> > دولـــــة > ــــــــــــــــ > قبل ٢٠٠٣ .. مرة وحدة بس شفت ضابط برتبة لواء ، ومن شفتــه ظليت فاتح حلگي عالتاج والسيوف اللي بس بالتلفزيون شايفهن .. > بعــد ٢٠٠٣ .. ضابط برتبة لواء ومديــــــر لمديرية عريقة بوزارة الدفاع ،

دولـــــة
ــــــــــــــــ
قبل ٢٠٠٣ .. مرة وحدة بس شفت ضابط برتبة لواء ، ومن شفتــه ظليت فاتح حلگي عالتاج والسيوف اللي بس بالتلفزيون شايفهن ..
بعــد ٢٠٠٣ .. ضابط برتبة لواء ومديــــــر لمديرية عريقة بوزارة الدفاع ، واصلته أخبار عن نائب ضابط بمديريتــه مايمشي أي معاملة الا يخلوله ( حمرة ) بنصها .. ومن واصلتله هاي المعلومــــــة ماراد يكســـــر رگبته ويوديه للإستخبارت العسكرية لا ، گايل خطيــــــة ومكتفي بمخاطبــــة مراجعه العليا حتى ينقلــوه لغير وحدة ، وذاكر إنه سبب النقل هو لعدم الإستفادة من خدماته ..
هنا لازم نذكـــــر انه السيد اللواء معظمـــــاوي ، والأخ النائب ضابط من مدينة الصدر .. ولحد هنا الامور كلش طبيعية وعال العال ..
المو طبيعي انه من طلع كتاب النقل ، النائب ضابط راح للواء وسأله عن أسباب نقله من المديرية ، واللواء گله لانك مرتشي وماتمشّي أي معاملة الا يخلولك بيهه فلوس ..
وره كم يوم .. إتصل شخص بـالسيـــد اللواء وبلغه إنه العشيرة الفلانية يريدوك تحول يمهم ولازم تاخذ عطوة !
اللواء ، گايلة شنـــــــو أحول ، شنـــــو عطوة ؟
المتصل گايله إنت ناقل نائب ضابط بمديريتك ومدعي إنه ياخذ رشـوة على كل معاملــــة وعشيرته يريدوك تثبت هـذا الشي وإذا ماتثبته تگعد وتدفع فصل !
اللواء هذا ضابط أصلي مو من ذولي الرتبتين بألف ، ومن سامــــع كلام المتصل ساد التلفون بوجهه ..
الشخص المتصل ، بلّغ عشيــــــــرة النائب ضابـــط برفض اللواء للعطوة وأعلى مابخيلهم يركبوه ..
يومين فقــــــط .. إجت سيارتين نــــــوع سايبة بوقت متاخر من الليل وأمطروا دار السيد اللواء بالاعظمية بوابل من الرصاص تطبيقا" لما بات يعرف بالدگــــة العشائرية ..
السيد اللواء .. وحسب الإصول راح إشتكى بمركز الشرطة وكل باله إنه العشيرة من صغيرهم لچبيرهم اليوم يباتون بالسجن ..
من وصـل لمركز الشرطة .. مفوض جره على صفحة وگله سيـــدي تريد نصيحة إبن أخوك ؟ روح بلغ عمامك وإخذوا عطـــــــوة واگعدوا وياهم وحل الموضوع عشائريا" لان إذا تبقى عالمحاكم تره حتـــى بيتك تبيعه وآخر المطاف ترجع وتگعد وياهم وإنت الممنون ..
اللواء أخــــــــذ بنصيحة السيد المفوض وبلغ عمامـــــــــه وأخذ عطــوة من عشيرة النائب ضابط و ( حوّل ) يمهم ..
بعد المفاوضات الطويلة ، وخمس ملايين واگعـــــة لشيخ نعال وخمسة واگعة لسيد چركــــز ، اللواء فصلــوه بسبع ملايين وبنفســه يروح يلغي كتاب النقل ويرجع النائب ضابط لمديريته .. وشدوا راية العباس !
لاتخرج من هذا المنشور قبل أن تاخذ نفس عميق وترگـــــع هاي الدولة بعفطة ينسمع صداها على بعد ثلاثون فرسخا" ..

إرجعلي زميلي المخرج ..
#احمد_مكيه