حبيب العربنجي : بالشتا سخان...بالصيف موطا

حبيب العربنجي : بالشتا سخان...بالصيف موطا

10/02/2011

يمعودين أبوس أيديكم (بس بشرط ما لابسين محابس) الله يخليكم لا تكبرون راس هاي الحكومة الخايسة وتريدون تسوون ثورة الياسمين أو ثورة اللوتس بالعراق...ترى يا حيف باچر لو عگبة يجي طاري هاي الحكومة وبصفها چلمة وردة الياسيمن أو زهرة اللوتس...عيوني أنتو...ترى هذولة ما يليق بيهم لا الياسمين ولا اللوتس وأگص إيدي وأنطيها لچلب جربان إذا أكو واحد بيهم يعرف شنو شكل زهرة اللوتس او شنو معناها وبيا حضارة چانت مقدسة..ترى هذولة جيف ومو مال ورود وأزهار...ويجوز يعرفون من الزهرة زهرة وحدة هي عباد الشمس (أو زهرة الشمس بحسب قرار مجلس قيادة الثورة الأزلامية) لان يكرزون حب شمسي قمر قبل ما ينامون في قاعة مجلس النوام..
حتى بنص ميز مجلس الوزراء...اكو حفرة مليانة حشيش أخضر...مو الگاعدين حتى لا يحسون بالجوع ...وهسة جايين وتريدون تصير عدنا ثورة الياسمين...بابا إحنا وين والورد واليامسين وين...سامعين بحياتكم واحدنا من يسلم عاللاخ الثاني يجاوب ويگول " صباح الفل والياسمين" ...إحنا إحسن واحد بينا راح يجاوب ويگول " شنووووووووو" وطبعا بچهرة تنافس چهرة بورينا...لأن الناس على چهرات رؤسائهم بس مو على حظ رؤسائهم ...وفي أحسن الظروف التعبوية والديمقراطية...الناس تحت نعال رؤسائهم.
الخروف يعترض من يروح للذبح...وأكو شواهد موثقة على اليوتيوب لهروب خرفان وثيران من إيد الگصاب ونشوف الخروف يعترض ليش لازم ينذبح حتى نتعايد، وإحنا..آويلي عالغيرة... اكبر (إنتفاضة) إللي مدوخينا بيها ...مرة (شعبانية) ونوبة (إنتفاضة الجنوب) چانت بدعم أمريكي وإيراني...ومن شالت امريكا أيدها...كلها عشرة أيام وقوات الحرس الجمهوري مسحت الگاع بيهم...وإذا هم هيچ عدهم غيرة ليش سكتوا من يوم 17 تموز 1968 لحد يوم 2 آذار يوم بدء الإنتفاضة الشعبانية مالتهم...شنو چانوا يخدرون الچاي عالنفخ لو شنو الموضوع...صح هذا الكلام ما راح يعجبكم لأن الحچي العدل ننزعج منه...بس مو هي هاي الحقيقة ؟ خلونا نواجه نفسنا مرة بدون بيچة !!
ونفس الشي...ليش سكتوا من يوم 2 نيسان 1991 لغاية يوم 19 آذار 2003...وين چانت غيرتهم والامهات گاعدن ينطرن أبنائهن وماكو خبر...ولا گبر حتى يروحن ويزورن ويشعلن الشموع عد راس المدفون ؟ شنو غيرتهم ما تنشحن إلا ببطارية أمريكية لو شنو الموضوع...ماكو أي مجال نقلد لا تونس ولا مصر ولا موزمبيق ولا حتى موناكو الفقيرة...إحنا غير ...والذل بينا طبع وخير.
سوق مثل سوق شارع المتنبي إحترك...وقرينا كتابات يوم يومين وتالي طلقة بالمثانة وكل شي گعد بمكانه. لو ربع كاشية هذا السوق أو إستكانة چاي من الشابندر بأي مكان وصار بيه نفس الشي إلا چان الكـُــتاب يحرگون كتبهم بنص العاصمة حتى الحريق يوصل للقصر...فدوة يروح الكتاب إذا ورا هالحريق أكو نسمة هوا باردة تجي من مبردة (بعدنا بعصر المبردة...آويلي) او نفتح السخان ونشوف أكو ماي حار...وبالمناسبة ترى السخان اكبر تحدي للحكومة...يعني مال واحدنا يفتح السخان ويشوف ماي حار هذا يعني أكو كهرباء مستمر لأكثر من ساعتين...وأكو ماي قوي بحيث صعد للخزان، وأتحدى لو حكومتنا تگدر تصلح حال السخان....والنوب نريد منها تصلح حال البلد....يا عيني عالبلد....دمعي عالبلد...
خلي تصير ثورتنا ثورة السخان بالشتا...إي بلا شقة...وچنت قبل ثلاثة أشهر تقريباً كتبت نريد حكومة موطا ...ونشرت في 19 تشرين أول 2010 في موقع كتابات... وكتبت ليش نريدها موطا...وهاي هي الأسباب:
أولا...حتى توصل كارتونة موطا بالنستلة كل يوم لا مايعة ولا سايحة هذا يعني وجود فريزر قوي بالمعمل وبعدين بالنقل...خلونا هسة بالمعمل...وجود فريزر عملاق وقوي يعني أكو كهرباء...يعني وزارة الكهرباء تشتغل مو بس تصريحات عبالك إجاهم فيروس من قاسم المو....سوي صاحب الطلة التلفزيونية إللي تنافس طلة واحد چان يطلع كل يوم من الساعة الثامنة حتى بعد السلام الجمهوري...يعني حالتنا اوكي والكهرباء بس وطني يعمل ويعني أكو تنسيق بين وزارة الكهرباء وبين وزارة الصناعة قسم الصناعات الإستراتيجية الثقيلة – فرع الموطا والنستلة !

وثانيا...حتى الموطا أم النستلة توصل يمي لا مايعة ولا سايحة وبالوقت إللي أريد فهذا يعني ماكو سيطرات بالطريق ولا أكو كلب فالت من وزارة وبحلگه عظماية والكلاب الباقية تلاحگه...وطبعا مع إختلاف التسميات والألقاب يعني مو كل كلب كلب...ولا كل وزير وزير...وشيلوا منا وخلوا إهناك تصير العبارة صحيحة...لأن الموطا ام النستلة ما توصل بحالتها يمي إلا إذا الطريق مو زحمة ولا سيطرات ولا طرق مسدودة.

ومن أريد كارتونة موطا أم النستلة وتجيني كاملة ما ناقصة موطاية ولا تطلع وحدة ما بيها نستلة او تطلع موطاية بيها ذبانة (علماً أن الذباب قد انقرض من العراق نهائياً بحسب مراقب محايد من مزبلة بصف گراج النهضة)...فهذا يعني مصنع ما بيه لا فساد ولا سرقات...ويعني أن الوزارة إللي تدير هذا المصنع الحكومي الإستراتيجي هي وزارة عارفة صلاحياتها وحجم مرجعيتها وعمامتها وتقوم بعملها الإشرافي الحوزوي على المنتوج حتى تضمن الجودة حفاظا على المستهلك حتى نضمن الصحة السليمة لجولة قادمة من اللطم والمفاوضات الحكومية ! وإذا الكرتونة وصلت كاملة العدد والعدة هذا يعني ماكو بوگ للضالين ...يعني نضمن سلامتنا من فيروس الخمس لو يجوز الموطا حرام وخاصة هي تشبه فرد شي ببال مناف الناجي !

وحتى الموطا توصل يمي وين ما أصير وتوصل لعندي بس أگول لو أخابر مرة وحدة...فهذا يعني الحكومة تسمع صوتي ..وآني ما دا أقصد صوتي الإنتخابي لان ذاك راح وبح وما أعرف مصيره المجهول ولو كنت أعرف خاتمتي ما كنت أنتخبت...وبأول تلفون توصلني الموطا وين ما أريد
إنتهت الأسباب الموجبة لحكومة موطا الإتحادية
يعني إخواني ما نريد غير حكومة سخان بالشتا...وحكومة موطا بالصيف....وإذا صارت عدنا هيچ حكومة...راح أبدل النشيد الوطني إلى أغنية فيروز " حبيتك بالصيف...حبيتك بالشتا".
وإذا أطلع بمظاهرة بنص بغداد...فراح اشيل لافتة وحدة وما اشيل غيرها...لافتة مكتوب بيها:
نريد حكومة بالشتا سخان...وبالصيف موطا
إذا عدنا هيچ حكومة....فخلوها تحكم نص قرن ميلادي...مع إضافة الأعياد الدينية واللطمية والأربعينية !
habibarabenchi@yahoo.com