وَردَه

المحامي

عماد عبد الرحيم الماجدي

وردَه امْعـَطـّره ابريحان واگرنـْفـُـل
واعـْيـُونه يغـار الليـل من عِــدهـَه
شگـرَه امكحِـلـّه وارموش تِـتـْـباهَه
واتـْعارك كِحلهَه ايغار من حـَدهَـه
اخدودَه بالوجه شـِمـّـام إي والله ـ تعال اشتـَم ولك شمّام من خـَدهَه
واسنونـَه تِـنعـثـَـر (دِر) يغيض الناس
خِـتـل حَدر الحلِگ وايْـبوس شِفــّتهـْـَه
فوگ الشفـّه خالْ او هاليعِـط نِعـْناع
اًقصِد شامَـه للخـَديـن ضـَوّتــْـهـَه
بسيوفـَـه العـَـلـَت عـيـنيـن يـتغـاوَه
حُواجب لو رمَت ياعاشگ احـذرهَه
ياعِـطر البنفسج والعِـطِـر فـَـوّاح
هَيعـونـَه الـْـيفِـز بالليل وايـِْـشمهـَه
ياعـود السفـَرجـَـل من تميل اتميل ـ تـِتغـاوه غـَـنج والگاع مالمهَه
وحق الحق والحق اليحِق الحق ـ كل احقوق هذا الكون من حـَـقهَه
***
نظراتـَه سهـَم وايـْرامي بيه الـْـناس ـ أتمنه سَهـَم بالرّوح وايـْشِچهـَه
چـلماتـه غـَـزل واتـْـحارب العِـشاگ
طلاسِـم ماأظِـن كِـل واحِـد ايـْـفِـلهـَه
واعيونه غـُموض اتگـول حـَـزّورات
حـَـزورة ْعـِـشگ ماتگـدَر اتـْـحِِـلهـَه
وازلوفه اگـعِـدَت ياصبّه عَ الـْمتنين ـ جدايلهه اوگعت بالزلف شدّتهَه
غصن البان مِتسّيد على الأغصان ـ شجرة هيل حَسرَه اعليك شَمـّتهَه
أحـْسبهـِن رموش العـين واويلاه ـ كل شعـره رُمُح واتـْرامي نـَـبلتهَه
ياريـجـَـه عسل ماسوّته النحلات ـ كل هذا العـَـسل ياصـَبـّه من عِـدهَه
بلبل لو حچت واتغرّد ابكل روض ـ سِمْعـَتهـَه البلابل نِـست غِـنوتهـَه
***
يامزيون يـَمـْضمـّر يـَبو الشامات ـ يطرزَن بالعِـشِگ تـُـفاح البخـَدّه
لوعـينه فِـتحهَه البحـَـر من ايموج ـ يتراگـص ابعينه الموج يـِتـهَـدّه
غرنوگ اويباهي حِـسنه بالغزلان ـ نوبات الغــَزال ايغار من صـَـدّه
ياحِسَّه العـَزف من يحچي بالچلمات ـ بالناي الـعـزف والعود يتحدّه
مُهـرَه امضمّره واتـْـفزز الخيـّـال ـ تِـتمـَشـّه ابغـَـنج للغـَمزه تِـتـفـَدّه
لو سَهمه رمَه من قوسـَـه نِشّابات ـ يضربك بالگلب ماتگـدَر اتـْصِدّه
والنوب الدمع لـو طرّز الـخدّين ـ ليلو اودر تِنعثــَر فاض من عِـنـْـدَه
ياشامـَه اوتريـد اتعـارك الـِـشفــّـات
وارضاب الـْشِـفايف عَسل هالـْـنـَدّه
***
تلاگينـَه كًـعـَدنـَـه اهواي فوگ اهواي
والشاهِـد گـمَر مـَـذبـُـوح مِـن گــَده
وانـْجـُوم اوسُـكـون الليـل وامْهـامَـس
كل الليـل آنـَه اوياه سهـْرانـين ماهِـدّه
دگ گلبي ، اوسِـمعـْـته ايگـول يتـنهـّد
غِـزاني الشيب شوف الراس اوتـْعـَدّه
واتذكر سوالفـْـنه ابتوالي الليل للغـبشَه
مامش نوم نتسحـّر ، إيد ابإيد نِـتغـدّه
وَعـْدّل زلفـَه من يـِهـْدل على المتـنيـن
جـوريـّه الـْورد واتـْـشابگ الـْـشَـــدّه
يـابويـَه الورد ضيـّع حـروف إسْمـَـه
سأل عـَـنـّـه الإسم ؟ گال الإسم وَردَه
جـِبـَل إنت يـعالي او ماإلك منـْهـَه ـ جـِبل عالي ينِـشدك إنت مـَتـْـنِشـْـدَه
بهـْداي اوهـِمَسْت ابإذنه احبنـّك ـ رجف كلـّه رجـَف صاح اوطلب نجدَه
ياويلي على المامش عِـشِگـنـَه ايـْنام ـ يتغـَـطـّه ابدَمِـعـنـَه والسَهـَر هـَـدّه
***
ياويلي العِـشگ لو بـَـلـّـل الـْيمـْشون
مثل صيف المطر وايخاف من رعـدَه
مثل فاس الـْحـَفر من يحفـُر الگـيعان ـ وابگـاع الحـَفـُر بيهه انكِسر ربـْدَه
تالي اشلون گِـتله اشلون گال اشلون ـ ألف اشلون واشلون اوبعَـد بـَعـده
زرعـينه العِـشًگ نِتـْـنـَـطر المزنات ـ ياوسفه زرعـْـنه والثــُمـَر (سِـعـْـدَه(
حـَط خـَدّه على اخدودي اولچعـني الشوگ
لـَــز خـَـدّه اعـْـلـَـه خـَـدّي ياحِـسِـن خـَـدّه
گًلـّي اشلون شـَيّبنه او سِـحگـنه الرّيـل
فراگينه اتـعـِبَـت ، لِلـضيـم يـِـتــْعــَدّه
گِــتـله اصبَـر عِـشگـنه الموت لبنادم
هـَـم شفت الـْـيموت ايـگـوم من لِـحدَه؟
وردَه انت يبعد الروح يالـْورده ـ هم شِفت الدَغـَل مَـرّه انـْگـلـَب ورْدَه؟
***
شـُو دَمعـَه اجَـت طـُـفحَـت على الخديّن
شربـَـن مِـن رموش العـيـن دَمعـَـتهـْــَه
اشوف اجبال واتـْحَركت تريـد الگـاع
زلــْزال اورعـَــد ياصَـبّـه عـَبــْرَتـهـَه
بچـيت اوياه وادموعي تِـطِـر الـْزيـج
ارموشي اشبگـَـت يابويـَه كِحـلـَـتـْـهـَه
أشوفن بيهه ، چَـنهه اتعاتب العِـشاگ
حـُب چـلمَه چـِـبيره اتـْـبوس شِـفـّـتهَه
من اتحِـب يخويـَه گلبك اتـْخـَـلـّيه ـ رهـينـَه لِـلـْـيحِـب والعـْيـن تِـرهـَـنهَه
واتـْـرافـُس تِـظِـل بيد الـْطِفـِل خلـوّك ـ طـيرَه اوماتـِگـول أحـّاه ويهـِـدهَه
أسَـلـّْمَ امري للخالق يـَبعـْد اچلاي ـ هذا الله اويـِخِـط لِـلناس قِـسْـمـَـتهَه
لكن والله والخالِـق سَـبِـِع گامات
أزف روحي ابْـچــِفـَن بـِـشـْموع زفــَّّتـْـهـَه
وخلـّيهَه الهـَلاهِـل چنهه طگ الـْچيل ـ أهـَلهِـل والـِدمع بالعـين نـَشفـتهَه
ورده امعطرّه ابريحان واگرنفل تراه ايفوح
واعـْـيــونـَـه يـغـار اللـيل من عِــــدهََـه

منقول