حبيب العربنجي : الشبكة الزقنبوتية

حبيب العربنجي : الشبكة الزقنبوتية

03/03/2011

والله طلع تاجر النعلان أحسن واحد بيهم چان فاهم شنو يعني الأنترنت والموبايل، ولو ما الحجي بوش ونعل أبو تحسين چنا لحد هسة ما نعرف الچك من البك لا في الانترنت ولا في الموبايل مو مثل هسة حالتنا نرگص وي الـ(بي بي ) مالتنا...الله يرحم چنا نوگف بالسرة على التلفون العمومي بباب الشرجي بلكن نحصل خط ونخابر الحبيبة الملعونة من ننزل للإجازة ببغداد...هيييييييييييييييييي وينها ذيچ الأيام وين هسة
تاجر النعلان نزّل علينا الكبنك وأستخدم (فاير وول) حتى لا نعرف شكو ماكو خارج أسوار العراق إللي چان المحظوظ إللي بينا يدفع كفالة الخروج من السجن ب 400 ألف دينار عراقي يوم چان راتب الموظف العراقي درجة ممتازة ومو أزلامي وما عنده مخصصات الزلم والفرقة والعضوية ما يتجاوز 3012 دينار عراقي وسبعمائة فلس لا غير..وحتى هذولة إللي چانوا يتحررون من السجن ويوصلون إلى مملكة الحسين (الحسين بن طلال مو عبالكم غير واحد) چانوا يتصورون أن (مقاهي الانترنت) مثل الگهاوي إللي عدنا...مثل ما راحوا إثنين عراقيين وأول ما وصلوا لعمان سألوا السايق وين أكو گهوة مال أنترنت أشوية نرتاح ونلعب طاولي !
وراح ذاك الوكت وإجى وكت جديد استلمناه خصيصاً وحصريا إلنا حتى الوليد بن طلال ابو روتانات والشيخ صالح أبو artصاروا يحسدونا على حقوق نشر هذا الوكت الجديد على شاشات الروتانات أو في ساعة صفا...صرنا نلعب جولة بالموبايلات ونسميها بأسماء حيوانات عجيبة غريبة والكل يتذكر نوكيا موديل أبو حمزة الواوي أبو الرگبة...وصرنا نفتح چنابر عالرصيف للأنترنت ...المسجات رگع على شاشات الأغاني... مثل المسج إللي يگول " آني من مغاوير الداخلية أسمي الحركي كنغر تك رجل...اريد أتعرف على إبنية حلوة من زيونة وهذا رقمي الله يخليكم سوولي چارة ولو مس كوووول او حتى رنة على موبايل سايلنت" والأنترنت ماشي بدربه ويخاف ربه لا بيه زايدة ولا ناقصة وإللي يحبنا يفرح ويانا...جميع الناس أغانينا ...وتهانينا يا أيام...تهانينا تهانينا. وكل هاي وإحنا ندلل الانترنت...مرة نسميه عنتر نت لأن ما يوگف گدامه شي...عنتر وإنهد بالناس...وأما الناس المثقفة خريجي نادي العرگ بساحة الاندلس فيگولون الشبكة العنكبوتية.
وبعد ما منّ الله بفضله على الشاب مارك جوكر بيرج خريج جامعة هارفرد وصمم فيس بوك وعلى الثلاثي جاد هورلي، ستيف جن و جاويد كريم إللي صمموا يو تيوب صار الانترنت الشبكة الزقنبوتية لأصحاب الكراسي من ماركة مدى الحياة، ومثل ما شفنا الموقع الممتاز الخاص بالوزير كريم صفاته ووحيد زمانه وزير القهروباء...بعد ساعتين چان عدد زوار الموقع بالالاف...ومثل ما صار هسة قبل يومين...أغنية زنگة زنگة للقذافي...خلال أقل من 48 ساعة كان عدد المشاهدين بحدود مليون إذا نجمع المشاهدين من مختلف المواقع والقوميات والطوائف والمرجعيات والكيوليات والعشائر والأفخاذ والبطون والكروش وما تحت الثرى.
وإذا چان عدنا أمل بصوووووووووزة إن القهروباء راح يتكرم بزيارة بيوتنا التعبانة إللي ما تليق بمقامه السامي ...بس بعد ما نال الفيسبوك واليوتيوب شرف العضوية ودرجة المناضلين في صفوف الحزب وصاروا من الرفاق إللي يدعمون حركات التحرر (خرة بالحظ صاروا مناضلين بدون أي إجتماع أو ترديد قسم أو دفع إشتراك أو مشاركة في الجيش الشعبي) بعد هذا الإنجاز الحزبي..راح يصير القهروباء فرد نوب قهر وباء وقهر وبلاء بحياة كل عراقي وما راح نشوف گلوب أبو العشرين مضوي بالكهرباء الوطنية في كل العراق حتى تخلص الحكومات اصحاب الكراسي ماركة مدى الحياة من زقنبوت الانترنت و قوة نضال الفيسبوك و اليوتيوب ...وراح ننتظر فرج رب العالمين (ترى مو عبالكم هذا فرج الحيدري بس بدل اللقب) حتى نحتفل بأي واحد محظوظ يلعب الحظ وياه و يموت بالنتلة الكهربائية الوطنية...آيبااااااااخ غير شرف ومنزلة المچنصين بالدنيا والصالحين في الآخرة إذا واحد بهذا الصيف يموت وهو يفتح المبردة يچيك الواتر بمب...لأن هذا يعني أكو كهربا ء وأكو ماي...حييييييييييييييييييل هيچي حظ مال هيچ موتة واحد ما يموتها غير بالدول إللي الله مفضل عليها بحكومات رشيدة وفيدرالية أبو الچروخ وتايرات چوبلس.
وهسة حكومات الديمقراطية الكلامية صايرة بيها رعصة من الانترنت...وبعد ما چانوا يدللون الانترنت أيام ما چانوا (معارصة)...صاروا هسة ما عدهم غير خوف واحد....الشبكة الزقنبوتية...وما بين العنكبوت والزقنبوت...خيط يجر الواحد من (المعارصة) إلى الحكومة
.
..........
- المعارصة : مو خطأ طباعي
habibarabenchi@yahoo.com