هدية الحكومة روبوتات لأعضاء البرلمان والحكومة!! : جلال جرمكا

هدية الحكومة روبوتات لأعضاء البرلمان والحكومة!!

[size=32]هدية الحكومة روبوتات لأعضاء البرلمان والحكومة!![/size]

لأننا كعراقيين نعيش حالة رخاء واستقرار وماعندنا اية مشكلة ونعيش برفاهية وماناقصنا شىء يذكر لذلك قامت الحكومة بتوزيع روبوتات أصلية ( صناعة يابانية ) لا صينية ولا تايوانية ، على اعضاء البرلمان والوزراء حتى يردون الهم الجميل لقاء الخدمات اللي قدموها للعراقيين ومثل ما تشوفون حالة الرفاهية وألأستقرار و وضع الجواز العراقي اللي گمنا أنافس بيها جوازات السويد و المانيا وسويسرا!!.

أما الدينار العراقي صار (اربعة دولارات لكل دينار) صلوا عالنبي وعين الحسود بيها عود.
لذلك ولأسباب أخرى في مقدمتها نجاحات الدبلوماسية العراقي اللي يقودها الوزير المحنك وفيلسوف زمانه الحاج ابراهيم أشيقر الجعفري ( دام ظله الوارف وأبقاه ذخرا لحزبه و جماعته أينما كانوا سواء في العراق أو في باكستان!!).
في زيارة خاصة أشترك بيها عدد من السادة المسؤلين الى العاصمة اليابانية ، وقعوا عقد مع شركة كبيرة لشراء عشرات الروبوتات بشرط أن تفهم اللغة العربية بالأخص اللغة الدارجة (العامية) حتى تكون عملية التفاهم مع الأخ الروبوت سهل ومن غير مشاكل و طلايب.
بعد الفحص و الأختبار ، اقتنع الأخوة بالسعر(بعد ما نزلوا كل واحد منهم 30% بحساب خاص في طهران و بيروت ) ، رجعوا الى بغداد على أمل وصول الأخوة الأعزاء الروبوتات بعد شهر من توقيع العقد.
الشىء الموزين بالروبوتات كل واحد منهم عنده الحزام الأسود بالكاراتيه و بسرعة يتعصبون بالأخص اذا ما گدروا يتفاهمون ويه المقابل!!.
ووصلت الوجبة الأولى ، جرى لهم أستقبال يليق بالأخوة الضيوف ،لاوالله راح يمنحوهم الجنسية العراقية و يختارون لهم أسماء عراقية صرفة وكل واحد حسب ما يرغب!!.
أكيد الروبوت روبوته وهو حر بالأسم وألمهم راح تسجل أسمائهم بدوائر النفوس سواء بالعاصمة أو بقية المحافظات!!.
تعال وأشبع ضحك على الأسماء اللي اختاروها الأخوة في الحكومة والبرلمان :
- واحدهم أنطى اسم جده الچبير .
-ألأخر اختار أسم مبارك ومحترم لدلالة على اعتزازه بخادمه الياباني.
-الأخر أسم هور أو جبل أو سهل ..
ما أطولها عليكم لخة للظالين ...
اول المستلمين كانت عضو البرلمان و معروفة جدا و سليطة اللسان.
يايابة شگد فرحت بالهدية!! ، ما مصدگة خلتها بالسيارة وگعدت بصفه و انهالت بالأسئلة والأخ الروبوت يرد عليها بكل أدب:
نعم ست ، تمام ست ، تأمرين ست ، بالخدمة ست!!.
مشت الأمور چم يوم الى أن اجه ذاك اليوم اللي ما كانت تتوقعها الأخت النائبة:
فد يوم گاعدة بالهول گبال التلفزيون و التلفون بيدها و حاطة رجل على رجل و الروبوت واگف بخدمتها وگالتله:
ـ ناوشني النعال يم الدرج!!.
الروبوت ما أفتهم اللهجة والطلب زين.
صارت عصبية وگالت بعلو صوتها:
ولك غبي ناولني النعال لأگوم أضربك على راسك بالنعال!!.
الروبوت أفتهم ولكن بالعكس ، هرول وجاب النعال ( وشلون نعال جلد أصلي جابته النائبة من الأردن) وعلى غفلة نعال على راسها بكل قوة( الأخ الروبوت يحمل الحزام الأسود وقوته أكثر من حصانين) والضربة بالعلبات والنائبة وگعت بالضربة القاضية وگبل أتصلوا بالأسعاف والى مستشفى اليرموك ولا تزال في حالة اغماء!!.
حمايات النائبة سمعوا أصوات بالداخل ، ركضوا وشافوا الأخت واگعة وشبه ميتة، سحبوا أسلحتهم وضربوا الأخ الياباني طلقات وهو يگمز منا ومنا الى أن طلع للحديقة وختل ورا الأشجار!! وبعدين گمز من الحايط وأختفى و انهزم والأجهزة المختصة انتشرت بالبحث وطوقت السفارة اليابانية مطالبين بتسليمه لأحالته الى المحاكم المختصة وإلا ماكو مانع يقتحمون البناية وشيصير خلي يصير!!.
وللأن البحث جاري وكل واحد يحچي شكل:

- ناس ادگول شايفي بين الرمادي والفلوجة گاعد و عگاله صفح و غترة بيضة ويعزف عالربابة ويغني أغنية جبارعگار(يا ذيب ليش تعوي) والناس متعجبين من حلاوة صوته!!
- ناس أدگول الروبوت عنده أجنحة ورجع الى مسقط راسه!!.
- ناس أدگول من عبر دجلة غرگ بالماي وانتهى!!.
- ناس ادگول التحق بالجماعات المتطرفة وشافوا شوفة عين شايل رشاشة بي كي سي و يريد الأنتقام من جماعة المنطقة الخضراء!!.
- ناس أدگول انهزم وشافوا بچايخانة العاطلين يم قلعة اربيل لابس ملابس كوردية وشاد چراويتين و بيده سبحة مية وواحد و يدخن نرگيلة!!.
- ناس ادگول حماية الأخت فككوا براغيه و باعوا خردة الى الأخوة في الجمهورية الأسلامية حتى يصنعون منه ربوت اسلامي!!.
- ناس ادگول تنكر ، شافوا بالناصرية لابس غترة وعگال يبيع سميط و شعر بنات بمدنية الألعاب!!
- ناس ادگول موجود بتركيا ويهرب بشر من أسطنبول الى اليونان!!.
- جيراننا ابو خضير حلف مية يمين يگول شفتة اباب الشرجي يبيع لنگات ويحچي لهجة بغدادي مثل البلبل!!.
- جارتنا ام عبود أدگول كلها چذب البارحة شفته يسوق باص كيا ويشتغل بين باب الشرجي و مدينة الصدر!!.
- كرومي ابن حميدة الخبازة يگول البارحة چان بملعب الشعب ويشجع نادي الزوراء وصياحة للضالين والشرطة تخاف تتقرب منه!!.
- ابو شكرية سايق التاكسي يگول البارحة نص ليل شفته بشارع الشيخ عمر قريب من باچة الحاتي سكران و يطوطح بيده بطل عرگ الله لايجذبني ماباقي بالبطل غير مصة لو مصتين!!.
- البارحة كنت بالگهوة وسمعت احد الأخوة (لابس عسكري وشايل حگة نجمات) يگول موجود بالسجن وتهمته اربعة ارهاب ومنظم لجهة تعمل ضد حكومة المنطقة الخضراء و لو يجي امبراطور اليابان بنفسه مايگدر يشفع له والمعضلة يگولك شلون راح يعدموا وهو كل جسمه فولاذ؟؟.
- اهالي منطقة ابو سيفين وأبو دودو (بشارع الكفاح) شايفي يشتغل بسوق الدولار وحاط چمبر يبيع جگاير وعلج ومايحچي ولا كلمة!!.
- قبل أسبوع شافوا شوفة عين بالكرخ يفتر وشايل علاگة ويصيح: خياط فرفوري ، خياط فروري!!.
- وزارة الداخلية اصدرت تعليماتها لأهالي بغداد: الحيطة والحذر ، أقفلوا الأبواب زين و لا تفتحوا الباب لأي واحد بعد الساعة أثنعش، بأختصار عبالك أيام ابو طبر بالسبعينيات من القرن اللي فات!!.
المهم نجمع ونطرح الأخ الياباني فص ملح وذاب والناس شدگول خلي ادگول كلها حچي من غير اثباتات!!.
اجتمع البرلمان بكافة اعضائه من دون ان يغيب ولا نفر و المناقشة حادة وكلها على صفقة الروبوت والنتائج و الحلول و الية التوزيع.
طبعا الجميع رفضوا استلام الروبوت ..
عمي حقهم اذا الأخ بطل كاراتيه و فهم للهجتنا مو هالگد ، ياترى منو يتحمل النتائج؟؟.
القرار الأخير :ارجاع الروبوتات و مطالبة الحكومة اليابانية اعادة الملايين من الدولارات ،!.
وهذه كارثة كودن اللجنة اللي راحت واشترت الروبوتات اختلسوا الملايين من الدولارات وبما أن اللجنة من الأحزاب الحاكمة لذلك غلقوا الموضوع وكان الله يحب المحسنين وهذه تنضاف الى اخفاقات الحكومة اللي ماخطت خطوة بيها خيرو من صالح الشعب!!.
عمي الأخ رئيس الوزراء والبرلمان عندهم كل الحق هذولة (اعضاء اللجنة) واحدهم علاقته دهن ودبس مع حكومة طهران وواحدهم (رئيس الحكومة والبرلمان) خايف على خبزته والسكوت احسن الحلول!!.
عاشت الحكومة والبرلمان واعضاء البرلمان ولجنة المشتريات و الف سلامة للأخت النائبة اللي موجودة آلآن بأحدى مستشفيات طهران و يگلولك حالفة الف مرة ان ماترجع الى بغداد وسفارة اليابان هناك!!.
وهذه اكيد راح تصير مشكلة بين العراق واليابان ، وحتى الحكومة اليابانية اشتكت بالأمم المتحدة وتريد تعرف مصير الروبوت بكل الأحوال!!.

المشكلة چبيرة ويگولون حكومة الصين متعاطفة جدا ويه الأخوة اليابانيين والهم عتاب شديد على تصرفات الحكومة العراقية مع ذلك يتمنون الشفاء العاجل الى البرلمانية اللي مانعتقد ترجع مثل گبل ، كودن شبه خرسه حاليا تحچي بالأشارة والكتابة !!.
[size=32]الى اللقاء في ( روبورت أخر) عذرا حلقة اخرى وفي أما الله.[/size]
أخوكم
رئيس التحرير