قصيده أداعب بها صديق وما كتبته عنه هومخالف لصفاته ،الإسم مستعار.
بالسلامه رجع من لندن حسيب متغيره أحواله وأمره عجيب ---------- كام من يحجي يهزلي بإيده كشاخ ولابسلي مناظر جديده حسه ناصي وبنبره جديده سبحان ربي مبدل الأحوال ----------------- صار لخوانه وجوارينه ما يقدر ومذكرات يوميه كاملي يحرر وبالكلام كعد يمطمط ويجرجر وبالإنكليزي يعبر ويذكر الأقوال ------------ بنزين السياره يحسبه بالكلن وغير المازوله ما ياكل دهن وفلوسه ماتنحسب إله بالشلن وصار يكره القيل والقال
----------- ريوكه صار بالبيض والهام واللنج خفيف ينتهي بالجام شرب الويسكي ما صار حرام بس من علمهم ما حصل ولا نال ----------- ترك الدينار ويستعمل الباون وبزامنه جان يدك الكهوه بالهاون منشوفه اليوم لمحتاج داين والله هلشي ما جان أبد علبال --------- يكول ما أحب أسكن العامريه لأني تعودت عله الأحياء أللندنيه ومن بنات التايمس يريد بنيه وصار لي فرنجي وعال العال ------------ ياأخي عاد من غيك أطلع وحكم ولد العرب أتبع وأسمع وهاذه الجلد الجديد أنزع وراح تبقه عراقي عله كل حال ------------ عراقي إبن يعرب أصيل عن تقاليده ما يحد ولا يميل صير لأمجادك أحسن سليل وابقه عربي وبراحه بال ----------- ألتفرنج قيمه أبد ما يزيدك وغير الوطن أبد ما راح يفيدك وشويه أفتح للناس إيدك ماكو داعي للبخل وجمع المال ------------ ألفلوس وصخ هاذي ا لدنيه وبعبادتهه تصير النفس دنيه وما تعيش بلطمع عيشه هنيه أهلك تره ينسوك ويكرهوك العيال ----------------- صير خوارده ويه أقرانك وابقه كريم وحسن دوم أخلاقك وخلي صحابك يتهنون بجالك ويشبعوك حب وموده ودلال ______________ كتب في بغداد 15-1-1994 تفسير الكلمات ألهام : لحم الخنزير. ألجام : ألمربه. ألتايمس : نهر في لندن. أللنج : وجبه غداء خفيفه. يدك القهوه في الهاون: يسحق حبوب القهوه في الهاون(قدح معدني). يهز بايده : يحرك يداه كثيرا عند الكلام كعاده بعض الأجانب. ألقيل والقال: نقل الأخبار والثرثره
من هنا 
من هنا 
من هنا 
العمل/الترفيه
الإثنين 14 نوفمبر 2022 - 15:28
