قصيدة البابا بمناسبة زيارته للعراق والناصريه.. للزيارة وحج قبر النبي ابراهيم ع ش

بِسْمِ اللّهِ الرَّحْمَنِ الرَّحِيمِ

قصيدة البابا

بمناسبة زيارته للعراق والناصريه.. للزيارة وحج قبر النبي ابراهيم ع

شبكة البصرة
الشاعر علي الخيكاني

مدري شراح يلگه من يجي البابه

دخانه چبيره وعالگه طلابه

*****

يلگه الناصريه ناس تكتل ناس

بوگ وحرمنه وخياس لاهو خياس

يلگه شگد فواتح والطم عالراس

والقانون عدنه محد يهابه

مدري شراح يلگه من يجي البابه

*****

مدري بيا وجه لو رحنه نتلگاه

يلگه الناصريه آه يلحگ آه

يگعد وين لو طب والوفد وياه

يظل بأور.. خافن تاكله ذيابه

مدري شراح يلگه من يجي البابه

*****

يلگاها خرابه وغاطها الدخان

والدم بشوارع وصل للحيطان

خاف يشوف لمه معصبه النسوان

وأم مكتول ابنها تصيح يايابه

مدري شراح يلگه من يجي البابه

*****

حواسم راح يلگه بيوت مدفونه

وطفل جوعان حسره عليه صمونه

بيا شارع عدل باجر تفرونه

يلگه صياح عالم عايشه بغابه

مدري شراح يلگه من يجي البابه

*****

يعبر ياجسر يلگاه مامحروگ

كلها محفّرة والگاع بس طابوگ

وام طلعت تجدّي مامحصله ريوگ

شوارعنه زبل ومسدده صبابه

مدري شراح يلگه من يجي البابه

*****

خاف تصير دگه وتفاگ تثور

والبابه يخاف وينكث ومذعور

بلوه من يجي يتكشف المستور

وغادي يگول عنه ناس نصّابه

مدري شراح يلگه من يجي البابه

*****

يلگاها عرايه اطفالنه حفاي

خيسه الگاع كلها وغاطه بالماي

تطفه الكهربا ونوب شنهو الراي

وخافن گاطعين الدرب سلّابه

مدري شراح يلگه من يجي البابه

*****

مطار الناصريه راح بيه يدوخ

مبني بلوك لكن لبخ ماملبوخ

خاف يوفد وحده تجينه صلوخ

حكمها يصير عدنه چوي بعطابه

مدري شراح يلگه من يجي البابه

*****

شبكة البصرة

الجمعة 21 رجب 1442 / 5 آذار 2021

يرجى الاشارة الى شبكة البصرة عند اعادة النشر او الاقتباس