بــغــــــــــــــــــــداد

المحامي

الدكتور عبد الرحيم الماجد



ويــنــَه اللي يصيح احـّـاه بـَـغـداد
ويـنــَه اللي يـروح ايشوف ربـْعـَـه
وينه اللي (فـُراتـَه) اتـرابه يـنخـاه
يـروح (الدجلِـته) اويشرب ابـْنبعـَه
وينه اللي يـروح (الهـُور) يـلگـاه
نِشـَف (دمّه) اويكِت ياناس دَمعـَه
وينه اللي صعـَـد (نخلات) الاحباب
يحـُوش (ابتمرته) وايضوگ (نفعه)
وينه اللي (يصلـّي) ابگاع (بغـداد)
ماينسـَه (الـْفـَرض) وايزيد (ركعه)
ويـنه اللي يـروح اويــِحـْسِب ايـّـام
يـِعِـد أيـّام (سَنتـَه) اونسه (الجمعه)
ويــنــَه اللي يصيح احـّـاه بـَـغـداد
ويـنــَه اللي يـروح ايشوف ربـْعـَـه
***
وينه اللي عشگ وايغني كل صيف
وايـْلـَـفلِـف (شِـتاه) افراش طـَبعـَه
وينـَه اللي يـِـزيـد (اسبوع بغـداد)
يوم امن العـُمـُر وايموت (سَبعـَه)
وينـَه اللي يعدهه (انجـُـوم بغـداد)
يغـلـَط بالـْعـَدد وايـعـيـد (جـَمـْعـَه)
وينه اللي يـِـحضنـَـك (گمـَر بغداد)
يـشمّـه امن (الجبين) ايزيد (لمعه)
وينه اللي (مـُضيفه) اوبيته بغـداد
(دلاّتـَـه) ابـْمضيفـَه اتـزيد رِفـْعـَـه
ويــنــَه اللي يصيح احـّـاه بـَـغـداد
ويـنــَه اللي يـروح ايشوف ربـْعـَـه
***
وينه اللي (سـُمعته) احروف بغداد
منهـِـن سـُمعِـته او مازاد سـُمعـَه
وينه اللـّي حِـضن (تـمّوز) ياناس
واحزيران عاشَه اوضاگ (لفعـَه)
وين اللي تِـعـَـلگ (بـيرغ) اوصاح
(بَـغـداد الـْعـَلـَم) عَ الـْرّوح رُفـْعـَـه
وينه اللـّي (شـَمْعِـته) ابعينه بغـْـداد
يشوف (الدنيه) بيهه النّـور شمعـَه
وينـَه اللي دَمعـْـته (انـْهار بَـغـداد)
هِـنـْيال الـْشرب من عِـدهه (مِجعـَه)
ويــنــَه اللي يصيح احـّـاه بـَـغـداد
ويـنــَه اللي يـروح ايشوف ربـْعـَـه
***
اهـواي الليّ غـِلط ، شِـفعـتله بغـداد
)شرايـنـَـك) ابدمهه اتصير ( شفعـَه)
بـ (اعيون المها) بين الجسر (صاح)
1 (إرصافة ْ هوى) والعِـشِگ (نـَشعـَه)
(بـَغـداد الرشيـد) او إبنـَه (مأمون)
2 (مَـنصور) البنـَه مـَعـروف (فـرعـَه)
3 و (الكاظِـم الغــَيظ) اللي سِـكن بـيـچ
ذاع ابـكِل (كِتـِـر) لـلناس (شَـرعَـه)
4 و (النعمان) صاحِـبْ مَذهـَب الناس
مـَذهب كل فِـقِه للعـَقِــل ( درعـَه)
وبـو النوّاس يـِـشعـَر دومَه وايصيح
تِـغـزّل بـ ( الـْغـَـزال) اوهاذ (طبعـَه)
غـَمـّه اللي نِـسـَه (شـَهگات بغـداد)
(تِـِطــَـلـگـَه بالـْـثلاث ابغـيـر رجـْعـَه)
ويــنــَه اللي يصـيح احـّـاه بـَـغـداد
ويـنــَه اللي يـروح ايشوف ربـْعـَـه

منقول

قتلتني الغربة وذبحني الفراق

اتذكر بيتنا واتذكر ذاك الزقاق

اللي كنت الهو واللعب فيه... ويه الرفاق

مليت تره البعاد صعب وللقلب حراق


مليت البعد عنك ياعراق


مشتاق للعراقيين ولسوالفهم الجميلة

ولطبعهم العنودي وشهامتهم الجليلة

مشتاق لحضن هلي وناسي ومشاعرهم الرقيقة

ودفيء حضنج يا بغداد واخلاقج النبيلة


مليت البعد عنك يا عراق


حنيت لنهر دجلة وميه الصافي

وانوار شارع ابو نؤاس وهواه الدافي

حنيت لنهر الفرات وسمكه الوافي

وتمنيت اشرب ميه وامشي على ضفافه حافي


مليت البعد عنك يا عراق


ولهان على البصرة وأم القرى

والفاو اللي قاومت ودوخت العِدى

ولهان على الانبار وأم الربيعين نينوى

اللي تمنيت اسير فيها وانشد احلى الغنى


مليت البعد عنك يا عراق


تعبان وربي يشهد على حالي

لا تخافوا يوم لو شفتوني والدمع على سهادي

ولاتستغربوا لو فنيت له عمري ومالي

هذا العراق حبيبي وارخص له كل غالي


مليت البعد عنك يا عراق