[ندعوك للتسجيل في المنتدى أو التعريف بنفسك لمعاينة هذا الرابط]من وصايا الرفيق طايح الحظ : التشريب...التشريب..ثم التشريب لحمة التشريب يقلل من جوع تالي الليل القسم الحزبي المقدس: والله ابد ما ننطيها وحگ عيناج يا يمة ( منعاً للإحراج لأن الأب مجهول الأسم والهوية).. ..... صدگ كل شي ممكن نلگي له دوا غير طيحان الحظ، ما إله لا صاحب ولا صديق..ولا تگدر تلگي دوا مال طيحان الحظ حتى بالصيدليات الخافرة إللي تتحدى كل الظروف الأمنية وتنتشر على الأرصفة الزاهية بحاضرها المترب بسبب العصر الذهبي لنهضة الأمة وعلاوي الجميلة والسنك والجعيفر والطرطران حتى لا يزعل علينا عبدالستار ناصر أشقى واحد بالحيدرخانة ومحلة الطرطران...يعني بهاي الصيدليات كل شي نلگي... نلگي نفاخة تستخدم بدال الكوندوم (فلاش ليذر – الواقي الذكري)... بس دير بالك لا تطلع مزروفة وتصيرون مثل ذاك الواحد إللي چان يشتغل مندوب مبيعات في شركة مال تصنيع كوندومات (فلاش ليذر) ...و صديقه شافه وياه خمس جهال مع العلم هو ما متزوج...فمن سأله صديقه هذولة شنو ومن وين وأنت ما متزوج ...گال " لا...هذولة شكاوى المشترين لأن نوبات قسم من البضاعة تطلع مضروبة ومزروفة "... وممن بهاي الصيدليات تلگي حتى رئيس وزراء بس إكسباير وأنت وحظك عاد يرهم لك تمشي أمورك وي إكسباير لو راح تصير بيك حكة وحساسية خاصة ً بالمناطق المتنازع عليها بين إيدك وإيد أم الجهال... واضح موووووووووو؟؟؟... وماكو داعي نفتح الدفاتر والفيس بوك أما القراء الذين لم يبلغوا الحلم أو اللواتي يئسن من المحيض !! وإحنا وي طيحان الحظ عشرة عمر وما قبل العمر وبعد العمر...قبل العمر أبونا ينطينا البصمة الوراثية مال طيحان الحظ مالته...وأمنا العزيزة ما تقصر في قبول هاي البصمة الخالدة في أحشائها وتزيد عليها من بركاتها وفنياتها اللطمية بحيث نجي للدنيا وإحنا طايحين الحظ ومستوين وما نحتاج أي بروسيس Process أو فنيشينغ Finishing ...يعني نجي شغل مضبوط عبالك إنزال النورماندي مو إنزال من بابا إلى ماما... تئبرني يا ألبي على البابا والماما... البابا السيد فليطح والماما بسعاد العلوية... صدگ بسعاد مو طوختوها قاطين وأربع قمصان وثلاث قنادر...أي وداعتكم مو أربع قنادر...وشكلنا لجنة تحقيقية برئاسة علي أبو الدبغة حتى نعرف المصير المجهول للقندرة الرابعة المجهولة ...أو نقبل نبدلها بنعال أبو الأصبع صنع خصيصاً لمناوشات قريبة المدى بعد إعلان نتائج ترشيح أبو إسراء لرئاسة الوزراء !! أما طيحان الحظ بالعمر وما بعد العمر...فماكو نفتح المواجع ...وكلها تصيح آويلااااااااخ !! وهسة جاي أحس بنشوة طيحان الحظ غير مسبوقة في تاريخ البشرية... يعني قبل هم چنا طايحين الحظ بس ما چنا نحس، وهسة من منجزات ثورتنا العملاقة (بكيفكم يا ثورة ) ومنجزات حكومتنا المؤخرة صرنا نحس بمؤشر طيحان الحظ مالتنا...رحمة من الرفيق العزيز الجليل. الدول تتنافس بيناتها بصعود مؤشر البورصات وإحنا نتعارك بيناتنا نشوف ياهو بينا مؤشر طيحان الحظ مالته يخبل... أقترح على حكومة الرفيق مولانا يسوون سوق بغداد لمؤشر طيحان الحظ...والله أنتو ما إلكم عليّ لا يمين ولا يسار ولا أقصى اليمين المتطرف... إذا نسوي هذا السوق المقترح ( وفي رواية أخرى كلمة السوق مؤنثة لأن بحسب أبو بحر عثمان الجاحظ أن كل شي يقبل الدخول يعامل معاملة الأنثى كالسوق والباب والطريق) راح نهيمن على عرش طيحان الحظ بين سائر الدول المتحسرة على شوفة الحضارة إللي إحنا ننتمي بكل فخر وإعتزاز لهاي المجموعة البدائية بين المنظومة الدولية..يعني خلونا أشوية نطلع فوگ الدنيا وخلي العالم يشوفون إمكانياتنا في علم تمكين المستحيل في تدوير المستطيل والإصرار على الإكسباير في تمشية أمور البلاد بفتاوى من الزومبي والفامباير...الموجودين في السراديب والمقاهي. أما سبب هاي النشوة غير المسبوقة فهواية أسباب..وأسباب طيحان الحظ بالعراق من ورا إنجازات الحكومة صارت مثل نعمة رب العالمين على عباده المترفين...ما إلها لا عد ولا حساب، وطبعاً إحنا بالعراق العقيم خارج هذا النص القرآني إللي يگول ( وإن تعدوا نعمة الله لا تحصوها) ، لأن إشگد ما أكو نعم ونعمات بالعراق كلها تروح عبالك كل شي ماكو من نشوف نفسنا سد بسد ولازگين لزگ وي إيران ، والله چنا قابلين فقط على حسين نعمة يعني مو بالضرورة النعمة تكمل وي إيران...هاي بس بالضرورات الشعرية والسياسية لإختيار رئيس حقراء دولة العراق الحر الفيدرالي الديمقراطي من زاخو حتى الفاو (هاي همين من شعارات الأزلام إللي شبعتنا هوا) ! وهاي النشوة إذا نستثمرها ونبيعها في شيش خاصة نكتب عليها (طيحان حظ...صنع في العراق ببركة الرفيق بايدن) راح تتنافس في الأسواق العالمية مع بضاعة السودان وبضاعة الصومال وبضاعة أفغانستان وبضاعة باكستان وبضاعة اليمن...لأن هاي الدول هي دول تنافسنا في طيحان الحظ بس إش حدهم... والله ما ننطيها بحسب مقولة القائد المقدام أبو إسراء الفلة هم طائرة هم سلة... ما يهم المهم يلعب ويفوز... وتيتي تيتي...مثل ما رحتي جيتي....وبالعافية للرفيقة حمدية إل....حـــَسيني فلوس الدخل مال هيئة الإنتِـــخيبات... والرفيقة أمل والرفيق العبودي والرفيق فروج الحيدري...خوش فروج طازج...وكل إنتخابات وأنتو قشامر !! أنتهى الإجتماع الحزبي....وعلى المتضرر اللجوء إلى الرفيقة هيلاري...عضوة شعبة واشنطن للحزب. [ندعوك للتسجيل في المنتدى أو التعريف بنفسك لمعاينة هذا الرابط]
من هنا 
من هنا 
من هنا 
العمل/الترفيه
الإثنين 27 سبتمبر 2010 - 2:20
