في رثاء قندرة :حبيب العربنجي

في رثاء قندرة :حبيب العربنجي

18/07/2011

نعلة على الأزلام ورانا ورانا حتى في المنطقة الخضرة، يعني مصرين يرجعونا إلى ما قبل ثورة النعلان والقنادر إللي قادوها وشالوا لواءها بنجاح منقطع القيطان .وإذا أستمر الحال من غير ما نسيطر على التدخل والتوغل الأزلامي في العملية السياسية، فمو غريبة تكون هناك لافتة سودة معلگة على جدران المنطقة الخضرة ، ونقرا فيها:" إمتدت أيادي الأزلاميين المجرمة لخطف القندرة المباركة للنائم النعل النعلاني، ولم يكتفوا بذلك بل أوغل الأزلاميون في جريمتهم حين مزقوا الجواريب التي كانت في القندرة المغدورة ورموها قطعاً مبعثرة على مرمى من تواليت مسجد المنطقة الخضراء...إنا لأيران....وإنا لأيران راجعون "....إنتهت اللافتة .إي وداعة زلماي خليل زاد...الأزلاميون موجودين في المنطقة الخضرة ودا يبوگون رمز ثورتهم... ويجوز الأزلاميون گدروا يتسللون إلى المنطقة الخضرة في صندوق للقنادر مستورد خصيصاً للنوام ...حتى الازلام ما يستغلون النوام الحفاي ويلبسوهم نعلان وقنادر وبعدين يصيرون في صف الأزلام ضد العملية السياسية وفدرلة الدولة ...أو يخلون النعل في هاون ويقصفون المنطقة الخضرة ويوگع النعل في دولكة لبن أربيل رمز المصالحة السياسية والمبادرات الجاجيكية .صدگ حيرة...يعني ما نلبس قندرة النوب الأزلاميون يضحكون ويگولون " مو گلنالكم ما حد راح يگدر يلبسكم نعلان وقنادر غيرنا" ومن نلبس قنادر دا يبوگوها دعما للمقاومة خاصة بعد نجاح صولة ذات القندرتين إللي قادها بنجاح منتظر الزيدي ...وما حد عرف لحد هسة شنو چان سبب رمي بوش بالقندرة...هل تخلص الزيدي من قندرته رمز المرحلة الازلامية في حضور بوش كإشارة منه للعراق الجديد المتحرر من كل تبعات مرحلة الحكم الأزلامي والقندرة أكبر تبعات الأزلام، ام أنه أراد أن يضرب بوش برمز المرحلة الأزلامية في إشارة إلى أننا لم نرجع إلى العصر الحجري والدليل لا زلنا نلبس قندرة مصبوغة! وين چانت أكو قندرة بالعصر الحجري!...والجائزة هي قندرة قياس 44 للي يعرف الجواب وعليها توقيع منتظر الزيدي.وجريمة سرقة القندرة في المنطقة الخضرة بيها ضحيتين...الأولى هي القندرة المغدورة إللي لا يزال مصيرها مجهولا بيا رجل صارت....أما الضحية الثانية فصاحب القندرة النائم في المجلس والمسجد لأن لو مو نايم چان يدير باله على قندرته...وإللي ما يعرف يحافظ على قندرته رمز كشخته شلون راح يگدر يحافظ على حقوق المواطنين ويمثلهم، وإللي ما عنده وفا لقندرته شنو فائدته للوطن والديمقراطية وشلون راح يمشي في مسيرة الحزب والثورة...بالنسخة الدعوچية ببركات آل بيت رئيس الوزراء....وتعالوا شوفوا ....17 مليار دولار إنباگ ولا واحد من النوام ضرب راسه بالحايط إحتجاجاً وإحتراما للقسم البرلماني...وثلاثين مليار دولار ضاع من تخصيصات الكهرباء ولا واحد من النوام وگف بباب المجلس ونتل روحه بكهرباء المولدة ...بس من توصل البوگة للقندرة المباركة نشوف النائم الباسل يرفض مغادرة أرض المعركة رغم توسلات رفاق القندرة...رفض هذا النائم الباسل المغوار مغادرة المسجد وطالب بقندرة جديدة مع ضمان القيطان والدبانستري، وإلا راح يدعي على العراق والشعب العراقي في محراب مسجد المنطقة الخضرة...وإحنا وحظنا عاد...شراح تمطر علينا...عگاريگ لو قنادر مفتوگة فاتحة حلگها تعض مثل الچلاب...چلاب المنطقة الخضرة...وبكيفكم شنو قصدي....وقد طالبت كتلة هذا النائم بعقد جلسة إستثنائية لمجلس النوام لإدانة العملية والوجود الأزلامي في المنطقة الخضرة، كما أصدر تحالف لبن أربيل بيانا أدان فيه المحاولات الازلامية لإفشال مبادرة لبن أربيل...ومن جانبه ألقى القايد الخبل قايد قواد (هذه الكلمة تقبل المعنى الآخر تماما) آل ممة ... قصيدة أبكت اللاطمين في ذكرى غياب القندرة عن المشهد السياسي... يمعودين الوطن إنضرب بالقندرة حاله حال بوش...بس بوش چان مچنص من لگى واحد يمه صد الضربة القندرية...بس الوطن ما حد واگف لا يمه ولا وياه حتى يصد عنه القصف القندري من صار ضرب الوطن بالقندرة الإيرانية تحديدا...قمة الإنتماء ....لكيشوانية قم وطهران .وإلى أن نعرف مصير القندرة المغدورة...نرفع أرجلنا حفاي لمقام صاحب القندرة...حتى يتأكد أن الشعب كلهم حفاي....رغم الفدرلة والديمقراطية إلا من ر حمه الدستور والمحاصصة...بس لا يشوفونا الأزلام....ويشمتون بينا.habibarabenchi@yahoo.com