون قاط من أشرف عبدالغفور ومن عبدالقبور السامرائي و من هاي التصريحات البهلوانية ...على الأقل نعرف بشنو مشغولين، بس مال يطلع واحد ويگول آني سبب المشكلة بالعراق وفوگ هذا يصر إلحاحا ويلح إصراراً على البقاء على الكرسي مالته... فهذا مو يخلي الراس يفتر، هذا يخليك ما تبقي حايط بالبيت لأن راح تاخذ حياطين البيت وحياطين الجيران مقاولة وترگع راسك بيها من وقاحة هذا البوري. يابة ما محتاجين لا كهرباء ولا الطاقة النووية، عدنا طاقات متجددة عد كل عراقي وهسة دا نستثمر الطاقة الدوخانية الناتجة من التصريحات البهلوانية وإللي تخلي الراس يفتر حركة محورية وماكو مانع حتى لو حركة شاقولية، وفي إنتظار الإبحاث إللي تخلينا نستفاد من الطاقة العفطية..وإذا چانت الطاقة الدوخانية تخلي الراس يفتر مثل البروانة، فأن الطاقة العفطية لا تبقي ولا تذر...و....طيييييييييييييييييط حكومي لكل واحد في حكومتنا الرشيدة إللي ما بيها أكسباير !! ............. ملاحظة: إذا أكو أي خطأ إملائي أو طباعي فآني معذور لأن دا أكتب وراسي دا يفتر .... [ندعوك للتسجيل في المنتدى أو التعريف بنفسك لمعاينة هذا الرابط]
من هنا 
من هنا 
من هنا 
العمل/الترفيه
السبت 14 أغسطس 2010 - 21:01
