حبيب العربنجي : عليكم بآية الكرسي فهي حرز لكم !!

حبيب العربنجي : عليكم بآية الكرسي فهي حرز لكم !!

07/11/2010

صدگ ماكو داعي، ولا تسوون زحمة عليكم، لا نريدكم ولا نريد نشوف چهراتكم الزفرة..يعني ثمانية أشهر بدون برلمان...والدوائر ماشية والمعاملات ماشية والأهم الرشاوى ماشية حسب الأصول والشرع، لعد شنو لزمة البرلمان !! أشو ما حسينا بغياب أي شي...ولا فرد يوم تحسرنا لأن ما عدنا برلمان يسمع شكاوانا...هي وينها الشكاوى، أشو الناس عايشة مرتاحة خيرها بشرها – الله لا يجيب الشر قابل إحنا جيراننا إيران لو سويسرا - ، يعني بشرفكم فرد يوم سمعتوا واحد يتحسر ويضرب راسه بالحايط ويگول لو چان عدنا برلمان ما چان حالنا هيچ !! ليش هو أشبيه حالنا؟؟ لو شنو دور البرلمان حتى نتحسر على غيابه أو عدم وجوده !!
الدوائر ماشية، ومواكب اللطم هي هي وأصلاً المحافظات گامت تطلع جداول بإنطلاق مواكب اللطامين لإنسيابية الحركة اللطمية المقدسة وخاصة مواكب القندرچية ، والعطلات الحوزوية نفسها، بعد شتريدون يا جاحدي نعمة الديمقراطية ؟ يعني إلا تصدگون الإعلام المغرض والمقالات الكاذبة والأزلاميين والتكفيريين وأعداء الديمقراطية إللي عدهم كوليسترول وما يگدرون يضوگون الديمقراطية بالدهن الحر الدسم، ولكم صدگ ما تستحون يا قشامر الرجعية والتكفيرية وأعداء قم وطهران !!
يابة والله ما نريد برلمان ، أشو كل شي ماشي بحسب دستور حجي همام، بعد شنو لزمة البرلمان أو مجلس الدواب إلا اللهم إذا أكو 325 مطي وحمار وحمارة نريد نربطهم في مكان واحد وحظيرة وحدة في قاعة مجلس الدواب حتى لا يأثرون على الصورة الحضارية للبلد، والوجه المشرق للحضارة العمائمية والطربوشية ...تصوروا قناة رسمية عراقية دا تطلع تقرير كامل لتشجيع الشباب يلبسون دشداشة حتى بدون غطرة وعگال ولا سترة او عباية، يعني دشداشة بدال القاط والرباط...يعني طگ بطگ يگولون طلعوا للشارع بملابس النوم...مو هي وكت النوم والنوام والنائمات الشريفات المستورات بالعباية الحوزوية للضرورة الحزبية... والوطن نايم عليه الطابوگة والله يرحم الدكتور علي الوردي إللي إجى بوكت مو وكته وزمن مو بزمنه وإللي شخص سبب كل مشاكل العراقي في تحكم العقلية البدوية في خلق الشخصية الإزدواجية عد العراقي...لا ويطلع لك واحد شاب ويعدد فوائد الدشداشة عبالك واحد دا يحاضر في علم الكوزمولوجيا (علم الكون) وأهم فائدة أن الدشداشة تگدر تاخذ راحتك بيها...بدون شرح شنو يقصد بكلمة (راحتك) الدستورية الغامضة...ويمكن راح نفاتح المحكمة الإتحادية لشرح هاي الكلمة الغامضة حتى نستفاد من الدشداشة إلى أقصى درجة دون أن نتجاوز الدستور او نسوي فاول دستوري وضربة حرة غير مباشرة عن طريق المفاوضات والولائم السياسية ولازم حكم مسعوري لأن بس قانون كاكا مسعور يمشي بالملعب...
وداعتكم ما نريد برلمان...لأن القوانين إللي عدنا قوانين كللللللش حديثة وماشية وي الحضارة الحيوانية...ليش تعترضون مو يگولون الإنسان حيوان ناطق...أصلاً إحنا حتى ما نحچي ، يعني إحنا بس حيوان ...أشو قوانينا كلها قوانين دا تطلع من سرداب الجهل أو فتاوى الدجل طربوشا أو عمامة ، يعني أكو داعي للبرلمان التشريعي لو شنو شغل البرلمان؟ ما نريد لا تشريع جديد ولا شي...الشرع ما خلا شي ما گاله ، وكل شي موجود بالسرداب المقدس وبس محتاجين إنديانا جونز حتى يلگي أسرار السرداب في الجزء السادس من مغامرات إنديانا جونز... ما نحتاج شي...أصلاً بدستور حجي همام كل شي موجود حتى طريقة عمل الهريسة والقيمة وشنو حجم الحمص بالقيمة !!.
شنسوي بمجلس الدواب ؟؟ إذا 15% من الحمير مالته ما موجودين بسبب موسم الحج، ولا يؤثر ذاك عالشعب...يعني إذا عدد الحمير 325 او 275 أشو كل شي ما تغير بالبلد، وإذا عدد الحمير فول أتوماتيك أو غير مكتمل النصــّــاب القانوني شنو الفرق...أشو أكو محكمة إتحادية دا تفرخ قرارات عالمقاس وبالتفصيل الممل، أصلاً يجي قياس مضبوط عبالك واحد لابسه بالكــــرَتة...وبعدين آني ما شفت ولا بوستر إنتخابي لأي مرشح يگول أن الحج ضمن برنامجه الإنتخابي لتطوير البنية التحتية الخربانة، ولا شفت بوستر لأي نائمة شريفة تگول فيه أن الحج يساعد في تعليم المرأة العراقية ومكافحة العنوسة ، ولا أكو اي آية في القرآن تگول " ولله على النواب حج البيت من أستطاع على الغشمة سبيلاً" ..بس يجوز نوامنا ونائماتنا يريدون إعادة مشهد ماطور حجي خيرالله من گام يفتر حول الكعبة بالماطور حتى يحلل البوگة مالته، واقترح على مجلس الوزراء توفير ماطور هارلي دافيدسون لكل نائم من يروحون للحج حتى يلحگ يكمل الفرة والدوران حول الكعبة وي موسم الحج، لأن مال يظل يفتر هيچ بدون ماطور ترى راح يخلص الحج وهو بعده ما مكمل 1% ما بوگاته أو مخصصاته الوطنية في مجلس الدواب. أما الشريفات المستورات في مجلس الدواب فحالتهن مثل حالة الشريفة المستورة الراقصة دينا إللي بعد ما سوت فلم يخبل وي أبو الفتوح وباعت الفلم لكل المواقع.. راحت وإفترت بالحج ...وهسة إحنا عدنا هالسنة نائمات شريفات هواية يروحن للحج لأن يريدن تبرئة ذمة مناف الناجي رضوان الأئمة عليه ودعاء الجوشن يحفظه بجاه الستياني ...
جيبوا لي أي فقرة بدستور حجي همام تگول يتعطل البرلمان في موسم الحج ! والله إذا أكو هيچ فقرة فماكو أي چارة بالعراق بعد حتى لو بالطگاگية، وإذا ماكو هيچ فقرة فهاي مخالفة للدستور... لو الدستور تتذكرونه بس من تصير الحديدة حارة يم الكرسي وتخافون يحترگ الكرسي...لا ما عليكم خلوا الحريق بالبلد وسلام قولا من رب رحيم عليكم...لأن الرب رحيم وي اهل الكراسي...اما أهل الجودلية فعيونهم إنعمت من إنتظار الأمل والخير...وچفوفهم تيبست من كثر الدعاء...يجوز لأن الدعاء مو دستوري بحسب قياسات حجي همام (بالمناسبة حجي همام كم مرة رايح للحج...هذا سؤال مسابقات العيد على قناة الفرات) أو دعاء ما يتطابق وي ظروف الرطوبة والخيسة الموجودة بالسرداب ! لو يجوز ما لابسين دشداشة شرعية بحسب قياسات هيئة سخفاء المسلمين او يجوز لابسين لبسان جوكي مو بوكسر بحسب الشرع وقانون دولة الفافون واللزگة !
عيوني ماكو داعي إلكم...لا نريدكم ولا راح نفتقدكم...أنتو صفر في خدمة الشعب...وأصفار في جيوبكم العامرة بالدولار...ولقلوبكم العامرة بالإيمان....وأوصيكم عباد الله بقراءة آية الكرسي في الحج...لأنها آية عظيمة تنجي قائلها من عذاب فقد الكرسي ونتائج الإنتخابات وكلاوات الديمقراطية !
أمانة عليك عزيزي القارىء...مرر هاي المقالة إلى عشرين غشيماً وأنشرها، وراح تعرف كل كلاوات الدستور وتعرف تأويل الاحاديث والتصريحات السياسية، وإن لم تفعل....فحالك حال الوطن...شلل رباعي ...يشوف وما يگدر يسوي شي...والعاقبة للكلاوچية!
habibarabenchi@yahoo.com