كاكا جلال ..، كاكا .. مام جلال ... هاي وينك سيادة الرئيس .. وين صرت دا احجي وياك , شبيك متسمع ، تسمحلي ادخل ، اني شلش , عندي شغلة

كاكا جلال ..، كاكا .. مام جلال ... هاي وينك سيادة الرئيس .. وين صرت دا احجي وياك , شبيك متسمع ، تسمحلي ادخل ، اني شلش , عندي شغلة زغيرة وياك ، هاي شبيك كاكا ، انت سمعتنا جبنا طاريك ،، احد هتف ضدك ، كلنا عليك جذاب ، كل مافي الامر ، سمعنا اكو مظاهرات بال

كاكا جلال وين جنت

شلش العراقي

تاريخ النشر 10/03/2011 10:57 AM

كاكا جلال ..، كاكا .. مام جلال ... هاي وينك سيادة الرئيس .. وين صرت دا احجي وياك , شبيك متسمع ، تسمحلي ادخل ، اني شلش , عندي شغلة زغيرة وياك ، هاي شبيك كاكا ، انت سمعتنا جبنا طاريك ،، احد هتف ضدك ، كلنا عليك جذاب ، كل مافي الامر ، سمعنا اكو مظاهرات بالسليمانية ، ولان منعرف كردي ، ماعرفنه شنو القصة ، وانت تدري طاسلوجة دولة جارة واحنا دستوريا ممنوع نتدخل بشؤون الجيران ، بس سمعنا من التلفزيون اكو بالسليمانية مظاهرات , والبيش مركه والاسايش ماقصروا ، ادبتوهم وفتلتوا كم واحد ، حتى خطية اكو طفل انقتل بطريقة تدمي القلب , والامور صارت هادئة والحمد لله ، احنا شعلينا , راسا كلبت علينا ، وكم تصيح كركوك قدس الاكراد وعينكاوة فاتيكان الاكراد وكويسنجق حائط المبكى ، وبيره مكرون جبل الهيكل ، والمنطقة الخضراء ثالث الحرمين ، هاي شنو ابو قباد (اسم المحروس ابن السيد الرئيس )،،، انت مو رئيسنا وحامي دستورنا والساهر على وحدة العراق ، شنو تعالوا ياتركمان احنا وياكم نضرب العرب جلاق ونطلعهم برة كركوك ، وين يرحون لداقوق لو قادر كرم ، عيب كاكا هذا الكلام عيب ومو مال رئيس دولة ، بس هي يا دولة , لو اكو دولة ، جان كلنا ميخالف ، لو اكو دولة وبيها رجال ، رجال من صدك ، جان كلولك ذب العوجية واطلع برة، يالله روح لدوكان ،،بس حشى من يسمع مجموعة خرنكعية ،

كركوك يا كاكا ، قدس الاكراد والتركمان والعرب . كركوك ليست مزبلة لمشاكل احزابكم الداخلية ، كل متتضايقون تفتحون باب الجحيم على كركوك ، كركوك مدينة للتعايش والاخاء والمحبة ، للاكراد والتركمان والعرب والاثوريين ولجميع العراقيين ، كركوك مو المشكلة ، كركوك هي الحل ، وبس تاخذ حقها من التنمية والتطور راح يتحدث بيها الاقتصاد وتسكت السياسة ، وبدل متورطوها بحروب ومشاكل وصراعات , روحوا ابنوها، ابنوها مام حلال , خل ابناءها مرة وحدة يشعرون همه بشر وابناء مدينة ثرية وبيها اقدم حقل نفط بالمنطقة، ابنوها كاكا ابنوها ، مو تبوكوها حرام ، كركوك تعبانة ومتهالكة وحزينة وشوارعها كئيبة ، طلعوا البيش مركه وابنوها، بطلوا كلاوات مال قدس الاقداس ، هي القدس وراها مليارين مسلم وينها ، الله وكليك صار اسمها القدس الشرقية , ,والشرقية صارت نصين , وحتى اهلها من يريدون يصلون بالحرم , يعبرون ،سيطرات اكثر من سيطرات الكرادة .

كاكا جلال ، ياسر عرفات مات ، وفلسطين ضاعت ، وللقدس رب يحميها ، واحنا حاليا بالعراق ، وانت بالمنطقة الخضراء.. وكركوك تنام على هموم الدنيا ، مدينة من المزابل والقمامات والجوع والفقر والبطالة حتى شارع واحد مبلط ما بيها , مع ان الاسفلت يطلع من الكاع من قدرة الله، كركوك بيها الغاز يحترك من فجر البشرية وقنينة الغاز صارت حسرة على اهلها , كركوك قرية متخلفة تحتاج رافعات البناء لا خطابات التهديم ،كركوك تحتاج نهضة عمرانية عملاقة مو تصريحات نارية ومزايدات قومية.

صير عاقل كاكا، صير عاقل , مابينه حيل طلايب ، احنا والاكراد والتركمان اهل واخوان , والرئيس ما يفرق شعبه . انت لازم اذا سفتنا شوية متزاعلين المفروض متنام للصبح حتى تصالحنا ، مو انت تصدر مشاكلك الحزبية علينه ، وتصب الزيت على النار, روح اسمع اهلنا بالسليمانية شيردون ، وحقق مطاليبهم واقضي على الفساد والسرقات والاهمال والثرثرة ، ولتتعلم من جماعتنا جيرانك بالمنطقة الخضراء , ترى ذولة بطون جاعت ثم شبعت ذولة حرامية وحيتان وراح يشوفون مصيرهم الاسود .

بعدين ماكتلي سفرتك للكويت شلونها،، انشالله ناجحة ، عاد العزايم والثريد هناك بفلس وانت ومتشتهي ،، واحنا من وراك علكناها ببغداد وسويناها ظلمة على ابو اسراء ، وشرفك سويناه مذيع ، اربع وعشرين ساعة بالتلفزيون ، طلعنا لساحة التحرير ,طبعا مو كل احنا ،، جم الف واحد بس ، بس اخوك نوري ما خله صبة كونكريت تعتب عليه ، ومثل الفار ختل وسد الجسور والشوارع ودز كمال الساعدي ،، يمعود روح اشوف شنو القصة ،،مرعوب ما خله اية ما قراها , حتى دعاء كميل قراه مرتين ،، بعدين كام يتوسل ، يمعودين اطوني ١٠٠ يوم وشوفوا شراح اسوي ... واحنا نهتف كذاب ابو اسراء كذاب ،،، اي والله فاتتك ، جان متت من الضحك ، وبعد جم يوم هم طلعنا وعلكناها , بس انت هم ما كو ، صوجك طولت بالكويت ، فاتتك جان يومية تشوف ابو اسراء وتضحك عليه , واذا ماعندك شي هذا الاسبوع تعال لبغداد بشرفك ، تعال للمطعم التركي و اشوف ابو سراء شلون بطنه نكوم تمشي ،، مع العلم احنا بعدنا ما طالعين من صدك ، بس هو ما ادري شبي ، صاير ابو الفزة،

كاكا ، اني عندي شغل شوية ، ورايح افتح الفيس بوك اشوف شكو ماكو ،،، بالمناسبة انت مو رئيس جمهورية ، تدير بالك تفتح الفيس بوك , ترى يطك عليك.